B - Testament Neuv‎ > ‎Efesin‎ > ‎

Efesin 1

Salùt

1:1 Pàul, apòstol ëd Gesù Crist për volèj 'd Dé, ai sant ch'a son a Efeso1, fidej dissépoj ëd Gesù Crist. 1:2 Che la grassia e la pas av sio dàite da Dé nòst Pare e dal Signor Gesù Crist.

Benedission spirituaj an Crist

1:3 Ch'a sìa benedì Dé, Pare 'd Nosgnor Gesù Crist, ch'a l'ha benedine d'ògni benedission spiritual dël Cel an Crist,1:4 përchè Chiel a l'ha sernune an Crist prima dla fondassion dël mond, parèj ch'i fusso sant e sensa rimpròcc dëdnans a Chiel për l'amor2. 1:5 Dé a l'ha falo quand ch'a l'ha predestinane a l'adossion coma Sò arditè legaj3 pr' ël mojen ëd Gesù Crist, conforma la compiasensa 'd Sò volèj, 1:6 a la làuda dla glòria 'd Soa grassia, cola ch'a l'ha acordane an Sò car Fieul4. 1:7 An Chiel i l'oma la redension për Sò sangh5, ël përdon dij nòstri pecà second le richësse 'd Sòa grassia6, 1:8 cola ch'a l'ha dane sensa mzura con ògni sapiensa e inteligensa. 1:9 Dé a l'ha falo quand ch'a l'é compiasusse 'd fene conòsse 'l misteri 'd Sò volèj, col ch'a l'avìa proponusse 'd realisé an Crist. 1:10 Sossì a l'é 'l proponiment: quand che 'l temp adatt7 a fussa rivà, chiel a l'avrìa 'rcapitolà8 tut an Crist, tant lòn ch'a-i é ant ij cej, che lòn ch'a l'é an sla tèra. 1:11 An Crist, ëdcò nojàutri i soma stàit reclamà9 coma 'd gent ëd Soa pertinensa10, dàit ch'i soma stàit predestinà conforma 'l propòsit ëd Col ch'a compiss ògni còsa second ij sò proget11, 1:12 parèj che nojàutri, ch'i soma stàit ij prim a speré an Crist, a l'avèisso portà 'd làuda e 'd glòria a Dé12. 1:13 A l'é për lòn che quand ch'i l'eve sentù la paròla dla vrità, l'evangeli 'd vòstra salvëssa, e ch'i l'eve chërdù an Crist, i seve stàit marcà con ël cacèt dlë Spirit Sant ch'a l'era stàit promëttù13. 1:14 A l'é Chiel la capara14 'd nòstra ardità, fin-a a la redension completa ëd lòn ch'a l'é dël Signor, a la làuda 'd Sòa glòria15.

Preghiera për saviëssa e arvelassion

1:15 Për costa rason, përch' i l'hai sentù 'd vòstra fej ant ël Signor Gesù e dl'amor ch'i l'eve për tùit ij sant, 1:16 i chito nen ëd rende grassie, an mie orassion, për tuti vojàutri. 1:17 I prego për che 'l Dé ëd Nosgnor Gesù Crist, ël Pare glorios, av daga 'd saviëssa spiritual e d'arvelassion për conòss-lo sèmper ëd pì16 1:18 - dàit che j'euj 'd vòstr cheur a son stàit anluminà - parèj ch'i conòsse la speransa 'd Soa vocassion, la richëssa dla gloriosa 'rdità ch' ij sant a 'rseivran, 1:19 e qual ch'a sìa la grandëssa feura 'd misura 'd Soa potensa, anvers a noi ch'i chërdoma, coma ch'a l'é mostrà ant l'esercissi ëd Soa inmensa fòrsa. 1:20 Costa potensa Dé a l'ha manifestala an Crist, quand ch'a l'ha arsussitalo dai mòrt e a l'ha falo anseté a Soa drita ant ij cej, 1:21 an àut, tant pì dzura d'ògni prinsipà, potensa, dignità, dominassion, e dzora d'ògni nòm ch'as peussa nominesse, nen mach an cost temp-sì17, ma 'dcò an coj ch'a l'han a vnì. 1:22 An efet, Dé a l'ha butà18 tute le còse sot' ij pé 'd Crist19, e a l'ha stabilìlo an sù tute le còse pr' esse 'l cap dla Cesa20. 1:23 Ora la Cesa a l'é Sò còrp, ël compiment ëd Col ch'a 'mpiniss tut con Soa presensa21.

Nòte

1 Efeso: At 18:19-21; 19:1.

2 O "ant l'amor".

3 O "fieuj". Ël tèrmin grech υἱοθεσία (huiothesia) a l'era 'n tèrmin tecnich legal tacà a l'adossion ëd fieuj con ël pien drit a l'ardità.

4 O "ch'a tant a-j veul bin", let. "Sò Dilet".

5 An sto contest, Sò sangh, ël sangh ëd Gesù Crist, as arfà al pressi pagà për la redension dij cristian, visadì la mòrt sacrifical ëd Crist an sla cros.

6 Colossèis 1:14.

7 O "ël compiment dij temp". A l'é Dé ch'a l'ha la "gestion" o "l'aministrassion" dla stòria e quand che Chiel a decid ch' ij temp a saran mur, a sugetrà tut a Crist, coma "cap" d'ògni còsa.

8 O "riunì", "cheuje ansema".

9 O "arvendicà".

10 O "Soa ardità".

11 O "ël consèj ëd sò volèj".

12 O "a fusso a la làude 'd Sòa glòria".

13 O "dla promëssa".

14 O "l'anticip", "l'ara".

15 Ël dì dël compiment final ëd nòstra salvëssa, ël dì anté Dé a tornerà a esse padron ëd lòn ch'a l'é Sò, visadì nojàutri chërdent.

16 O "an na conossensa chërsent ëd Chiel".

17 O "secol", "era".

18 O "sogetà".

19 Salm 8:6.

20 Colossèis 1:18.

21 O "ch'a compiss tut an tùit".

À à È è É é Ì ì Ò ò Ó ó Ù ù Ë ë
Comments