B - Testament Neuv‎ > ‎Ebreo‎ > ‎

Ebreo 5

Ebreo 5

5:1 Minca gran' sacerdòt a l'é n'òm sernù ch'as buta dë 'dnans a Dé an rapresentansa dla gent. Chiel a presenta a Dé le soe oferte e ij sò sacrifissi 'd lor për la remission dij pecà. 5:2 A l'é n'òm ch'a sa pro d'avèj compassion ëd coj ch'a fan ëd pecà d'ignoransa e ch'a falisso, përchè chiel medésim a l'é soget a l'istesse dëbolësse ch'a l'han lor. 5:3 A l'é për lòn che chiel a deuv ufrì 'd sacrifissi nen mach pr' ij pecà dël pòpol, ma 'dcò pr' ij sò. 5:4 Peuj, gnun a peul ëvnì gran' sacerdòt mach përchè a veuja 'n tal onor. Pr 'un servissi parèj, a-i fà da bzògn ëd na vocassion divin-a [1] pròpi coma ch'a l'ha avula Aaron. 5:5 A l'é 'dcò për lòn che 'l Crist a l'ha nen atribuìsse la glòria d'esse 'n gran' sacerdòt. Nò, a l'é stàit sernù da Dé, ch'a l'ha dije: "Ti 't ses mè fieul. Ancheuj i son dventà tò Pare" [2]. 5:6 Ant n'àutr pass i trovoma che Dé a l'ha dije: "Ti 't ses sacerdòt për sèmper second l'òrdin ëd Melchisedech". 5:7 Ël Crist, durant soa vita mortal, as adressava a Dé, ch'a podìa salvelo da la mòrt, an pregandlo e suplicandlo con ëd grand crij e lerme. Dé a l'ha scotà soe preghiere për motiv ëd soa divossion ancreusa. 

5:8 Combin che Gesù a fussa 'l Fieul ëd Dé, a l'ha 'mprendù l'ubidiensa dai patiment ch'a l'ha avù. 5:9 A l'é për lòn che Dé a l'ha diciaralo dël tut qualificà pr' esse 'n përfet gran sacerdòt, tant ch'a l'é dventà la sorgiss dla salvëssa eterna për tuti coj ch'a-j ubidisso. 5:10 Dé a l'ha proclamalo grand sacerdòt second l'òrdin ëd Melchisedech.

La necessità dla madurassion spiritual

5:11 Noi i l'avrìo 'ncora tante còse da dìve an st'argoment-sì, m' a son dificil da spiegheje përch' i seve dventà pitòst gargh e a smija ch'i scote nen. 5:12 I seve cristian da tant temp e i dovrìe ess-ne già 'd magister. Al contrari, i l'eve 'ncora da manca che quejdun av mostra l'abecé [3] al rësguard ëd la paròla 'd Dé. I seve 'me 'd masnà ch'a l'han da manca 'd làit e ch'a peudo nen mangé dj'aliment sòlid! 5:13 An efet, coj ch'as nutrisso mach ëd làit a son ancora 'd masnà e a san nen coma ch'as deuva fé lòn ch'a l'é giust [4]. 5:14 J'aliment sòlid a son për ëd gent chërsùa che, grassie a l'esperiensa, a san com' arconòsse la diferensa an tra 'd lòn ch'a l'é giust e lòn ch'a l'é fàuss [5].

Nòte
  • [1] O "a l'ha da manca d' esse ciamà da Dé".
  • [2] O "It l'hai generate".
  • [3] O "le còse 'd base"
  • [3] Let. "a san nen còs' a sìa la paròla dla giustissia".
  • [4] O "disserne 'l bin dal mal".

À à È è É é Ì ì Ò ò Ó ó Ù ù Ë ë
Comments