Matè 3

3

Predicassion ëd Gioann Batìsta

3:1 Ora, ant col temp-là a-i é vnùje ant ël desert ëd la Giudèa Gioann Batista e a l’ha comensà a prediché. 3:2 So mëssagi a l’era: “Pentive dij vòsti pëccà, përchè ‘l Regn dij céj a l’é fasse press1” , 3:3 Ëd Gioann a parlava ‘l profeta Isaìa, quand ch’a disìa: “A l’é la vos d’un ch’a crija ant ël desert: ‘Pronté la strà ‘d Nosgnor, spiané ij sò vieuj’”.

3:4 Gioann a l’era vestì con na vestimenta antërsùa ëd pèil grossé ‘d gamel e na sëntura ‘d coram antorn ai fianch. So mangé a l’era ‘d cravëtte e d’amel sarvaj. 3:5 A andasìo a trovelo ‘d gent ëd Gerusalem, da tuta la Giudèa e da tuta la region dël Giordan; 3:6 a-j confessavo ij sò pëcà ‘d lor e as fasìo batesé da chiel ant ël fium Giordan.

3:7 Ma quand ch’a vëddìa diversi Farisé e Sadducé ch’a vnisìo ‘dcò lor a fese batesé, Gioann a l’ha dije: “Rassa ‘d vipre ch’i seve! Chi é-lo ch’a l’ha avertive dë schivié ël giudissi2 ch’a l’é press a ven-e? 3:8 Dimostré, donca, con lòn ch’i feve ch’i seve pentive përdabon dij vòstri pëccà3. 3:9 A l’é nen pro ch’i dise j’un a j’àutri: ‘I l’avoma Abraham për pare’, përchè iv diso che Nosgnor a podrìa fé seurte4 magara da ste pere-sì dij fieuj d’Abraham. 3:10 Ora l’àpia a l’é già butà a la rèis ëd j’erbo, ëd manera che minca d’erbo ch’a fà nen ëd bon frut a va a esse tajà e campà ant ël feugh. 3:11 Për mi, iv bateso d’eva an segn ëd pentiment; ma col ch’a ven apress a mi a val pì5 che mi, i son gnanca degn ëd porteje soe sàndole: a sarà col-là ch’av batësrà dël Spirit Sant e dël feugh. 3:12 A l’ha sò val an man e a farà soa àira neta ‘d pianta, e a ambaronrà sò furment ant ël grané, ma a farà brusé la paja al feu ch’as dëstissa mai pì.

Batesim ëd Gesù

3:13 Antlora a l’é vnuje Gesù da la Galilea al Giordan, vers Gioann, për esse batesà da chiel. 3:14 Ma Gioann as parava fòrt an disandije: “A l’é mi ch’i l’hai da manca d’esse batesà da ti, e ti ‘t ven-es da mi?”. 3:15 E Gesù, rëspondendje, a l’ha dije: “Lass-me fé për adess; përchè parèj i l’oma da compì tut lòn ch’a Nosgnor a veul6”, e antlora Gioann a l’ha lassalo fé. 3:16 E quand che Gesù a l’é stàit batesà e a l’é sùbit seurtì apress da ‘nt l’eva, ël cél a l’é duvertasse e chiel a l’ha vëddù lë Spirit ëd Nosgnor ch’a calava giù tanme na colomba ch’a l’é vnuje acòl. 3:17 E na vos a l’ha dit dal cél: “Sto-sì a l’é mè Fieul, ch’a-j veuj tant bin: a l’é ‘d chiel ch’i son compiasume.

Nòte

1O “davzin”, “a la portà ‘d man”.

2O “l’ira” (‘d Nosgnor).

3O “Fé donca d’euvre ch’a vado d’acòrdi con ël pentiment”.

4O “nasse”.

5O “a l’é pì fòrt”.

6O “minca giustissia”.

Comments