B - Testament Neuv‎ > ‎1 Timòt‎ > ‎

1 Timòt 2

2

La preghiera comunitaria

2:1 Prima ‘d tut, it racomando ch’as fassa ‘d preghiere, d’orassion, ëd supliche e d’assion ëd grassie për d’ogni sòrt ëd gent, për ij rè e për tuti coj ch’a son ëstabilì coma d’autorità, afin ch’i podoma mné na vita chieta e seren-a, marcà da la divossion a Nosgnor e da l’onorevolëssa1. 2:3 Lolì a l’é bon e agreàbil a Nosgnor, nòst salvator, 2:4 ch’a veul che d’ògni sòrt ëd gent a sia salvà e ch’a ven-a a la conossensa dla vrità.

2:5 A-i é un Dé sol, e un sol Antërmediari2 an tra j’òm3 e Nosgnor, visadì l’òm Gesù Crist. 2:6 A l’é Chiel ch’a l’ha pagà con soa vita4 ël pressi dël riscat për tuti confòrm a lòn ch’a l’é stàit testimonià a sò temp5. 2:7 I diso la vrità, i diso nen ël fàuss: i na son ëstait fàit predicator e apòstol, për mostré a tute le gent6 cost mëssagi ‘d fej e ‘d vrità.

2:8 I veuj, donch, che tùit j’òm, a-i n’anfà nen andova7, ch’a prego con ëd man sante alvà al cél, sensa ch’a sio anrabià o ch’a faso ‘d polémiche. 2:9 Për l’istess, che le fomne as vestisso con decensa, con modestia e discression; ch’a l’abio gnun-e pentnure complicà, nì ch’a l’àbio adòss ëd giòje d’òr, ëd perle o ‘d veste ‘d lusso. 2:10 Përchè ‘d fomne ch’a fan profession ëd divossion anvers a Nosgnor a l’han da rendse desideràbil mach për ël mojen dle bon-e euvre ch’a fan.

2:11 Ant l’ora dl’istrussion, le fomne marià a l’han da stess-ne ciuto e an sogession, 2:12 përchè i përmeto nen che le fomne a mostro a j’òm o ch’a l’àbio d’autorità an sij sò marì: a l’han da stess-ne chiete. 2:13 Adam a l’é stàit formà ‘l prim, e peui Eva. 2:14 E a l’é nen ëstàit Adam a d’esse ambrojà, ma soa fomna che, ambrojà ch’a l’é stàita, a l’ha causà la trasgression. 2:15 Tutun, la fomna a sarà salvà grassie a la maternità, a condission ch’as ten-a con tuta discression ant la fej, ant l’amor e ant la santità.

Nòte

1 O “onestà”.

2 O "mediator". 'Antërmediari' (μεσίτης, mesites), ch'a sta an mes, ch'a fà da pont, a l'é da preferisse a 'mediator' përchè ancheuj l'idèja 'd mediator a l'é cola 'd na përson-a ch'a serca un compërmess an tra doe part opòste për buteje d'acòrdi an fasendje contente tute e doe. A l'é nen cola la fonsion ëd Gesù Crist, ch'a l'é l'ùnich ch'a sia stàita dàita l'incombensa, l'incàrich, ëd ristabilì la relassion an tra l'òm pecator e Nosgnor Dé tre vire sant, ant ij sò termo. Gnun-e marcande, gnun-e contratassion.

3 La creatura uman-a, ch’a l’é pecatriss e për lon separà da Nosgnor.

4 O “a l’ha dàit soa vita coma pressi ‘d riscat”.

5 O “ant ël temp fissà da Nosgnor”.

6 Ai Gentij, a coj ch’a son nen d’Israelita.

7 O “an minca leugh”.

Comments