1 Gioann 1

Prima litra 'd Gioann

Capìtol 1

Pròlogh

1:1 Sossì a l'é lòn ch'iv nunsioma: lòn ch'a l'era fin-a dal prinsìpi1, lòn ch'i l'oma sentù, lòn ch'i l'oma vëddù con nòstri euj medésim, lòn ch'i l'oma contemplà e che nòstre man a l'han tocà. Iv parloma dla Paròla dla vita: 1:2 përché la vita a l'é manifestasse: nojàutri i l'oma vëddula2 e na rendoma testimoniansa, iv nunsioma Col ch'a l'é la vita eterna, Còl ch' a l'era con ël Pare e che peui a l'é stane manifestà. 1:3 A vojàutri, donca, i nunsioma lòn ch'i l'oma vëddù e sentù, përchè 'dcò vojàutri i sie an comunion con nojàutri, ch'i l'oma comunion con ël Pare e con Sò Fieul Gesù Crist. 1:4 Iv scrivoma tut sòn përché nòstra gòj a sia completa.

Dé a l'é lus

1:5 Sto-sì a l'é 'l messagi ch'i l'oma sentù da Gesù e che adess iv nunsioma: che Dé a l'è lus e ch'a-i é gnun top an Chiel. 1:6 S'i disoma ch'i soma 'n comunion con Chiel, ma, an efet, i vivoma3 ant lë scur, i soma mach ëd busiard e i vivoma pa nen conforma a la vrità. 1:7 Però, s'i vivoma ant la lus tanme Chiel a l'é 'nt la lus, i soma 'n comunion l'un con l'àutr, e 'l sangh ëd Gesù, Sò Fieul, an purifica d'ògni pecà. 1:8 S'i disoma ch'i l'oma gnun pecà, i 'ngabioloma mach noi medèsim e i vivoma nen ant la vrità4. 1:9 Contut, s'i confessoma5 nòstri pecà, Dé, ch'a l'é fedel e giust, an përdonrà ij pecà e an purificrà da tut lòn ch'a l'é nen giust6. 1:10 S'i disoma ch'i l'oma gnun pecà, a l'é coma s'i disèisso che Dé a l'é 'n busiard e cola-lì a sarìa la dimostrassion che Soa paròla a sta nen ëd cà da nojàutri.


1 Gioann 1:1.

2 Gioann 1:14.

3 O "i marcioma.

4 O "la vrità a l'é nen an noi".

5 O "arconossoma".

6 O "da ògni 'ngiustissia".



À à È è É é Ì ì Ò ò Ó ó Ù ù Ë ë
Comments