Luca 19

19

Gesù e Zaché

19:1 Gesù a l’é intrà a Gerico e travërsava la sità. 19:2 A-i era lì n’òm ch’as ciamava Zaché. A l’era ‘l cap dij gablé e a l’era në sgnor. 19:3 A sercava ‘d vëdde chi ch’a l’era Gesù, ma a podìa nen an càusa a la pien-a ‘d gent ch’a-i era, përchè a l’era pcit dë statura. 19:4 Antlora, për podèjlo vëdde, a l’é butasse a core anans për la vìa andova che Gesù a l’avìa da passé e a l’é montà an sù n’erbo ‘d sicomor. 19:5 Cand che Gesù a l’é rivà an col pòst ansilì, a l’ha vardà an sù, a l’ha vëddulo e a l’ha dije: “Zaché, cala giù sùbit, përchè ancheuj a venta che im fermo a toa ca!”. 19:6 Zaché a l’é calà giù an pressa e a l’ha arseivulo con gran’ piasì1. 19:7 Lolì, contut, a l’é nen piasuje a la gent, ch’a mormorava e ch’a disìa che Gesù a l’era intrà ant la ca ‘d n’òm ëd cativa reputassion2 për logèje. 19:8 Ma Zaché. drit dëdnans al Signor, a l’ha dije: “Varda, Signor, mi i dago la metà dij mè beni ai pòver, e s’i l’hai fàit ëd tòrt a quajdun an quajcòsa, i-j n’a rendo ‘d quat vòlte tant!”. 19:9 E Gesù a l’ha dije: “Ancheuj la salvëssa a l’é intrà an costa ca, përchè ‘dcò sto-sì a l’é fieul d’Abraam. 19:10 Përchè ‘l Fieul ëd l’òm a l’é vnùit a serché e a salvé lòn ch’a l’era perdusse.

La paràbola dij des servitor

19:11 Coma ch’a sentìo ste còse, Gesù a l’ha seguità sò dëscors e a l’ha proponuje na paràbola, përchè ch’a l’era davzin a Gerusalem e ch’a pensavo ch’ ël Regn ëd Nosgnor a dovèissa manifestesse al sël moment.

19:12 Donca a l’ha dije: “N’òm ëd famija nòbil a l’avìa da andess-ne ant un pais da leugn pr’ arsèivje la dignità regal, ma con la vista ‘d torné. 19:13 Parèj a l’ha ciamà des dij sò servitor e a l’ha spartì an tra ‘d lor des monèje d’argent, un-a pr’ un, e a l’ha dije: “Feje valèj3 fin-a ‘l mè artorn”. 19:14 Ora, ij sò consitadin a lo detestavo, e për lòn a l’han mandaje dapress na delegassion4 për dì ch’a vorìo nen che col-lì a dventèissa sò rè.

19:15 Cand ch’a l’é tornà anvestì dla dignità regal, a l’ha mandà a ciamé ij sò servitor, coj ch’a l’avìa fidaje l’arzan, për savèj vàire che mincadun a l’avèissa vagnà con soa industria. 19:16 Antlora ‘l prim a l’é vnùit e a l’ha dije: “Signor, toa monèja a n’ha frutà d’àutre des”. 19:17 “Bin fàit, ti ‘t ses un brav servitor!”, a l’ha sclamà, “it ses ëstàit fedel con ël pòch ch’i l’hai date, parèj, për toa arcompensa, ti ‘t farai governator sù des sità. 19:18 Peuj a l’é vnùje dapress ël second, e a l’ha dije al rè: “Signor, toa monèja a n’ha frutà d’àutre sinch”. 19:19 “Bin fàit!” A l’ha dije, “‘it farai governator sù sinch sità”. 19:20 Ma ‘l ters servitor a l’é presentasse mach con l’istessa monèja ch’a l’avìa arseivùa e a l’ha dije: “Signor, varda sì toa monèja ch’i l’hai tenula anvlupà ant un tòch ëd tèila. 19:21 I l’avìa tëmma ‘d ti, përchè ti ‘t ses n’òm ch’a l’é malfé da tratesse: it ciapes lòn ch’a l’é nen ël tò e it mëssone lòn ch’it l’has nen sëmnà”. 19:22 E ‘l rè a l’ha dije: “Servitor gram ch’it ses! Toa condan-a a ven da toe paròle medésime. S’it savie ch’i son n’òm ch’a l’é malfé da tratesse e ch’a ciapa lòn ch’a l’é nen ël sò e ch’a mëssona lòn ch’a l’ha nen sëmnà, 19:23 përchè, donca, it l’has nen dàit la moneja an depòsit a la banca? Al mè artòrn i l’avrìa almanch artirala con l’anteresse!”. 19:24 Antlora a l’ha dije a j’àutri ch’a j’ero lì present: “Leveje la moneja d’argent e dèjla a col ch’a n’ha des!”. 19:25 E lor a l’han dije: “Signor, ma col-là a l’ha dagià des moneje!”. 19:26 E ‘l rè a l’ha replicà: “A l’é pròpi parèj: a coj ch’a dovro bin lòn ch’a l’han arseivù, a-j na sarà dàit fin-a ‘d pì, ma da coj ch’a fan gnente, fin-a ‘l pòch ch’a l’han arseivù a-j sarà portà vìa”. 19:27 Dël rest, mné sì coj mè nemis ch’a l’han nen vorsù ch’i fussa ‘l sò rè, e masseje belessì dëdnans a mi!”.

Intrada trionfal a Gerusalem

19:28 Dòp d’avèj dit cole còse, Gesù a andasìa dëdnans a lor montand a Gerusalem. 19:29 Cand ch’a l’é rivà da le bande ‘d Betfage e ‘d Betània, davzin al mont ciamà dj’Ulivé, Gesù a l’ha mandà doi dij sò dissépoj, 19:30 con sa comission: “Andé a la borgià ch’a stà visavì ‘d voi e pen-a intrà, i trovreve n’asnèt stacà che gnun a l’ha ancora mai montalo. Dëstachelo e mnemlo sì. 19:31 Che se quajdun av ciama përchè i lo dëstache, i l’avreve da dije mach parèj: “A l’é përchè ‘l Signor a n’ha da manca”. 19:32 E coj ch’a l’ero mandà a son andass-ne e a l’han trovà l’asnèt pròpi coma Gesù a l’avìa dije. 19:33 Coma ch’a dëstacavo l’asnèt, ij padron a l’han dije: “Përchè dëstacheve col asnèt?” 19:34 Lor a-j rëspondo: “Ël Signor a n’ha da manca”. 19:35 A l’han donca mnalo a Gesù e a l’han campà ij sò mantel ansima dl'asnèt; peuj a l’han fàje monté Gesù. 19:36 Mentre ch’a andasìa anans, la furfa a dëstendìa ij sò mantel për la strà. 19:37 Cand ch’a l’é stàit davzin dla calà dël mont dj’ulivé, tuta la gran massa ‘d dissépoj, pien ëd gòj, a l’han comensà a laudé Nosgnor con ëd grand crij5 për tùit ij miracoj ch’a l’avìo vëddù. 19:38 A disìo: “Ch’a sia benedì ël rè ch’a ven a nòm ëd Nosgnor; che la pas a sìa ant ij céj e glòria ant ij leugh pì àut!” 19:39 E quajdun dij Farisé ch’as trovavo an tra la furfa a l’han dije a Gesù: “Magister, trovèje da dì ai tò dissépoj! Ch’a diso nen ëd ròbe parèj!”. 19:40 E Gesù a-j rëspond: “Iv diso che bele se sti-sì a stèisso chiet, fin-a le pere a crierìo!”.

19:41 Cand ch’a l’é stàit davzin a Gerusalem e ch’a l’ha vëddù la sità, Gesù a l’ha piorà sù chila, e a l’ha dit: 19:42 “Ò s’it l’avèisse mach arconossù cola ch’a l’é la vìa dla pas! Ma adess a l’é trop tard, e la pas a l’é stërmasse ai tò euj. 19:43 Ij dì prest a vniran ch’ij tò nemis a t’anvironran ëd trincere e t’atachëran da tute le bande. 19:44 E a të spianeran, ti e ij tò fieuj, e a lassran nen an tì pera an su pera, përché it l’has nen savù arconòsse ‘l temp che Nosgnor at l’avìa fate visita6”.

Purificassion dël templ

19:45 Peuj Gesù a l’é intrà ant l’area dël templ e a l’ha comensà a scassene fòra coj che là ‘ndrinta a fasìo ‘d comersi7. 19:46 A-j disìa: “Mia ca a l’é na ca ‘d preghiera, ma vojàutri i l’eve fane na trun-a ‘d làder!”. 19:47 Minca dì Gesù a dotrinava ant ël templ. Contut ij gran sacerdòt, ij magister ëd la lej e ij cap dë l pòpol a sercavo ‘d felo meuire, 19:48 ma a savìo nen coma felo, përchè tut ël pòpol a lo scotava con granda atension.

Nòte

1 O “gòj”.

2 O “d’un pecator”.

3 O “anvestije”, “ampiegheje”,

4 O “n’ambassada”.

5 O “a àuta vos”.

6 O “ch’it ses stàit visità”, “ël temp ëd toa visitassion”.

7 O “ch’a vendìo e ch’a catavo”.



À à È è É é Ì ì Ò ò Ó ó Ù ù Ë ë
Comments