澎湖海域闊茫茫

海兄南北四界傱

全望天公來疼戇

囝孫莫求海龍王

北寮出名是分海

若無摩西無人知

風聲嗙影真厲害

莫怪遊客相爭來

初十二五好流勢

釣魚嘛愛看天時

魚來食餌是歡喜

魚若毋食莫受氣

船行疾疾掣如箭

長驅滑過海中天

回首前塵身已朽

名空利空似神仙

上毒網船瞪蝦拖

親像田牛咧犁逝

一分一秒無走差

魚蝦無死嘛臭焦

自古討海半條命

聽著風颱誰毋驚

看著漁港無鳥影

才知海兄嘛鳥精

船隻若鳥貼水飛

天頂雲蕊水底過

由來好夢上緊醒

何必操凡來夯枷

炤海著愛看時候

上好初三十八流

閒閒罔耍罔變猴

莫想趁錢起大樓

大水飽滇月光半

沙墘若有跤步聲

想欲囝孫代代湠

大身大命爬上山

刺茼一身全全刺

羊妹毋食牛毋鼻

枵鬼囡仔喙貪甜

幼刺牢甲規喙邊

海兄坐港補破網

擔沙填海了戇工

種著歹田向後冬

向望政客後世人

㧣風戰湧是本領

鹹水潑面是天命

時機已經倒頭反

海有海無心莫凝

老人一暝躼躼長

食飽煩惱天袂光

毋等雞公叫起床

行來公園搶天光

案山漁火如星斗

先哲意象邈悠悠

不見當年照海秀

但看匆匆客船游

秋高虎井看澄淵

茫茫渺渺真僫現

聽候大水洘流底

有緣自然來相見

秋高虎井看澄淵

莫道誰又弄虛玄

孤城海中忽隱現

相逢自是有奇緣

海水青青湧平平

水面丁香箍圓圓

遠遠海鳥鼻著味

飛來船人的身邊

漁港貨項滿滿是

頂山西嶼來鬥市

海鳥食無膏膏纏

一路綴船到港墘

風靜湧平南風暝

石面光滑露水甜

螺仔趖出欲食苔

毋免僥石用手搣

風茹生佇崁柱墘

毋驚風拍鹹水豉

提來煎茶真甘甜

請客相送攏有味

一支扁擔掛肩頭

目屎軋汗腹內流

澎湖查某台灣牛

頭巾一條面來包

熱天盡靠臭肉罾

規海船隻若出戰

雙雙對對仝囝命

拚三頓閣拚名聲

以早釣魚看山範

現時釣魚看衛星

山範釣魚有鮮臊

衛星釣魚癮仙哥

青盲舵公揣無山

千蕊目睭昭昭看

雙手合掌焐心肝

求來媽祖𤆬上岸

日頭落海𪐞紅雲

點點鳥影伴孤船

人生海海若眠夢

目睭若瞌化火薰

蜈蚣徛佇石頭縫

暗時趖出欲弄鬆

予人掠入燒酒甕

高梁灌甲醉茫茫

海兄無賺腹肚枵

叫兄莫賺無天條

明明法律排規排

官府毋辦攏嘐潲

㧣風戰湧落土時

鹹水潑面八字命

想欲囝孫會成人

摖皮摖骨也著拖

烏面石頂徛燈樓

水淹水洘有時候

日時觀船看海鳥

暗暝觀星聽湧聲

舉頭看天天連海

頕頭看海海連天

白雲無心天天過

海鳥有情日日陪

推捒母語無撇步

人人捷講拍基礎

堅心拍拚毋驚苦

文化傳承才有路

雞公猶未叫起床

家私攢咧就出門

痟海無惜路途遠

天南地北走四方

西山𬦰崎路趨趨

唱歌抐曲掘香薷

愛人毋捌行相拄

看南看北無心思

一塊島嶼兩粒山

東山西山相對看

想欲相倚海扴跤

海沙鎮海連心肝

七娘媽生拜天星

牛郎織女慶團圓

一滴雨水一滴淚

也是歡喜也是悲

日落黃昏海

風歕故鄉歌

恬恬守厝內

相思拍湧來

入秋了後雲牽絲

天色青青海水墘

湧拍石頭咧作詩

展翼海鳥飛袂離

暗霞映海規片紅

船聲漸遠剩孤帆

海鳥箍船啼啼叫

好像叫阮緊回航

人生親像白雲煙

目睭一nih數十年

退休了後閒仙仙

自由自在半悾癲

潭邊燈猜通人知

專業師資入校內

行讀潭邊做垺來

認捌地名古早代

活動中心臆謎猜

提著獎品笑咍咍

恰早討海來掠魚

愛看流水看山嶼

拁頭望星猜時子

講著全全是功夫

祖先留著幾塊地

種著土豆合路穗

希望收成賣有價

年頭好命到年底

一碗甘甜蕃薯糜

配著鹹鹹臭肉餽

三嘴兩嘴趕緊扒

倘好來去做空缺

早起一碗麵線糊

中鬥土豆蕃薯圈

暗頓一盤炒魚烳

總是希望三頓燒

一軀衫褲補擱縫

大兄穿了換小弟

阿爸討海趁無錢

咱愛勤儉過日子

遮日遮雨戴草笠

上山落海穿草鞋

熱天納涼褪綁體

冬天愛包棉褥被

大井腳邊是阮處

硓咕牆壁窗門舊

邊間灶腳達項有

即馬互鳥做窩孵

擔著井水入水缸

互阮阿母好煮飯

深井牆邊來覓蔭

看阮阿爸曝小管

風無猴爪雲毋動

天色印海媠婸婸

曷使萬里痟風騷

西湖袂醉澎湖人

牛車載阮慢慢行

黄昏才到門口埕

拆柴飼水互牛兄

明載咱擱繼續拼

一雙布鞋用手摜

褪赤腳來行田岸

沿路快樂來唱歌

釘著刺來捶心肝

廟口做醮搭戲台

扮仙唱歌真精彩

普渡好料排歸排

害阮嘴涎吞腹內

蕃薯礤簽無剾皮

無米簽糜煮規鍋

頓到欲食無好配

罔罔扒糜配鹹膎

他鄉總思故鄉月

家中井水恰贏茶

思鄉情緒那崩堤

溪水借寄思親批

三喙泔糜一喙扒

三日工課一日做

想欲後裔出頭地

這代著愛做牛犁

六月熱天七月火

燒甲褪殼紲遛皮

閒人覕佇寮棚下

食冰消涼講閒話

一隻草船兩枝跤

一半澹身一半焦

流南流北烏白抐

抐有抐無笑哈哈

灶空吞碳毋知飽

煙筒吐煙雙管爁

臭肉落鼎沖沖滾

女工衫澹穿甲焦

奕牌學講笑微微

大人和囡仔攏歡喜

無看輸贏看情意

推捒母語加一味

過年無聊守佇厝

爸兒母仔激規垺

桌頂耍奕學母語

毋通迎新就棄舊

一葩燈火搖爁爁

囡仔大人坐倚倚

塗豆那擘話那聽

阿公說古五四三

艱苦來討海

尚驚有風颱

歸工勼處內

心酸無人知

重光里，好企起

媽祖靈顯有保庇

黃昏時，行港墘

長堤日落滿詩意

日潭圓，月潭扁

古處迷人撩相思

照天理，有福氣

凌霄寶塔安社稷

貓嶼無貓鳥規堆

從來毋捌聽狗吠

恬恬覕佇西南海

毋是討海少人知

空軍掠貓做靶場

害死海鳥揣無岫

山貓袂泅喓喓吼

海鳥有翼飛了了