我當初報讀內地大學嘅原因係內地大學嘅學費相較低，而自己都想換個新環境試下唔同嘅生活。

初初到廣州嘅時候好唔適應，雖然廣州同香港距離好近，但係生活環境同習慣都有好多出入，而且人生路不熟，自己都用咗一段時間先慢慢適應到。而學校入面，除咗港澳台學生外，仲有馬來西亞或者外國華僑同學，交流中都能夠更深切咁認識到唔同嘅文化，而平時上堂用語都係普通話。

雖然話港澳台學生分數要求會低啲，入讀大學嘅機會好大，以為入到嘅學校水平都只係好一般。但開學之後發現高手雲集，競爭好大。所以自己都會積極參加唔同嘅社團活動去提升自己嘅溝通、組織同領導能力。同時要激發自己認真學習，令自己唔落後於其他同學。

可以到其他地方讀書固然會好開心，充滿新鮮感。但離開舒適圈之後，將會需要獨自面對好多生活上嘅挑戰，語言同環境嘅轉變會好大。當然係新環境中你不斷學習如何面對同解決問題嘅時候，對個人成長都有好大幫助，令自己能夠獨當一面。另外就是前景問題，大家可以諗下畢業後想係邊度就業，大學嘅時間不但止適應當地生活，更可以適應當地嘅工作模式，因此大家需要深思熟慮再作外地升學嘅決定。

有啲課程係完全冇接觸過就會有啲吃力，不過整體嚟講都唔會太辛苦，我都識到好多朋友仔，同積極咗去參加班會，同幹事一齊開會組織活動，所以自己讀得都幾開心。