因為時代變遷，少年人使用台語的機率愈來愈少，誠濟囡仔佇厝內佮學校遮的環境中攏較少接觸台語，所致這項珍貴的語言文化開始拄著傳承的危機。我聽朋友講𪜶細漢的時陣，厝內人攏會佇欲睏進前講睏前故事予𪜶聽，但是我並無這个經驗，所以我想欲做這个計畫，有一種彌補我的遺憾的用意，本計畫的核心理念是「佇放輕鬆當中學習，在睏前故事中傳承」，透過錄音製作台語睏前故事，予囡仔佇恬靜四序的環境，誠自然的來吸收台語語言佮文化。

本計畫會製作一系列適合低年歲的台語睏前故事，對象的設定佇國校二年仔以下，大概2到8歲，提供爸母佮囡仔佇欲睏進前放送佮收聽，予語言學習融入日常生活。另外，計畫也會上傳到影音平台，方便家長佮老師免費下載來使用遮的音檔，進一步提升台語的推廣度。