ახალი სასწავლო მოდელის აღწერა

2024-25 სასწავლო წლიდან მე-10 კლასში საგნობრივი სწავლების (მათემატიკა, ბიოლოგია, ქართული და ა.შ.) ნაცვლად შევქმენით ორგანიზაცულ პროექტზე დაფუძნებული სასწავლო მოდელი, რომლის ფარგლებშიც მოსწავლეები შექმნიან არაფორმალურ საგანმანათლებლო სკოლას და ამ გზით განივითარებენ შესაბამის საგნობრივ კომპეტენციებს.

პირველ სემესტრში მოწავლეები შეისწავლიან თუ როგორ უნდა ააწყონ ორგანიზაციული სისტემა და ისწავლიან ფინანსებს, ორგანიზაციულ მენეჯმენტს, ბიზნეს სამართალს, საგანმანათლებლო ფილოსოფიას, მარკეტინგს და კურიკულუმის დაგეგმვას, ხოლო მეორე სემესტრში, როცა მოსწავლეები თავად ხდებიან მასწავლებლები, გამოაცხადებენ გარე დაინტერესებული მოსწავლეების მიღებას და არაფორმალური სკოლის მოსწავლეებს დაუგეგმავენ და ჩაუტარებენ გაკვეთილებს, რომელიც დაფუძნებული იქნება ცხოვრებისეული პრობლემების გადაჭრაზე, მაგალითად, საბუნებისმეტყველო და საზოგადოებრივი მეცნიერებების საგნების შემცველი პრობლემაზე დაფუძნებული სწავლება: სავალ ნაწილზე სიჩქარის ლიმიტის განსაზღვრა; ფოლკლორული ექსპედიცია; ურბანული მწვანე სივრცეები.

ორგანიზაციული სისტემის აწყობის პროცესში შესასწავლი თემები და კავშირი ესგ-სთან

(მცირე ჩამონათვალი)

მოსწავლეები და მასწავლებლები იქნებიან ორგანიზაციის დამფუძნებლები და მესაკუთრეები.

ცოდნის აღქმა

ახალ მოდელში ცოდნის აღქმა არ არის სტატიკური, ის დინამიკური პროცესია. მოსწავლეები იაზრებენ, რომ განათლება ჰოლისტიკური, ინტეგრირებული და უწყვეტი პროცესია. ისინი აკვირდებიან თავიანთ სწავლის პროცესს, იაზრებენ სამიზნე ცნებებს, იღებენ უკუკავშირს, გეგმავენ, ხოლო შემდეგ, როცა მასწავლებლები გახდებიან, სხვების სწავლებით და მათი სოციო-კულტურული ფაქტორების ანალიზით იღრმავებენ საკუთარ გააზრებებს.

როლები

თუ ძირითად შემთხვევებში ტრადიციულ მოდელში ორი როლია: მოსწავლე-მასწავლებელი და როლები ვერტიკალურადაა განაწილებული. ახალ მოდელში როლები მრავალია და ჰორიზონტალური: მოსწავლეები თავად არიან მასწავლებლები, ასევე ჰყავთ საგნის მასწავლებლები და დარგობრივი ექსპერტები, მაგალითად, ფინანსური, მარკეტინგის და სამართლის ექსპერტები, რომლებმაც თავად შექმნეს ორგანიზაციები და თავიანთ სფეროში დაგროვილ გამოცდილებებსა და გააზრებებს ყოველდღიურობაში ავლენენ, ეხმარებიან და ავითარებენ სხვადასხვა სფეროებს.

დრო

ახალ საგანმანათლებლო მოდელში, დრო (კვირის და წლის განრიგი) არ არის სტატიკური, ის იცვლება მოსწავლეთა და პროცესის სასწავლო საჭიროებებიდან გამომდინარე, მაგალითად, თუ მოსწავლეებს კონკრეტულ პრობლემაზე სამუშაოდ ფინანსურ კვლევებში ჩაღრმავება სჭირდებათ, მათ შეეძლებათ მთელი დღე ამ საკითხის შესწავლას დაუთმონ და ასევე იმუშაონ გრძელვადიან მიზნებზე.

ამასთან, მათი სემესტრული კვირის განრიგები იქნება განსხვავებული, მეორე სემესტრში საშაბათო სკოლაში გარე მოსწავლეების მიღების შემდეგ, მათი სასწავლო დღეები იქნება შაბათ-კვირა, ხოლო ორშაბათი და სამშაბათი, უქმე დღეები.

სივრცე

ახალ მოდელში სასწავლო პროცესი სცილდება ტრადიციულ კლასებს, მერხებს და დაფებს, რადგან მოსწავლეებს ხშირად ექნებათ გუნდური სამუშოები, დარგობრივ ექპერტებთან და საგნების მასწავლებლებთან შეხვედრები, ასევე ინდივიდუალური სამუშაოები, შესაბამისად მათი სივრცე მულტიფუნქციური და ურთიერთდაკავშირებული იქნება და თან ეს სივრცე სწავლის პროცესს და რეალურ სამყაროს შორის კავშირს უკეთ გამოხატავს.

შეფასება

თუ ტრადიციულ შეფასების მოდელში მოსწავლეები ფასდებოდნენ მიზნის მისაღწევ საშუალებებში, მაგალითად, ტესტები, ქუიზი, პროექტი, და ა.შ. ახალ მოდელში მოსწავლეები შეფასდებიან საგნობრივ სტანდარტებში, რომელიც გულისხმობს მიზნის მიმართ შეფასებას ცხადი და გასაგები გაწაფულობის შკალის მიხედვით.

მოსწავლეებს შესაძლებლობა ექნებათ, გარდა საგნობრივ მიზნებში თავიანთი პროგრესის მონიტორინგისა, დააკვირდნენ თავიანთ სამუშაო უნარებს, როგორიცაა პასუხისმგებლობა, შეუპოვრობა, ორგანიზება და ა.შ. ეს მოდელი შესაძლებლობას იძლევა აღვიქვათ მოსწავლე ჰოლისტიკურად და მის თითოეულ მახასიათებელზე დინამიკაში დაკვირვებით, როგორც მოსწავლემ, მასწავლებელმა და მშობელმა, შეძლოს პროგრესის მონიტორინგი.

ხსენებული შეფასების სისტემა ჩვენს სკოლაში დაინერგა 3 წლის წინ, რომელსაც საერთაშორისო საგანმანათლებლო ლიტერატურაში იცნობენ, როგორც „სტანდარტზე დაფუძნებული შეფასების სისტემა“.

ჯვარედინი კომპეტენციები

ახალ საგანმანათლებლო მოდელში, ორგანიზაციული სისტემის აწყობიდან, მეორე სემესტრში მოსწავლეების მიერ სწავლების პერიოდში, ქართული ენის კომპეტენციების სწავლება და ინტერ-ინტრა პერსონალური უნარების განვითარება ინტეგრირებულია მთელი სასწავლო წლის განმავლობაში სხვდასხვა აქტივობებზე მუშაობის დროს, მაგალითად: სამეცნიერო ტექსტების, ლაბორატორიული ანგარიშების, ფინანსური გეგმისა და ორგანიზაციის მისია-ხედვის დოკუმენტის შექმნის პროცესში. თითოეულ ჯვარედინ კომპეტენციაში მოსწავლეები შეფასდებიან სტანდარტზე დაფუძნებული შეფასებით.

უნივერსიტეტი

როგორ დაეხმარება მოსწავლეს ეს პროგრამა უნივერსიტეტში ჩაბარებაში?

საზღვარგარეთ უნივერსიტეტში მოსახვედრად მოსწავლეს დაეხმარება სკოლის პერიოდში შექმნილი პორტფოლიოები;
რადგან ახალ მოდელში საგნები სრულად გაცოცხლებულია კონკრეტულ სფეროებში გამოყენების კუთხით და სხვადასხვა დარგის სპეციალისტებთან უწევთ თანამშრომლობა, მოსწავლეებს გაუმარტივდებათ პროფესიის შერჩევა;
სწავლის პროცესის შესწავლა, სკოლის დაარსება, კურიკულუმის შექმნა და სწავლება საშუალებას მისცემს მოსწავლეებს უკეთ მართონ საკუთარი სასწავლო პროცესი;
გამოცდების ჩაბარება მნიშვნელოვნადაა დამოკიდებული შეუპოვრობის, პასუხისმგებლობის და დროის მართვის უნარებზე. მოსწავლეები მთელი სასწავლო წლის განმავლობაში სტანდარტზე დაფუძნებული შეფასების დახმარებით, აღნიშნულ უნარებთან მიმართებით, დააკვირდებიან თავიანთი განვითარების პროცესს.

სხვა მნიშვნელოვანი დეტალები

წელს პროგრამაში, ჩვენი სკოლის 6 მოსწავლე მიიღებს მონაწილეობას;
გარე დაინტერესებული მოსწავლეთათვის მიღება 2025/26 სასწავლო წელს დაიწყება;
პროგრამა სრულად თავსებადია ზოგადი განათლების კანონთან. ახალ საგანმანათლებლო მოდელში მონაწილეობა ხელს არ უშლის სხვა სკოლაში მობილობას, ასევე სხვა სკოლაში ახალ მოდელში მობილობას და ატესტატის აღებას.