Diagyan NHS - District DRRM

Dilasag, Aurora – Muli na namang pinatunayan ng mga mag-aaral ng Diagyan National High School ang kanilang husay at talino matapos humakot ng mga parangal sa katatapos lamang na District Disaster Resilience Month 2025, Hulyo 19.

Ang nasabing aktibidad ay naglalayong palakasin ang kamalayan ng kabataan sa kahalagahan ng kahandaan sa mga sakuna at kalamidad.

Sa Poster Making Contest, wagi ang Junior High School sa ikalawang pwesto sa katauhan ni John Carlo Abad, sa ilalim ng paggabay ng kanyang coach na si Gng. Aurea Joy M. Cartagena. Samantala, tinanghal namang kampeon ang Senior High School representative na si Raiden N. Agustin, kasama ang kanyang coach na si Gng. Julie Maryjane Verdadero Dayao.

Hindi rin nagpahuli ang Diagyanians sa Quiz Bee, kung saan nasungkit ng Junior High School team na sina Laikha Bagawisan at Arriane Joy Noveno ang unang pwesto, sa pamumuno ng kanilang coach na si Gng. Ma. Elmie Miague. Ganoon din ang Senior High School pair na sina Christine Jane Dayao at Reniel Panuncio, na nag-uwi rin ng unang pwesto, kasama ang kanilang coach na si G. Jerry Boy Leal.

Sa larangan ng Essay Writing, naiuwi ng Junior High School ang unang gantimpala sa pamamagitan ni Anafe San Antonio, na ginabayan ni Gng. Venus Moises. Para naman sa Senior High School, nasungkit ni Keziah Darling Piniano ang ikatlong pwesto, sa tulong ng kanyang coach na si Bb. Vera Hidalgo Noveno.

Ang mga tagumpay na ito ay patunay ng dedikasyon ng mga guro at sipag ng mga mag-aaral ng Diagyan NHS sa pagtugon sa layuning mapalawak ang kaalaman at kahandaan sa panahon ng sakuna. Buong puso ang pagbati at pagpupugay ng buong paaralan sa mga nagwagi, kasama ang kanilang masisipag na tagapagsanay.

“Ang tagumpay na ito ay hindi lamang karangalan ng paaralan, kundi inspirasyon sa buong komunidad upang lalong pag-ibayuhin ang ating kahandaan sa anumang hamon ng kalikasan,” ani ng isang guro sa panayam.

Patuloy ang suporta ng Diagyan NHS sa mga aktibidad na naglalayong hubugin hindi lamang ang talino, kundi pati na rin ang malasakit at disiplina ng kabataan para sa isang matatag at ligtas na kinabukasan.

Page updated

Report abuse