Zuberoako hiriburura joan gara gaurkoan Euskal Herriko zazpi hiriburuak lotzeko gure egitasmoaren barruan. Hain zuzen ere, Maule ondoko Garindaine herritik abiatu gara. Autobusak utzi gaituen errepide bazterretik metro batzuk egin eta mendi aldera jo dugu. Itxura denez, aurreikusita zegoen hasierako zatia egoera kaxkarrean egon zitekeen eta beste bide bat aukeratu dugu. Edozein lekutatik joanda ere, behetik gora egin behar eta halaxe egin dugu guk ere Laskaraiko bidetik, poliki-poliki Garindaine eta hango etxeak behean utziz.

Mendian gora egin ahala inguruko edertasunaz gozatzen hasi gara. Ez dago mendi erraldoirik hemen, baina daudenak bai dotoreak. Katean lotuta bezala, bata bestearen atzetik ikus daitezke. Berde kolorea da nagusi; zelai berdeak, mendi-kasko berdeak, zuhaitz berdeak,… Bide onetik gabiltza eta eguzkia dugu bidelagun; bero handirik gabe, giro bikaina daukagu mendian ibiltzeko. Ezusteko polita ere izan dugu: argazkiak atalean ikus daitekeen eperra, esaterako. Ohartu denean, agudo abiatu da hegan ihesi.

Sei bat kilometro eginak ditugunean, lehenengo gune garrantzitsura iritsi gara: San Gregorio baselizara (edo txapelara; hala dago zubereraz idatzita bideko kartel batean). Oso leku ederrean dago, hesiz eta zuhaitzez inguratua, eta edozein lekutara begiratuta ere, ikuspegi zoragarria eskainiz. Hara heldu aurretik putzu batzuk saihestu behar izan ditugu eta baselizako tontorretik jaistean, berriz, aldapa pikoari aurre egin behar izan diogu.

Ermita ez da leku txarra hamaiketakoa egiteko, baina aurrera egitea erabaki dugu, indarrak berritu aurretik bideari tarte bat bederen jateko. Gainez gain gabiltza gehienbat eta bailara ederrak ageri zaizkigu behealdean. Eguzkia lanean ari den arren, itzal ederra eskaintzen duten basoak eta zuhaitzak izan ditugu, haien gerizpean babestu ahal izateko. Urrunean, gero bisitatuko dugun San Antonio baselizaz gain, Pirinioetako mendiak ikusi ditugu tontorrak oraindik zuriturik dituztela.

Pittinka-pittinka ari gara aspalditik begi bistan dugun San Antonio ermitara hurbiltzen. Kakoetako lepoan mokadu bat egiten ari garela, bi nekazari hurbildu dira, bat traktore handi bat gidatuz, eta inguruko belarrak ebakitzen hasi da traktorean zuen sega-makinarekin. Haiek lanean utzi eta aurrera jarraitu dugu; une batean Oxkaxeko lepora doan D-918 errepidetik ibili behar izan dugu, inolako arazorik edo eragozpenik gabe. Halaxe inguratu gara 1385ean eraikitako baselizara.

Aipaturiko urteaz geroztik bakearen alde otoitz egiten omen da San Antonio kaperan. Gaur egun ere badago munduan zehar bakearen alde egin beharra eta ez da, ez, leku txarra horretarako. Batek baino gehiagok eskertuko luke hemengo bakea eta lasaitasuna. Lekuaren edertasunaz baliatuz, eguneko ibiltarion argazkia egin dugu bake-bakean eliza dotorearen aurrealdean.

Muskildi mendiaren gailurrean dago, izen bereko herriaren barrutian, San Antonio baseliza eta alde askotatik ikus daiteke. Handik jaitsi garenean, Ehüsako lepoaren inguruan, Donibane Garazi aldera doan Done Jakue bidearen adar bat topatu dugu (IL/GR 78a). Gu ere Mauletik Donibane Garazirako bidea egiten ari gara, baina ibilbide hori alde batera utzi eta gaurko helmuga aldera egin dugu, azken aldapen bila.

Bagoaz gaurko tontor garaienaren bila: Elhaudi mendia (700 m). Igoera laburra da, baina tentea. Gurutze hesitu bat dago gailurrean eta bista izugarriak: San Antonio baseliza Muskildi mendiaren kaskoan, Pirinioetako mendi elurtuak, beheko bailaretako herri, herrixka eta etxeak; zoragarria benetan.

Behe aldera egin dugu jarraian eta Arlako helmugara heldu aurretik bide egokia aurkitzeko arazoren bat edo beste izan dugu. Laster konpondu da arazoa ordea, eta ezustekorik gabe iritsi gara Donaixti-Ibarreko auzunera. Bide hartatik ondo moldatu bagara ere, beste bide batetik joandakoek aurkitu dute beste aukera hobe bat, ibilaldi hau inoiz egin nahi dutenentzat (begiratu Wikiloceko iruzkinak).

Ibilaldia amaituta, Donibane Garazira joan gara, baina autobusez. Hantxe, Errobi ibaiaren ondoan dagoen Cafe Ttipia jatetxean bazkaldu dugu, giro ezin hobean, Goierrira itzuli aurretik. Gozamen hutsa gaurkoa ere.