Bilang isang mag-aaral, nakita ko na napakaganda ng istoryang nais ipahatid ng "Sandaang Damit" ni Fanny Garcia dahil sa naglalaman ito ng isang kuwento na kumikilala sa iba't-ibang isyung panlipunan partikular na ang ilan sa mga problemang kinakaharap ng mga mag-aaral sa panahon ngayon. Isa ang kahirapan sa mga aspetong binigyang pokus sa kuwento at para sa akin, ito ay isa sa mga parte ng kuwento na hindi lamang ginamit upang pagandahin at bigyang kulay ang daloy ng istorya, kundi upang iparating din sa mga mambabasa na hindi biro ang mga pinagdadaanan ng mga estudyanteng nakararanas ng kahirapan. Pangalawa, ang isyu ng diskriminasyon ay isa rin sa mga problema na hindi naiiwasan ng maraming mga paaralan; maraming mga mag-aaral ang nakararanas nito at ito ay hindi magandang imahe na makita sa bawat paaralan. Kaya naman ipinararating din ng istoryang ito na ang diskriminasyon ay hindi magandang gawain dahil hindi natin alam kung anong buhay mayroon ang isang tao; at kung oobserbahan natin sa istorya, ito ay lubos na naipakita. Sa pangkalahatan, ang awtor ay naging matalino sa paggawa ng isang malikhaing akda na hindi lamang ang tanging layunin ay upang magbigay ng aliw sa mga mambabasa kundi nagawa din nyang pukawin ang ating mga damdamin sa iba't-ibang problema na nararanasan ng mga mag-aaral na sa murang edad ay hinahamon na ng mabagsik na lipunan.

Ang "Sandaang Damit" ni Fanny Garcia ay isang maikling kuwentong naglalaman ng istorya ng isang batang babae na nakararanas ng kahirapan at diskriminasyon sa kanyang buhay. Ang kuwento ay kumpleto rin ng iba't-ibang mga elementong pampanitikan katulad lamang ng pagkakaroon nito ng makabuluhang paksa, tauhan, tagpuan at iba pa. Ito din ay kinapapalooban ng iba't-ibang parte na kumukumpleto sa isang maikling kuwento at ito ay ang mga panimula, saglit na kakintalan, papataas na aksyon, kasukdulan, pababang aksyon at wakas. Ang mga ito ay napakaimportante dahil ang bawat isa ay may malaking ginagampanan sa bawat pangyayari sa isang kuwento. Naglalaman rin ito ng mga uri tunggalian tulad na lamang ng tunggalian na 'tao laban sa tao', dahil sa pangungutya na natatanggap ng bidang batang babae sa kanyang mga kaklase at ang isa pa ay ang tunggalian na 'tao laban sa lipunan' dahil sa kahirapan na kanyang nararanasan. At ang pinakaimportante sa lahat ay kinapapalooban din ito ng aral na maaaring maisabuhay ng mga mambabasa.