2 Tessaloniceis 1

2 Tessalonicèis

1

Salutassion

1:1 Pàul, Silas e Timòt, a la cesa dij Tessalonicèis, ch’a l’é an Dé, nòst Pare, e an Gesù Crist, ël Signor. 1:2 Che la grassia e la pas av sio dàite da part ëd Dé, nòst Pare, e ‘d Gesù Crist, ël Signor.

Assion ëd grassie e preghiera

1:3 I l’oma sèmper da rende grassie a Nosgnor për vojàutri, frej e seur. A l’é giust ch’i lo foma, përchè vòstra fej a dësbandiss e l’amor ch’i l’eve j’un për j’autri a chërs an tuti e an ciaschëdun. 1:4 Dëdnans a j’àutre cese ‘d Nosgnor is sentoma orgojos ëd vojàutri për la përseveransa e la fej ch’av fà soporté tute le përsecussion e le tribulassion ch’i l’eve. 1:5 Lolì a l’é ‘l segn dël giust giudissi ‘d Nosgnor, përchè i sìe trovà degn dël Regn ëd Nosgnor: për lòn i patisse; 1:6 përchè a l’é giust che Nosgnor a fasa passé ‘d tribulassion a coj che adess av fan tribulé, 1:7 e che vojàutri, ch’i seve tribulà, i trove d’arpòs ansema a nojàutri ant ël dì che Gesù, ël Signor, a farà soa aparission1 dal cél. An col dì-lì chiel a vnirà compagnà dai sò àngej potent 1:8 e an mes a na fiama ‘d feu, për ciameje cont a coj ch’a conòsso nen Dé e a ubidisso nen a l’evangeli ‘d Gesù, nòst Signor. 1:9 Sò castigh ëd lor a sarà la përdission eterna, campà fòra da la presensa ‘d Nosgnor e da soa gloriosa majestà. 1:10 An col dì-lì chiel a vnirà për esse glorificà an mes a sò pòpol sant, për esse onorà an mes ëd tuti coj ch’a l’avran chërdù an chiel. I sareve ansema a lor përchè ‘dcò vojàutri i l’eve chërdù a la testimoniansa ch’i l’oma rendù a sò rësguard.

1:11 A l’é për tut lolì ch’i pregoma sèmper për vojàutri, përchè nòst Dé av renda degn dla vocassion ch’i l’eve arseivù; che con sò podej av fasa porté a compiment vòstra volontà ‘d fé ‘l bin e a renda d’efet vòstra fej. 1:12 A l’é parèj che ‘l nòm ëd Gesù a sarà glorificà an vojàutri, e vojàutri an chiel, për la grassia ‘d nòst Dé e ‘d Gesù Crist, ël Signor2.

Nòte

1O “as manifestrà”.

2O “për la grassia ‘d nost Dé e Signor Gesù Crist”.

Comments