B - Testament Neuv‎ > ‎Giaco‎ > ‎

Giaco 1

Capìtol 1

Salut

1:1 Giaco, sërvent ëd Dé e 'd Gesù Crist, a saluta le dódes tribù dësperdùe pr' ël mond1.

Preuve e tentassion

1:2 Mè frej e seur, considerelo gnent'àutr che 'd gòj quand ch'av càpita 'd tombé ant ògni sòrt ëd preuve, 1:3 savend che la preuva 'd vòstra fej a fà chërse la passiensa2. 1:4 Contut, lassé che la passiensa a chërsa, përché, quand ch'a sarà dël tut dëslopà i sareve përfet e compì, ëd manera ch'av mancrà gnente.

1:5 Se quajdun ëd vojàutri a manca 'd saviëssa, ch'a la ciama a Nosgnor, e Chiel, ch'a l'é generos quand ch'a fà 'd cadò, a-j lo darà sensa arproceje gnente. 1:6 Contut, ch'a la ciama con fiusa, sensa avèj ëd dubi; përchè col ch'a dubita a l'é parèj a n'onda dël mar, agità dal vent e campà dëdsà e dëdlà. 1:7 Na person-a parèj ch'a së speta nen d'arsèive quajcòsa dal Signor 1:8 përchè a l'ha 'l cheur dividù an mes3, a l'é volùbil4 an tut lòn ch'as buta a fé.

1:9 Ij cristian5 ëd bassa condission ch'as na vanto përchè Nosgnor a l'ha esaltaje, 1:10 e coj 'd posission elevà ch'as vanto mach ëd lòn che Nosgnor a l'ha sbassaje. Vera, jë sgnor a vniran passì coma le fior dij prà. 1:11 Quand ch'a seurt ël sol, sò calor a fà sëcché la pianta, ij làver dle fiur a crojo e soa blëssa 'd lor a va a perdse6. Parèj jë sgnor, con tuta soa blaga7, a perdran tut lòn ch'a l'han8.

1:12 Nosgnor a benediss coj ch'a soporto con passiensa 'd preuve e 'd tentassion. Apress, quand ch'a l'avran passaje, a 'rseivran la coron-a 'd vita che Dé a l'ha promëttù a coj ch'a-j veulo bin. 1:13 Che gnun, quand ch'a l'é provà, a disa: "A l'è Nosgnor ch'am tenta", përchè Dé a l'ha gnun-e tentassion ëd fé 'l mal, e chiel medésim a tenta gnun. 1:14 Mincadun a l'é tentà mach dai sò desideri, ch'a lo tiro e a lo anciarmo. 1:15 Apress, costi desideri, quand ch'a son concepì, a fan nasse 'l pecà, e 'l pecà, quand ch'a l'é chërsù pien, a l'é bele pront a massene e dabon a l'ha 'l podèj 'd felo9.

1:16 Pijé nen 'n bàilo, mè car frej e seur. 1:17 Tut lòn ch'arseivoma 'd bon10 e minca don përfet, a ven da l'àut, a cala giù dal Pare dij lum. An chiel a-i é gnun-a variassion né d'ombra 'd cambiament. 1:18 A l'é Chiel ch'a l'ha decidù 'd dene vita11 pr' ël mojen dla Paròla dla vrità, përch'i fusso tanme le primissie 'd soe creature.

Un mëssagi da vive

1:19 Pro ch'i lo sapie, mè car frej e seur, che tuti a sio pront a scoté, contut meusi a parlé e a 'nrabiesse. 1:20 Përchè coj ch'as anrabio, a adempisso nen la giustissia 'd Nosgnor. 1:21 A l'é për lòn ch'i l'eve da bandoné tùit ij comportament dësconvenient e d'ògni sòrt ëd mal.

Arsèive con umiltà12 la Paròla piantà an vojàutri, ch'a l'ha 'l podèj ëd salvé vòstre ànime. 1:22 Buté an pràtica la Paròla, e scotela pa mach, përchè iv pijerie mach an bàilo da voi istess. 1:23 Përché se quajdun a scota la Paròla e a la buta nen an pràtica, a l'é parèj 'd col-lì ch'as varda ant lë specc për fese bel 1:24 ma peuj as na va dësmentiandse 'd lòn ch'a l'ha vëddù. 1:25 A l'opòst, col ch'a varda con atension la lej përfeta dla libertà, e ch'a l'é nen un ch'a scota e peui ch'as dësmentia lòn ch'a l'ha scotà13, ma ch'as aplica a l'euvra14, col-lì a sarà bin content d'avèjla compìa.

1:26 Se quajdun ëd vojàutri a chërd d'esse religios, ma a sa nen dominè soa lenga15 (coma s'a fussa 'n caval con le rëdne), e ch'as na lassa tiré dëdsà e dëdlà16, la religion ëd col-lì a l'é veuida. 1:27 La religion pura e sensa macia anvers a Dé, nòst Pare, a l'é 'd giuté j'orfanin e le vìdue quand ch'a l'han dabzogn e vardesse da la malissia dël mond.

Nòte

1 Maté 13:55; March 6:3; At 15:13; Galati 1:19.

2 L'abilità d'arziste.

3 O "d'ànim dobi", "a stà 'n pò da sì e 'n pò da là", un pò a chërd e 'n pò a chërd nen".

4 Variabil, nen stabil, nen ferm.

5 O “ij frèj”.

6 Isaìa 40:6-7.

7 O "con tute soe imprèise".

8 O "a vniran pasì".

9 O "a fan nasse la mòrt".

10 O "tut ël bin ch'a n'é dàit".

11 Vita spiritual, o "generene".

12 O "con dosseur".

13 O "sensa memòria".

14 O "ch'a la buta an pràtica".

15 O "ch'a sa nen ten-e la lenga a pòst".

16 O "lassand-se seduve".

Comments