B - Testament Neuv‎ > ‎Galat‎ > ‎

Galat 6

6

La lej ëd Crist

6:1 Car ij mè frej e seur, se n’àutr an tra ‘d voi a casca ant na quaj fota, vojàutri, chi l’eve arseivù lë Spirit1, giutelo a riarlevesse con në spirit ëd dosseur, e pensé che ‘dcò vojàutri medésim i podrie casché ant na tentassion parija. 6:2 Giuteve a porté ij carich j’un dj’àutri: a l’é parèj ch’i compisse la lej ëd Crist. 6:3 Se quajdun as chërd d’esse quajcòsa, bin ch’a sìa gnente, a s’angan-a da chiel istess. 6:4 Ciaschëdun a l’ha da esaminé bin soa condòta: antlora la càusa për gloriesse a la treuvrà an chiel medésim, sensa dovèj comparisionesse a d’àutri, 6:5 përchè ognidun a l’ha da porté ël pèis ëd soa vita.

6:6 Coj ch’a arsèivo le istrussion ëd la paròla ‘d Nosgnor a l’han da provëdde për coj ch’a-j la mostro, fasend part dij sò beni con lor. 6:7 Anganeve nen: Nosgnor a peul nen pijesse an gir. Lòn che un a sëmna a l’é ‘dcò lòn ch’a cheujerà. 6:8 Col ch’a sëmna ant ël camp dj’anvie carnaj, a cheujerà la perdission ch’a ven da coste anvìe, ma col ch’a sëmna ant ël camp ëd lë Spirit, a cheujerà la vita eterna ch’a ven da lë Spirit. 6:9 Stracomse nen ëd fé ‘l bin, përchè s’is lassoma nen straché, quand ch’a rivrà ‘l temp i cheujeroma. 6:10 Parèj, donca, damentre ch’i n’oma ‘l temp, foma ‘d bin a tuti, ma dzurtut a coj ch’a son ëd la famija dla fèj.

Ciusa

6:11 Armarché con che létere grande i l’hai scrivù coste paròle: a son pròpi ëd mia man. 6:12 A l’é mach për fé bela figura dëdnans a j’àutri2 ch’a vorìo forseve a ch’i sie sogetà a la sirconcision. Soa ùnica intension ëd lor a l’é d’esse nen përseguità për càusa dla cros ëd Crist. 6:13 An efet, coj j’istess ch’a pratico la sirconcision a osservo nen tuta la lej. Lor a vorìo ch’i sie sogetà a la sirconcision për podèss-ne vanté e dì che vojàutri i seve ij sò dissépoj. 6:14 Për lòn ch’am riguarda, che mi i l’abia ‘d vanteme mach ëd la cros ëd Nosgnor Gesù Crist. Për motiv ëd la cros, mè anteresse an cost mond a l’é stàit butà an cros, e l’anteresse che ‘l mond a l’ha për mi a l’é ‘dcò mòrt. 6:15 Përchè a conta pròpi gnente d’esse stàit sugetà a la sirconcision o nò; a conta mach ch’i soma na neuva creassion.

6:16 Che la pas e la misericòrdia a sio dzora tuti coj ch’a vivo confòrm a sto prinsipi-si: a son lor l’Israel ëd Nosgnor. 6:17 Da ora anans, che gnun am daga ‘d fastidi, përchè i pòrto an mè còrp le marche dle ferije ch’a mostro ch’i son ëd Gesù Crist.

6:17 Car ij mè frej e seur, che la grassia ‘d Nosgnor Gesù Crist a sìa con vòst spirit. Amen!

Nòte

1 O “chi seve spirituaj”.

2 O “për dij motiv carnaj”.

Comments