B - Testament Neuv‎ > ‎At‎ > ‎

At 8

Saul a përséguita la cesa

8:1 Ora Saul a l'era un ëd coj ch'a l'avìo aprovà la mòrt ëd Stevo. An col temp-lì a l'ha prinsipià na granda përsecussion contra la cesa ch'a l'era a Gerusalem, e tuti, fòra dj'apòstoj, a son dësbërgiairasse për ij teritori dla Giudea e dla Samarìa. 8:2 Dj'òm timorà 'd Dé a l'han portà vìa 'l còrp ëd Stevo për sotrelo e a l'han fàit un gran' deul për chiel. 8:3 Ma Saul a fasìa 'd ravagi ant la cesa [1]. A intrava an tute le ca dij cristian e, an rabland për fòrsa òm e fomne, a-j butava an përzon. 8:4 Coj-lì, donca, ch'a l'ero stàit dësbërgiairà, a 'ndasìo dëdsa e dëdlà an nunsiand la Paròla [2] 'd  Nosgnor.

Flip a prédica an Samarìa

8:5 Flip, essend calà giù 'nt na sità dla Samarìa, a l'ha predicaje 'l Mëssìa [3]. 8:6 A-i era 'd sòlit na pien-a 'd gent ch'a fasìa atension a lòn ch'a disìa Flip përch' a l'avìo l'anvìa 'd scoté sò messagi e 'd vëdde ij segn miracolos ch'a fasìa. 8:7 Jë spirit maléfich a sortìo an crijand fòrt da tanti ch'a na j'ero ampossessà e motobin ëd paralìtich e 'd sòp a son stàit varì. 8:8 A càusa 'd lòn a-i é staje na granda gòj an cola sità.

8:9 Ora a-i era prima 'nt la sità n'òm për nòm Simon ch'a praticava la magìa e ch'a fasìa sté a boca doverta 'l pòpol dla Samarìa. As fasìa passé për un grand përsonagi. 8:10 Tuti, dai pì cit ai pì grand, a parlavo dëspèss ëd chiel e a disìo: "Sto-sì a l'é pròpi 'n Grand - la Potensa 'd Dé!". 8:11) A-i dasìo da ment përchè da longa a j'avìa sbalucaje con soe art màgiche. 8:12) Ora, però, la gent a credìa a Flip, ch'a l'avìa nunsiaje la bon-a neuva dël Regn ëd Nosgnor e dël nòm ëd Gesù Crist e tanti a l'avìo fasse batesé, sìa d'òm che fomne. 8:13 Fin-a col Simon a l'ha chërduje e, dòp d'esse stàit batesà 'dcò chiel, as bogiava pi nen da vzin a Flip, e, an vëdend ij gran' prodigi e segn miracolos che Flip a fasìa, a l'era squasi fòra 'd chiel. 

8:14 Ora, quand che j'apòstoj ch'a l'ero a Gerusalem a l'han sentù che la Samarìa a l'avia 'rseivù la Paròla 'd Dé, a l'han mandaje Pé e Gioann. 8:15 A son andaje e a l'han pregà pr' ij samaritan përchè a 'rseivèisso lë Spirit Sant. 8:16 An efet, lë Spirit Sant a l'era 'ncora nen calà 'nsima a loràutri, ma a l'ero mach ëstàit batesà ant ël nòm ëd Gesù, ël Signor. 8:17 Antlora Pé e Simon a l'han faje l'imposission ëd le man, e lor a l'han arseivù lë Spirit Sant. 8:18 Quand che Simon a l'ha vëddù che lë Spirit Sant a l'era dàit për l'imposission ëd le man dj'apòstoj, a l'ha ufrìje d'arzan e a l'ha dije: 8:19 "Deme 'dcò a mi col podèj, ch' a tuti coj ch'imponerai le man a 'rsèivo lë Spirit Sant!". 8:20 Ma Pé a l'ha dije: "Che tò dné a perissa con ti, dagià ch'it l'has stimà ch'ël don ëd Dé a peussa esse catà a pèis d'argent! 8:21 I l'oma pròpi gnente da spartì con ti an cost afé [4] përchè toa disposission d'ànim a l'é tuta sbalià [5]. 8:22 Arconòss, donca, tò pecà, cambia manera 'd pensé [6] e prega Nosgnor: a peul esse che chiel a përdonrà toe intension [7]. 8:23 I vëddo che ti 't ses pien ëd na gelosia amèra [8] e ch'it ses ancadnà da la gramissia". 8:24 Antlora Simon a l'ha rispondù: "Preghé vojàutri al Signor për mi, përchè ch'am càpita gnente dle còse ch'i l'eve dit". 

8:25 Pé e Gioann,donca, dòp d'avèj predicà e nunsià la Paròla dël Signor, an tornand a Gerusalem, a l'han nunsià la bon-a neuva an diverse borgià dij samaritan.

Flip e l'eunuch  dl'Etiòpia

8:26 Peuj n'àngel dël Signor a l'ha parlà a Flip disandije: "Levte sù e va vers ël mesdì an sla stra ch'a cala da Gerusalem a Gaza, cola ch'a passa për un desert. 8:27 Antlora Flip a l'é'ncaminass-ne. Arlongh la stra a l'ha 'ncontrà n'eunuch etìop, n'àut fonsionari e tresoré 'd Candace, la regin-a d'ìEtiopia. A l'era vnù an pelerinagi a Gerusalem 8:28 e adess as na tornava a soa ca. A l'era setà an sò biròcc e 'n camin ch'a lesìa a àuta vos dal liber dël profeta Isaìa. 8:29 Lë Spirit a l'ha dit a Flip: "Fate anans e avzinte a col biròcc". 8:30 E Flip, essendje coruje davzin, a l'ha sentulo ch'a lesìa 'l profeta Isaia, e a l'ha dije: "Ma... capisses-to lòn ch'it lese?". 8:31 E col-lì a l'ha replicà: "Ma com é-lo ch'i podrìo capilo, s'a-i é gnun ch'am na dà dë spiegassion? [9]". 8:32 Orar ël pass ëd la Scritura ch'a lesìa a l'era sto.sì: "Tanme na feja portà al masel o tanme 'n agnel mut dëdnans a col ch'a lo tosona, chiel a l'ha nen dovertà la boca. 8:33) A l'é stàit umilià e a l'han nen faje giustissia. Chi é-lo ch'a conterà 'd sò dissendent? Perché soa vita a l'é stàita portà via da la tèra". 8:34 Antlora l'eunuch a l'ha ciamà a Flip: "Dime: dë chi é-lo che 'l profeta a dis lòn? É-lo 'd chiel medésim, o 'd quejdun d'àutr?". 8:35 A l'é parèj che Flip, an prinsipiand da sto pass ëd la Scritura, a l'ha nunsiaje la bon-a neuva 'd Gesù Crist. 

8:36 Antant ch' a seguitavo an sla stra, a son rivà ant un leugh andoa ch'a j'era d'eva, e l'eununch a la dije: "Varda là ch'a-i é d'eva. Còs é-lo ch'a podrìa fé d'oposission che mi i sio batesà?". 8:37) [E Flip a l'ha dit: "Se ti't chërde dë tut tò cheur, it lo peude". E chiel a l'ha replicà: "Mi i chërdo che Gesù Crist a l'é 'l Fieul ëd Dé"]. 8:38 Antlora l'eunuch a l'ha fàit fërmé 'l biròcc, a son calà tuti doi ant l'eva e Flip a l'ha batësalo.

8:39 Quand ch'a son sortì da l'eva, lë Spirit ëd Nosgnor a l'ha portà via Flip, e l'eunuch a l'ha pì nen vëddulo, e tut alégher a l'ha seguità soa stra. 8:40 Flip a s'é trovasse a Ashdod. Da lì a l'ha seguità fin-a a Cesarea, nunsiand la bon-a neuva për tute le borgià anté ch'a passava.

Nòte
  • [1] O "a consentìa a la mòrt ëd Stevo".
  • [2] O "la bon-a neuva dla Paròla".
  • [3] O "ël Crist".
  • [4] O "Ti 't l'has gnun-a art né part an costa question" ["οὐκ ἔστιν σοι μερὶς οὐδὲ κλῆρος ἐν τῷ λόγῳ τούτῳ"], cfr. https://sites.google.com/site/tempodiriforma/articoli-1/atti-821
  • [5] O "tò cheur a l'é nen a pòst dëdnans a Dé".
  • [6] O "pentite".
  • [7] O "ël pensé 'd tò cheur".
  • [8] O "pien ëd fel amèr".
  • [9] O "am fà da guida", "am lo mostra".

À à È è É é Ì ì Ò ò Ó ó Ù ù Ë ë
Comments