Gioann 12

Capìtol 12

L'onsion ëd Gesù

12:1 Gesù, donca, ses di prima ch'a comensèisso le selebrassion ëd la Pasqua, a l'é rivà a Betania, andoa ch'a stava Lazàr - l'òm ch'a l'avìa arsussità dai mòrt. 12:2 A l'avìo prontaje na sin-a an Sò onor. Marta a servìa e Lazàr a l'era tra 'd coj ch'a j'ero a tàula con Chiel. 12:3 Antlora Maria a l'ha ciapà na livra d'unguent d'odor ëd grand valor, fàit con l'essensa 'd nard, a l'ha onzune ij pé 'd Gesù e a l'ha suvaje con ij sò cavèj1. A l'é parèj che la ca a l'é 'mpinisse 'd cola fragransa.12:4 Antlora Giuda Iscariot, ël dissépol ch'a l'avrìa bin tòst tradilo, a l'ha dìje: 12:5 "Përchè col përfum é-lo nen stàit vendù për tërzent dné, e col arzàn dàit ai pòver?". 12:6 Ora Giuda a disìa lòn nen përchè a volèissa pijesse soagn dij pòver, ma përchè a l'era 'n lader e ch'a tenìa la borsa dl'arzan e a na portava vìa për chiel medèsim ëd lòn ch'a-j butavo. 12:8 Ma Gesù a l'ha dije: "Lassla fé. A l'ha fàit lolì an preparassion ëd mia sepoltura. 12:8 I l'avreve sèmper ëd pòver ansem a voi, ma mi i m'avreve pa sèmper!2".

12:9 E 'n grand trop ëd Giudé, quand ch'a l'ha savù dla vnùa d' Gesù, a son rivà nen mach për vëdde Chiel, ma 'dcò për vëdde Lazàr, l'òm ch'a l'avìa 'rsussità dai mòrt. 12:10 A l'é stàit antlora che ij cap dij sacerdòt a l'han pijà la decision ëd fé massé 'dcò Lazàr, 12:11 përchè a l'era për motiv ëd chiel che tanti dël pòpol a 'ndasìo pì nen da lor ma a chërdìo an Gesù.

L'intrada trionfal

12:12 A l'indoman na gran furfa 'd pòpol, ch'a l'era vnùa a la festa, coma ch'a l'ha sentì che Gesù a vënìa a Gerusalem, 12:13 a l'han ciapà 'd ramuliva3 e a son andaje 'ncontra an sla stra. A crijavo: "Osanna!4 Ch'a sìa benedet col ch'a ven ant ël nòm dël Signor, ël Rè d'Israel!"5. 12:14 Gesù a l'ha trovà n'asnèt, a l'é setassje adòss, confòrma lòn ch'a l'é scrit: 12:15 "Avèj nen tëmma, ò pòpol6 ëd Gerusalem, varda tò rè ch'a ven, setà 'n sù l'asnèt ëd na sòma!"7. 12:16 An col moment-là, ij Sò dissépoj a l'avìo nen capì ch'as tratava d'un compiment ëd la professìa, ma quand che Gesù a l'é stàit glorificà, a l'é 'ntlora ch'a son arcordasse 'd lòn ch'a l'era rivà, e a son rendusse cont che ste còse a l'ero stàite scrite a Sò rësguard.

12:17 Tanti ant cola furfa a l'avìo vëddù Gesù ciamé Lazàr ëd ven-e fòra da la tomba e a seguitavo a rendje testimoniansa an parlandne a dj'àutri. 12:18 A l'era për cola rason-lì che la gent a a sercava d'ancontrelo, përchè a l'avìo sentì 'd col segn miracolos. 12:19 Antlora ij farisé a son butasse a dì an tra 'd lor: "A-i é pì gnente ch'i podoma fé. Vardé: tuti a-j van dapress".

J'arsercateur

12:20 Ora, an tra 'd coj ch'a l'ero montà pr' adoré 'l Signor a la festa, a-i ero 'dcò dij Grech. 12:21 A son vnù da Flip a feje na visita, përch' a savìo che Chiel a l'era da Betsàida an Galilea. A l'han dije: "Monsù, i vorìo tant ëd podèj ancontré Gesù!". 12:22 Flip a l'ha dijlo a Andrea, e Andrea e Flip a son andàit a fejlo savèj a Gesù. 12:23 E Gesù a l'ha rësponduje: "L'ora a l'é vnùa ch' ël Fieul ëd l'òm a l'ha da intré ant Sua glòria8. 12:24 An vrità iv diso: 'Se la gran-a 'd forment, quand ch'a tomba 'nt tèra, a meuir nen, a resta tuta sola; tutun, s' a meuir, a porta 'd frut bondos. 12:259 Coj ch'as ambranco a soa vita 'd lor an sla tèra, a la perdran, ma coj ch'a son dispòst a perdla, a la goerneran për la vita eterna. 12:26 Se quajdun a veul esse mè dissépol a venta ch'am séguita, përchè ij mè sërvitor a deuvo esse là 'nté ch'i son mi. Ël Pare a rendrà onor a col ch'am serv.

12:27 Për adess l'ànima mia a l'é conturbà. Còs é-lo chi l'hai da di? Pare, salvame da cost' ora? Ma 'l motiv ëd mia vnùa a l'era propi col ëd rivé a cost' ora! 12:28 Pare, glorifica Tò nòm". Antlora na vos a l'é vnùa dal cel ch'a disìa: "I l'hai già glorificalo e i lo glorificherai ancora!". 12:29 Quand che la gent ch'a-i era là a l'ha sentì sta vos, a disìa ch'a l'era stàit un tron; d'àutri, tutun, a disìo: "N'àngel a l'ha parlaje!". 12:30 Antlora Gesù a l'ha dije: "Sta vos a l'é nen vnùa për mi, ma për vojàutri!". 12:31 A l'é rivà 'l moment ëd la condan-a 'd cost mond: adess Sàtana, ël prinsi 'd cost mond, a na sarà campà fòra! 12:32 Mi, peui, quand ch'i sarai levà da la tèra, i tirerai tuti a mi". 12:33 Ora, Gesù a disìa lòn për mostré 'd che manera chiel a l'avìa da meuire.

12:34 La furfa a l'ha rësponduje: "Nojàutri i savoma dai liber ëd la Lej che 'l Messia a vivrà për sèmper10. Coma va-lo donca ch'it dise ch'a venta ch' ël Fieul ëd l'òm a dovrà meuire11? Chi é-lo cost Fieul ëd l'òm?". 12:35 Gesù a-j rëspond: "La lus a starà 'ncora për pòch an tra 'd voi. Marcé antant ch'a-i é la lus, për tëmma d'esse pijà a l'improvista da la scurità, përchè col ch'a marcia 'd neuit a peul nen vëdde anté ch'a va! 12:36 Fideve12 ant la lus, antant ch'i l'eve, e i vnireve 'd fieuj 'd lus." Gesù a l'ha dit ste còse e peui a l'é 'ndassne, e a l'é stërmasse da lor.

Predission dj'arzultà dël ministeri 'd Gesù

12:37 Bin ch'a l'avèissa fàit vàire 'd segn miracolos an presensa 'd lor, la pì part ëd la gent ancor' a vorìa nen chërdje. 12:38 Sossì a l'era precis lòn ch' ël profeta a l'avìa dit: "Signor, chi é-lo ch'a l'ha chërdù a nòstra paròla, e a chi é-lo ch' ël brass poderos dël Signor a l'é stàit arvelà?"13. 12:39 Ël pòpol a podìa nen chërde përchè, com' ancora a disìa Isaia: 12:40 "Ël Signor a l'ha 'mborgnaje j'euj e a l'ha faje dventé dur ël cheur. A l'é për lòn ch' ij sò euj 'd lor a-i s-ciairo nen e ij sò cheur ëd lor a capisso pa: përchè a sio nen convertì e ch'a varisso nen"14. 12:41 Isaia a fasìa riferiment a Gesù quand ch'a l'avìa dit sossì, përchè a vëdìa le còse a vnì e a parlava dla glòria del Messia.

12:42 Contut, a son stàit tanti ch'a l'han chërdù an Chiel, comprèis quajdun dij cap dij Giudé. A l'ero, tutun, nen dispòst a confësselo përchè a l'avìo tëmma dij farisé ch'a l'avrìo poduje campé fòra da la sinagòga. 12:43 An efet, a l'avìo pì cara l'aprovassion ëd j'òm che l'aprovassion ëd Dé.

Le paròle pùbliche finaj 'd Gesù

12:44 Ora, Gesù a vos àuta, a l'ha dit: "Col ch'a chërd an mi, a chërd nen mach an mi, ma an Col ch'a l'ha mandame, 12:45 Përchè quand ch'im vëdde, i vëdde Col ch'a l'ha mandame. 12:46 I son vnù tanme na lus ch'a splendriss ant cost mond sombr, tant che coj ch'a chërdo 'n mi a resto pì nen ant lë scur. 12:47 Tuti coj ch'a sento mie paròle e a-j chërdo pa, i-j condano nen, përchè mi i son nen vnù për condané 'l mond, ma për salvelo. 12:48 Tutun, tuti coj ch'a 'rfudo mi e mie paròle, a l'han già chi ch'a-j condan-a: a l'é la paròla ch'i l'hai daje. A sarà cola-lì ch'a-j condanrà ant ël Dì Darié. 12:49 Përchè i l'hai nen parlà për mia autorità: a l'é 'l Pare ch'a l'ha mandame ch'a l'ha comandame 'd dì lòn ch'i diso e coma ch'i l'hai da dilo. 12:50 I sai che ij Sò comandament a men-o a la vita eterna: a l'é për lòn ch'i diso tut lòn ch'a l'ha dime 'l Pare".


1 Luca 7:37-38.

2 Deuteronòmi 15:11.

3 O "frasche 'd palma".

4 O "Làuda a Dé!". Salm 118:25 (Ebr.).

5 Salm 118:26.

6 O "fija".

7 Zacarìa 9:9.

8 O "a l'ha da esse glorificà".

9 Maté 10:39; 16:25; March 8:35; Luca 9:34; 17:33.

10 Salm 110:4; Isaìa 9:7; Ezechiel 37:25; Daniel 7:14.

11 O "esse levà".

12 O "chërde".

13 Isaìa 53:1.

14 Isaìa 6:10.



À à È è É é Ì ì Ò ò Ó ó Ù ù Ë ë
Comments