B - Testament Neuv‎ > ‎Efesin‎ > ‎

Efesin 2

Capìtol 2

Da la mòrt a la vita

2:1 A-i era 'n temp che vojàutri i j'ere mòrt1 për motiv ëd vòstra disubidiensa e ij tanti vòstri pecà. 2:2 I l'avìe pijà l'andi 'd vive ant ël pecà, second ch'as costuma ant cost mond-sì, e i scotave mach ël diav, ch'a l'é 'l comandant2 dle potense dël mond invisìbil3. A l'é chiel lë spirit ch'as dà tant da fé ancheuj ant ij cheur ëd coj ch'as arfuso 'd rende ubidiensa a Dé4. 2:3 Tuti nojàutri na vira i vivìo 'dcò parèj: i seguitavo mach j'anvìe passionaj e j'inclinassion ëd nòstra natura 'd pecator. I j'ero 'd natura l'oget ëd l'ira 'd Dé, tanme tuti j'àutri. 3:4 Dé, contut, ch'a l'é rich an misericòrdia e ch'an veul tant bin, 2:5 bele s' i j'ero mòrt për motiv ëd nòstri pecà, a l'ha dane vita quand ch'a l'ha 'rsussità Crist dai mòrt. (A l'é mach për la grassia 'd Dé ch'i seve stàit salvà!). 2:6 Chiel a l'ha fane arviscolé5 ansema a Crist e l'ha fane sté setà con Chiel ant ij cej, përchè a l'ha butane 'n comunion con Gesù Crist. 2:7 A l'é parèj che Dé a l'ha rendune l'esempi da mostré a le generassion ch'a vniran ëd la richessa sensa paragon ëd Soa grassia e bontà anvers a nojàutri, coma ch'a l'é mostrà ant lòn ch'a l'ha fàit për noi an Crist Gesù. 2:8 Dé a l'ha salvave për grassia quand ch' i l'eve chërdù6: a l'é nen quejcòsa ch'i l'eve merità an quaj manera7, ma a l'é 'n don che Dé a l'ha fave. 2:9 La salvëssa a l'é nen n'arcompensa për avèj fàit cheicòs 'd bon8: gnun a peul vantesne! 2:10 A l'é Chiel ch'a l'ha fàit cheicòs 'd neuv an nojàutri: a l'ha torna creane in Crist Gesù, parèj ch'adess i podoma fé 'd còse bon-e, cole che Chiel a l'a prontà tant temp fa përchè i-j fèisso.

Un pòpol sol an Crist

2:11 Dësmentieve nen che na vira vojàutri i fasìe nen part dël pòpol ëd Dé. I j'ere considerà dai Giudé, ch'as vanto 'd soa circoncision ëd lor, dij pagan ch'as sugeto nen a circoncision, ma la soa a l'é cheicòs ch'a rësguarda mach la carn e nen ël cheur. 2:12 Ant coj dì là i vivìe separà dal Crist. I j'ere feura dai privilegi dla sitadinansa dël pòpol d'Israel e i conossìe nen le promësse dl'Aleansa che Dé a l'ha fàit con lor. I vivìe ant cost mond sensa Dé e sensa speransa.2:13 Adess, nopà, i seve stàit butà 'n comunion con Gesù Crist. Na vira i j'ere lontan da Dé, ma adess i seve stàit avzinà a Chiel pr' ël mojen dël sangh ëd Crist. 2:14 A l'é stàit Crist midem a porté la pas antra 'd noi. Chiel a l'ha gionzù Giudé e coj ch'a lo son nen ant un pòpol ùnich quand, ant sò còrp an sla cros, Chiel a l'ha campà giù ël mur ëd nimicissia ch'an dividìa 2:15 A l'ha falo quand ch'a l'ha portà a la fin ël sistema 'd lej con ij sò comandament e nòrme9. A l'ha portà la pas antra ij Giudé e coj ch'a lo son nen quand ch'a l'ha creà ant Chiel medésim, dai doi grup, un pòpol ùnich. 2:16 Ansema an un còrp ùnich, Crist a l'ha 'rconsilià10 a Dé un e l'àutr grup pr' ël mojen ëd Soa mòrt an sla cros, e la nimicissia ch' i l'avìo un contra l'àutr a l'é stàita butà a mòrt. 2:17 Chiel a l'ha portà costa bon-a neuva 'd pas a vojàutri, chi seve nen ëd Giudé e ch' i j'ere motobin lontan da Dé11, e pas ai Giudé ch'a na j'ero davzin. 2:18 Adess tuti nojàutri i podoma ven-e al Pare pr' ël mojen dël medésim Spirit Sant, për motiv ëd lòn che Crist a l'ha fàit për nojàutri. 2:19 A l'é për lòn che adess vojàutri, ch'i seve nen ëd Giudé, i seve pi nen strangé e foresté. I seve 'd sitadin ansema a tut ël sant pòpol ëd Dé. I seve mèmber dla famija 'd Dé. 2:20 Ansema, i soma Soa ca, edificà an sle fondassion dj'apòstoj e dij profeta. Crist Gesù medésim a n'é la pera dël canton. 2:21 I soma butà 'nsema con deuit për dventé 'n tempi sacrà pr' ël Signor 2:22 Për Sò mojen vojàutri ch'i seve nen ëd Giudé i seve 'n camin pr' esse la residensa andoa Dé a viv pr' ël mojen ëd Sò Spirit.

Nòte

1 Colossèis 2:13.

2 O "prinsi".

3 O "potense 'd l'ària".

4 O let. "ij fieuj dl'incredulità", o "dij rivoltos".

5 O “arsussité”.

6 O "për la fej".

7 O "ch'a ven da vojàutri".

8 O "për ëd bon-e euvre".

9 Colossèis 2:14.

10 Colossèis 1:20.

11 Isaia 57:19.

À à È è É é Ì ì Ò ò Ó ó Ù ù Ë ë
Comments