Paskong May Sugat, Paskong May Pag Asa: Rebyu ng “A Father’s Promise” ng Teatro Punlahi

Ang Kwento ng Isang Nawalang Pangako

Sa unang eksena pa lamang, agad nang dinadala ng dula ang mga manonood sa isang tahimik ngunit mabigat na tagpo—isang pamilyang pilit bumabangon mula sa pagkawala ng haligi ng tahanan. Ang kwento ay umiikot sa pamilya nina Alejandro, Agnes, Lyka, at Gelo. Sa simula, ipinapakita kung paano binuo ni Alejandro ang pangarap para sa kanyang pamilya ngunit biglang nagbago ang lahat nang siya ay pumanaw.

Ang pagkawala ng isang magulang ay hindi lamang isang emosyonal na sugat kundi isa ring matinding pagsubok na bumabago sa relasyon ng mga naiwang miyembro ng pamilya. Sa kwento, ipinakita kung paano may kanya-kanyang paraan ng pagdadalamhati ang bawat isa sa kanila. Si Agnes, ang ina, ay pilit hinahanap ang tibay ng loob upang maitaguyod ang pamilya. Si Lyka, ang bunsong anak, ay nalilito sa kanyang emosyon—nagdadalamhati habang may hinanakit sa kanyang kapatid na si Gelo, na tila hindi nakikidalamhati sa kanilang pagkawala. Sa isang matinding eksena, tinanong ni Lyka ang kanyang kuya, "Ikaw ang nang-iwan sa pamilya natin. Ikaw ang dahilan kung bakit nasira ang pamilya natin." Isa itong matalim na linyang nagbigay-diin sa kanilang alitan at sa sugat na dulot ng pagkawala ng kanilang ama.

Musika at Damdamin sa Entablado

Bilang isang dulang musikal, isa sa pinakamalalakas na elemento ng A Father’s Promise ay ang musika. Hindi lamang ito basta mga awitin na idinagdag upang gawing mas magaan ang dula; sa halip, naging bahagi ito ng naratibo, nagsilbing tinig ng mga tauhan upang maipahayag ang kanilang damdamin. Ang ilan sa pinakamakabagbag-damdaming linya sa dula ay inawit ng mga tauhan, gaya ng "Saan ako kukuha ng lakas?"—isang linya na nagpalalim sa bigat ng eksena.

Sa teknikal na aspekto, mahusay ang musika ng banda sa paglikha ng tamang emosyon sa bawat eksena. Bagaman may mga pagkakataong tila mahina ang mikropono ng ilang karakter, hindi ito lubusang nakaapekto sa kabuoan ng dula. Ang musikalidad ng pagtatanghal ay naging mahalagang elemento upang gawing mas totoo at mas dama ang emosyon ng bawat karakter.

Pasko at Ang Tunay na Diwa ng Pamilya

Sa pagtatapos ng pagtatanghal, hindi lamang isang kwento ng pagkawala ang A Father’s Promise kundi isa rin itong paalala sa kahalagahan ng pamilya at paghilom. Sa kabila ng sakit at pangungulila, may pag-asa. Ang Pasko ay hindi lamang tungkol sa kasayahan kundi tungkol din sa pagpapatuloy ng buhay, kahit pa may mga iniwang sugat ang nakaraan. Tulad ng sinabi ni Zinda Vir sa dula, "Healing is always possible."

Ang A Father’s Promise ay isang madamdaming pagtatanghal na tunay na sumasalamin sa realidad ng maraming pamilyang Pilipino. Sa husay ng pagganap, musika, at lalim ng emosyon ng kwento, isa itong dula na hindi lamang nagbibigay ng saya kundi pati ng pagninilay sa tunay na diwa ng Pasko. Kung ang isang dula ay may kakayahang magpaiyak, magpatigil, at magbigay ng pag-asa sa mga manonood, tiyak na ito ay isang pagtatanghal na sulit balikan at pag-usapan. 

Gaya ng sabi ni G. Abejuela, “Mabuhay ang sining, mabuhay ang Teatro Punlahi!”