Arvelassion 19

19

19:1 Dòp dë ste còse i l'hai sentù la vos fòrta 'd na gran furfa 'd gent ch' ant ël cel a proclamavo: "Alleluia! La salvëssa, la glòria e 'l podèj a son ëd nòs Dé 19:2 përché ij sò giudissi a son conforma a la vrità e la giustissia. A l'ha condanà la gran bagassa ch'a corompìa la tèra con soa prostitussion1 e a l'ha fàit vendeta dël sangh ëd ij sò servitor che chila a l'avìa vërsà con soe man". 19:13 Peuj, na sconda vira, a l'han proclamà: "Alleluia! Ël fum ch'a ven sù da sò incendi a monta për ij sécoj dij sécoj". 19:14 I vinti-quatr ansian e le quatr creature vive a l'han campasse a tèra e a l'han adorà Dè, ch'a l'era setà an sël tròno, disand: "Amen! Alleluia!".

19:5 Peuj a l'é surtije dal tròno na vos ch'a l'ha dit: "Dé làude a nòst Dé, tùit vojàutri ij Sò servitor; e vojàutri ch'a lo rispeteve2, cit e grand!".

La selebrassion ëd le nòsse dl'Agnel

19:6 Peuj i l'hai sentù la vos ëd na gran furfa 'd gent, ch'a l'era coma 'l breugg ëd le poderose onde d'un océan o 'd na romorosa scàriga 'd tron, ch'a disìo: "Alleluia! Nognor Dé tut-potent a l'é intrà ant Sò regn. 19:7 Arlegromse, sautoma 'd gòj e domje glòria përchè a l'è rivà l temp ëd selebré le nòsse dl'Agnel e soa sposa a l'é giumaj pronta. 19:8 A l'ha 'rseivù na vesta 'd lin bianch e fin ch'a splendriss, përchè 'l lin a 'rpresenta le euvre giuste dij sant. 19:8 E a l'ha dime: "Scriv: A l'han arseivù na granda benedission coj ch'a son anvità a la festa 'd nòsse dl'Agnel!" Peuj a l'ha 'ncora giontà: "Coste-sì a son le paròle ch'a ven-o da Dé e ch'a son conforme a la vrità".

19:10 Peuj i son campame a tèra dë 'dnans a chiel për adorelo, ma chiel a l'ha dime: "Pijëte guarda 'd fé lòn, përché mi i son mach un servitor parèj 'd ti e parèj dij tò frej ch'a rendo testimoniansa a Gesù. Rend l'adorassion mach a Dé. L'essensa dla professia a l'é deje a Gesù na testimoniansa ciàira".

Ël Fieul ëd Nosgnor a va 'n guèra

19:11 Peuj i l'hai vëddù 'l ciel duvert, e vardé-là 'n caval bianch. Col ch'a l'era 'nsima as ciamava Fedel e Sincer, përché a giudica con giustissia e a l'ha tacà na bataja giusta. 19:12 Ij sò euj a l'ero tanme 'd fiame 'd feu e an sla testa a l'avìa vàire coron-e. A portava scrìt un nòm conossù a gnun d'àutri che chiel. 19:13 A l'era vestì 'd na vesta meujà ant ël sangh e a l'é ciamà con ël nòm ëd Paròla 'd Nosgnor. 19:14 Le armade ch'a stan ant ël cel, vestije 'd lin bianch, fin e pur, a lo seguitavo an sù 'd cavaj bianch. 19:15 Da soa boca a sortìa na spa molà a doi taj fàita për taché le nassion. A le governrà con na cavija regal ëd fer. A darà sfògh a la furia 'foà 'd Dé le Tut-potent, ch'a sarà tanme 'l giuss ch'a seurt da 'n tòrcc. 19:16) An sù Soa vesta e an sij sò fianch a-i era scrit un nòm: Rè dij rè e Signor dij signor.

19:17 Peuj i l'hai vëddù n'àngel ch'a l'era 'nt ël sol e a l'ha crijà a àuta vos an disand a tute le voltor ch'a volo àut ant ël cel: "Vnì e pronteve për ël disné gròss ëd Nosgnor. 19:18 për mangé la carn ëd ij rè e la carn ëd le tribù, e le carn ëd ij potent, e le carn ëd ij cavaj, e dij cavajé, e le carn ëd tùit, liber e s-ciav, pcit e grand.

19:19 Peuj i l'hai vëddù la bestia e ij rè dla tèra con soe armade radunà për fé guèra a Col ch'a l'era an sël caval, e a Soa armada. 19:20 E la bestia a l'é stàita ciapà, e con chila ël profeta fàuss che, an soa presensa, a l'avìa fàit ij segn ch'a l'avìo anganà coj ch'a l'avìo arseivù la marca dla bestia e ch'a l'han adorà soa imàgine. Tùit e doi a son stàit campà viv ant ël lagh ëd feu ch'a brusa 'd sorfo. 19:21 J'àutri a son stàit massà da la spa 'd col ch'a l'é an sël caval e ch'a seurt da Soa boca; e tùij ij voltor a son levasse la fam con soe carn.

Nòte

1 O "inmoralità".

2 O "ch'i l'eve tëmma 'd Chiel".


À à È è É é Ì ì Ò ò Ó ó Ù ù Ë ë
Comments