B - Testament Neuv‎ > ‎2 Corint‎ > ‎

2 Corinti 3

3

Ël ministeri dla Neuva Aleansa

3:1 Comensom-ne torna a arcomandesse da nojàutri medésim? Opura l’omne da manca, coma ch’a fa quajdun, ëd litre d’arcomandassion da vòstra part? 3:2 I seve voi medésim nòstra letra, scrivùa ant ij nòstri cheur, letra che tùit a la peudo conòsse e lese. 3:3 A l’é ciàir ch’i seve vojàutri na litra ch’a ven da Crist e ch’a n’é stàita fidà. A l’é nen ëstaita scrita con d’anciòstr, ma con lë Spirit dël Dé ch’a viv, nen sù ‘d tàole ‘d pera, ma sù ‘d tàole ‘d carn, cole dël cheur.

3:4 Costa-sì a l’é la fiusa che, grassie al Crist, nojàutri i l’oma dëdnans a Nosgnor. 3:5 A l’é nen ch’i pensoma d’esse bon1, da noi medésim, ëd fé quajcòsa: nostra competensa a ven mach dal Signor. 3:6 A l’é stàit Chiel ch’a l’ha rendune bon a d’esse ‘d servitor dla neuva aleansa. Costa aleansa a consist nen ëd lej ëscrite, ma dlë Spirit, përché ‘d lej ëscrite2 a men-o a la mòrt3, ma a l’é lë Spirit ch’a dà la vita.

La glòria dla Neuva Aleansa

3:7 Mosé a l’era ‘n servitor dla letra, gravà an sla pera, ch’a mnava a la mòrt bele s’a l’era tant gloriosa che, cand Mosé a l’avìa arseivùa, ël pòpol d’Israel a podìa gnanca vardé sò visagi. An efet, sò visagi a bërlusìa pr’ un moment dla glòria ‘d Nosgnor. 3:8 S’a l’era parèj, sarà-lo nen tant pì glorios ël ministeri dlë Spirit? 3:9 S’a l’era già glorios sté al sërvissi dla letra ch’a porta a la condan-a, motobin da pì a lo sarà sté al servissi dla giustissia ch’a salva4. 3:10 An comparision con la strasordinaria glòria ch’i l’oma ant la neuva aleansa, la veja a parëss bin pòca còsa. 3:11 Se lòn ch’a l’era mach transitori a l’era glorios, tant da pì glorios a l’é lòn ch’a dura për sèmper.

3:12 Se, donca, la neuva aleansa an dà tanta sicurëssa5, i podoma esse bin pì che franch. 3:13 Nojàutri i soma nen tanme Mosé, ch’a l’avìa da quatesse la facia con un vel përchè ‘l pòpol d’Israel a vëdèissa nen la glòria, bele ch’a fussa transitoria. 3:14 Ma le ment dël pòpol a j’ero andurìe, e fin-a al dì d’ancheuj, cand ch’a leso l’Aleansa Veja, col istess vel a-j resta adòss e a peudo nen comprende la vrità. A l’é mach la fej ant ël Crist ch’a peul gaveje col vel da la facia. 3:15 Vera, bele ancheuj, cand ch’a leso jë scrit ëd Mosé, ij sò cheur a son quatà da col vel e lor a peudo nen comprende. 3:16 Ma cand ch’a saran convertisse al Signor, ël vel a-j sarà levà vìa. 3:17 Ora, ël Signor a l’é col Ëspirit ansilì, e doa ch’a-i é lë Spirit dël Signor, lì a j'é la libertà. 3:18 A l’é parèj che tuti nojàutri ch’i contemploma ‘l rifless dla glòria dël Signor, a facia dëscoverta, i soma cambià ant l’istessa imagine, da glòria an glòria, për l’euvra dël Signor, visadì dlë Spirit.

Nòte

1 O “qualificà”.

2 O “la letra”.

3 O “a massa”, dàit ch’i soma nen bon a scoteje.

4 Da l’euvra dlë Spiri Sant ch’an rend giust dëdnans a Nosgnor.

5 O “speransa”.


À à È è É é Ì ì Ò ò Ó ó Ù ù Ë ë
Comments