1 Gioann 3

Capìtol 3

3:1 Vardé che bela preuva d'amor a l'ha dane 'l Pare: ch'i sio ciamà ij fieuj 'd Dé!1 E i lo soma dabon! Però, coj ch'a son ëd cost mond a l'arconòsso nen përché a conòsso nen Chiel2. 3:2 Car ij mè amis, i soma già fieuj 'd Dé, ma Chiel a l'ha 'ncora nen mostrane coma ch'i saroma ant ël moment che 'l Crist as manifestrà. I savoma mach ch'i smijeroma a Chiel, përchè i lo vëdroma tal coma ch' a l'é. 3:3 Chionque a l'ha costa speransa an Chiel as manten pur pròpi coma Chiel a l'é pur.

3:4 Chionque a fà 'n pecà a contravniss a la lej 'd Dé, përchè 'l pecà a l'é lòn ch'a l'é contra la lej. 3:5 E vojàutri i seve che Gesù Crist, ch'a l'ha 'n Chiel gnun pecà, a l'é manifestasse për gavé ij nòstri pecà3. 3:6 Tuti coj ch'a stan an comunion con Chiel a chito 'd fé 'd pecà; tuti coj ch'a seguito a pëcché, a l'é përchè a l'han nen conossulo né a capìsso chi ch'a sia. 3:7 Mè fieuj, feve nen ambrojé: col ch'a fà lòn ch'a l'é giust, a mostra ch' a l'é na person-a giusta, tanme Gesù Crist ch'a l'é giust. 3:8 Contut, col ch'a viv ant ël pecà, a l'é dël diav, përché 'l diav fin-a dal prinsipi a l'ha mai chità 'd fé 'd pecà. A l'é për sòn ch'a l'é manifestasse 'l Fieul ëd Dé: për dësblé j'euvre dël diav. 3:9 Col ch' a l'è nassù da Dé a viv nen ant ël pecà, përchè la smens ëd Dé a sta 'n chiel e a peul nen përsiste a pecché dagià che a l'é nassù da Dé. 3:10 A l'é da sòn ch'as peul arconòsse ij fieuj 'd Dé e ij fieul dël diav: col ch'a fa nen lòn ch'a l'é giust e ch'a veul nen bin a sò frel, a l'é nen ëd Dé. Dé a l'é amor: a l'é për lòn ch'i l'oma da amesse l'un l'àutr

3:11 Ël messagi ch'i l'eve sentù fin-a dal prinsipi a l'é sto-sì: chi l'oma da vorèisse bin l'un l'àutr4. 3:12 I l'oma nen da fé parèj 'd Cain, ch'a l'era dël diav e ch'a l'ha massà sò frel5. Për che motiv, peui, ha-lo massalo? A l'era përchè soe euvre a l'ero grame e cole 'd sò frel a l'ero giuste.

3:13 Frej, maravijeve nen se 'l mond av ha an òdio: 3:14 la preuva ch'i soma passà da la mòrt a la vita6 a l'é ch' i voroma bin ai nòstri frej e seur an Crist. Col ch'a-j veul nen bin a sta 'ncora ant la mòrt. 3:15 Col ch' a l'ha n'òdio sò frel o seur a l'é tanme 'n sassin, e i seve che gnun sassin ha l'ha vita eterna an chiel medésim. 3:16 I savoma lòn ch'a sìa l'amor genit dal fàit che Gesù a l'ha l'ha dàit Soa vita për nojàutri. Për lòn ëdcò nojàutri i l'oma da dé nòstra vita pr' ij nòstri frej e seur. 3:17 Si quajdun ch'a l'ha 'd bin ëd cost mond a vëdd che sò frel o seur a l'ha da manca e a-j mostra gnun-a compassion, coma podrìa-lo l'amor ëd Dé a sté an chiel?

3:18 Mè fieuj, sie nen ëd coj che mach a diso 'd volej bin a j'àutri: mostrelo con ij fàit ch'a l'é vera. 3:19 Lòn ch'i foma, nòstre assion, a son cole c'a mostro ch'i soma dla vrità e, quand ch'i soma dë 'dnans a Chiel, nòstra cossiensa a peul sté tranquila.

3:20 Nòstra cossiensa a podrìa fin-a condanene, ma Dé a l'é pì grand che nòstra cossiensa e i soma sicur che Chiel a conòss ògni còsa. 3:21 Car ij mè amis, se nòstra cossiensa an condan-a nen, i podoma ven-e dë 'dnans a Dé con na fiusa ardìa 3:22 e i podroma 'rsèive da Chiel tut lòn ch'i-j ciamoma, përch' i ubidioma ai Sò comandament e i fasoma tut lòn ch'a-j pias. 3:23 Sto-sì a l'é Sò comandament, ch'i chërdo al nòm ëd Sò Fieul Gesù Crist e ch'is voloma bin l'un l'àutr, pròpi coma ch'a l'ha comandane7. 3:24 Coj ch'a ubidisso ai Sò comandament a stan an comunion con Chiel, e Chiel con lor. Pì 'd lòn, da sossì i savoma che Chiel a sta an noi: da lë Spirit ch'a l'ha dane.


1 Gioannn 1:12.

2 O "ël mond an arconòss nen, përché a l'ha nen arconossù Chiel".

3 Gioann 1:29.

4 Gioann 13:34.

5 Génesi 4:8.

6 Gioann 5:24.

7 Gioann 13:34; 15:12,17.


À à È è É é Ì ì Ò ò Ó ó Ù ù Ë ë
Comments