2 Tessaloniceis 3

3

Preghiera e përseveransa

3:1 A la fin, car frèj e seur, preghé për nojàutri, për che la paròla ‘d Nosgnor a së spantia e ch’a sìa glorificà coma ch’a l’é an tra ‘d voi. 3:2 Preghé ‘dcò ch’i sio liberà da ‘d gent fastidiosa e maléfica, përchè nen tuti a son ëd chërdent1. 3:3 Nosgnor, contut, a l’é fedel; chiel av rendrà fòrt e av goernrà dal Malign2. 3:4 Ëdcò i l’omne la fiùsa an Nosgnor ch’i feve e ch’i seguité a fé tut lòn ch’iv comandoma. 3:5 Che Nosgnor a veuja guidé vòstri cheur a l’amor ëd Dé e a la përseveransa ch’a ven dal Crist.

Travajé e fé ‘l bin

3:6 Iv arcomandoma ‘dcò, a nòm ëd Nosgnor Gesù Crist, d’artireve da qualsëssìa frel cristian ch’a viva ‘d manera dësregolà, da fagnan, e nen conform a la dotrin-a3 ch’i l’eve arseivula da nojàutri. 3:7 I seve bin, an efet, ch’i l’eve da imité nòst esempi. An tra ‘d voi nojàutri i vivìo nen dësregolà coma ‘d fagnan, 3:8 I l’oma mai acetà d’arsèive da mangé da vojàutri a gratis. I l’oma travajà dur dì e neuit për nen esse ‘d pèis a vojàutri. 3:9 E nen përchè i l’avio pa ‘l drit d’esse mantnì, ma përchè i vorìo deve n’esempi da imité, 3:10 An efet, mentre ch’i j’ero con vojàutri i l’avìo dave costa nòrma: “Chi ch’a veul nen travajé, ch’a mangia ‘dcò nen”.

3:11 A l’é che i l’oma sentì dì che quajdun ëd vojàutri a viv ëd manera dësregolà, sensa travajé, ampaciandse ‘d lòn ch’a lo riguarda nen. 3:12 A tùit coj-lì i-j comandoma e i-j arcomandoma an Gesù Crist, ël Signor, ch’a travajo an pas për vaniesse ‘l pan ch’a mangio. 3:13 Ma për vojàutri, car frej e seur, tralassé mai ëd fé ‘l bin.

3:14 E se quajdun a ubidiss nen a lòn ch’i disoma an costa litra, felo conòsse4 e ten-e gnun-e relassion con collì, përchè ch’a n’àbia onta. 3:15 Contut, considerelo nen tanme ‘n nemis, ma avertilo coma ‘n frel.

Conclusion

3:16 Che ‘l Signor dla pas medésim av daga soa pas an tùit ij moment e an tote le manere. Nosgnor a sìa con tuti vojàutri.

3:17 Costa salutassion i l’hai scrivula pròpi mi, Pàul, ëd mia man. A l’é parèj ch’i buto la firma a tute mie litre.

3:18 Che la grassia ‘d Nosgnor Gesù Crist a sìa con tuti vojàutri.

Nòte

1O “a rivo a chërde”.

2O “dal diav”, “dal mal”.

3O “la tradission”.

4O “marchelo con ël dìl”. 

Comments