OSCAR "OCA" G. MALAPITAN

“Mr. Chair, mga mahal kong miyembro ng Komisyon, sa panahon ngayon kung kailangan bigyan ng lalong halaga ang ating kapaligiran, tama lang na ikumpirma si Ms. Antonia Yulo-Loyzaga bilang kalihim ng DENR.

Ang galing at karanasan ni Secretary Toni sa pangangalaga sa kapaligiran ay walang kaparis.  Isang honor graduate ng Ateneo De Manila, nilaan ni Secretary Toni and kanyang oras sa mga programa at mga organisasyon na tumatalakay at sumusulong sa konserbasyon.  Higit pa, marunong si Secretary Toni sa larangan ng “Environmental Disaster and Risk Management”, at kita ito sa dami ng kanyang papel na inakda ukol dito.  Sa madaling salita, si Secretary Toni ay awtoridad sa larangang ito.  Kung kaya’t ito’y lalong rason sa kanyang kumpirmasyon.  Kung kaya sa akin pong palagay, ngayon, sa administrasyon ni Pangulong Bongbong Marcos, ay napakapalad po nating pagkatiwalaan si Toni na pamunuan ang DENR.

Ginoong Chair, at mga mahal kong kasamahan sa Komisyong ito, isang malaking karangalan at lubos po ang aking galak na pangalawahan ang pag-endorso sa kumpirmasyon ng paghirang kay Ms. Ma. Antonia Yulo-Loyzaga bilang kalihim ng DENR.”

Mr. Chair, at sa mga minamahal naming kasapi ng Komisyong ito.

Ang pangalang Manuel Manligas Bonoan ay nagsilbing institusyon sa Kagawaran ng DPWH.  Isang produkto ng Mapua Institute of Technology na nagtapos ng kursong Civil Engineering.  Agad na sumabak si Secretary Manny sa Kagawaran ng dating Department of Public Works and Highways noong administrasyon ni Pres. Ferdinand Marcos Sr.  At matapos nito ay mabilis na umangat sa kanyang posisyon sa dating Ministry of Public Highways hanggat makamit n’ya ang posisyon ng Chief Civil Engineer.  Si Secretary Manny ay nagsilbi ding Assistant Secretary ng DPWH noong 1987, hanggat malagay siya bilang Undersecretary ng Kagawarang ito, at minsa’y naupo din bilang Officer-in-Charge ng DPWH noong 2007.

Sa madaling salita, malawak ang karanasan ni Secretary Manny sa paggawa at pagpapanatili ng mga daan.  Itong karanasan din ni Secretary Manny ang naging dahilan ng kanyang pagkamit ng “Most Outstanding Civil Engineer Award” noong 2006, pati na din ang “Outstanding Alumnus Award ng Government Service”.  Kung kaya’t hindi na dapat pagtakhan kung bakit si Secretary Manny ang naatasan ni Pangulong Ferdinand “Bongbong” Marcos bilang kalihim ng DPWH.  At sa mga rason ding ito taos puso ko pong sinesegundahan ang pagkumpirma kay Secretary Manny bilang Kalihim ng DPWH.

Maraming salamat po, Mr. Chair.

“Mga minamahal kong miyembro ng Commission on Appointments.

Itinuturing kong isang karangalan na i-endorso si Lucas P. Bersamin upang makumpirma bilang ating Executive Secretary.

Mula pagkabata ay nagpakita si Lucas ng angking galing at talino, nang siya’y grumadwayt na Valedictorian sa mababa at mataas na paaralan ng St. Joseph’s Minor Seminary.  Nagpatuloy si Lucas magtapos ng Political Science sa University of the Philippines at ang pag-aabogasya sa University of the East.  Matapos, at sa wakas, ay natapos ang buhay estudyante ni Lucas nang makamit n’ya ang 9th place sa 1973 Bar Examinations.

Matapos ang kanyang maunlad at mapalad na pag-a-abogado, piniling i-alay ni Lucas ang kanyang buong buhay sa serbisyo publiko sa kanyang paninilbihan sa hudikatura. Nagsimula si Lucas bilang isang RTC-Judge sa Quezon City.  Pagkatapos ay nahirang si Lucas bilang miyembro ng Court of Appeals, Supreme Court, hangga’t sya’y mahirang bilang ang ika-25th na Chief Justice lamang ng ating bansa.  Itong angking galing at talino ni Lucas din ang naging rason kung bakit hinikayat s’ya ni dating Pangulong Duterte upang manilbihan bilang Chairperson ng GSIS.

Ngunit higit pa sa lahat ng karangalan na natanggap ni Lucas, at personal ko pong naranasan ito, siya ay mabuting tao, madaling kausap, madaling anyayahan, at malambot ang puso sa tao.  Kaya’t tinuturing kong malaking karangalan n’ung ako’y sumumpa sa kanya noong nahalal ako bilang mayor ng Caloocan.

Ngayon ay humihingi ako ng dispensa kay Lucas dahil hindi pa s’ya nakakapagretiro ng tuluyan, dahil kinagagalak kong i-endorso ang pagkumpirma sa kanya bilang Executive Secretary.”

“Mga minamahal kong Miyembro ng Commission on Appointments, ikinagagalak ko pong segundahan ang pag-endorso sa ad interim appointment ni Raphael Lotilla, o si Popo kung tawagin, bilang Kalihim ng Department of Energy.

Bihira ka makakita ng isang taong sing-edukado o sing-husay ni Popo. bilang isang iskolar, nagtapos si Popo ng kanyang kolehiyo at pag-a-abogasya sa Unibersidad ng Pilipinas, kung saan siya'y ginawaran ng Dean's Medal for Academic Excellence. Tinapos din ni Popo ang kanyang masters of law sa University of Michigan.

Hindi bago kay Popo ang buhay ng isang lingkod bayan. Nagsimula siya bilang Legal Consultant dito sa Senado, na kabilang sina dating Senate President Salonga at Angara,  ay iilan lamang sa mga mambabatas na umimbita kay Popo upang makatrabaho siya. Hindi na rin bago kay Popo na mamahala sa industriya ng enerhiya, dahil dati na rin siyang nanungkulan bilang Secretary of Energy n’ung panahon ni dating President Arroyo.

Ngayon naman ay muling ipinagkatiwala ni President Bong Bong Marcos ang mga pangangailangan ng ating mga mamamayan sa pag-pailaw ng kanilang mga tahanan at lungsod.  Ako din ay buong tiwala sa kakayahan at talino ni Secretary Popo na magagampanan nya muli ang kanyang mga responsibilidad bilang Secretary of Energy, para sa ikabubuti ng ating mamamayan.

Dahil sa mga rasong ito, taos puso k‘ung sini-segundahan ang kumpirmasyon ng  ad  interim  appointment  ni  Popo  Lotilla bilang Secretary ng Department of Energy.”

“Mga minamahal kong Miyembro ng Commission on Appointments.

Ikinagagalak ko na segundahan ang kumpirmasyon ng ad interim appointment ni Jaime Jimenez Bautista bilang Kalihim ng Department of Transportation.

Isa siyang produkto ng Colegio de San Juan de Letran, na nagtapos sa kursong accountancy sa rank na magna cum laude, na matapos pumasa ng CPA exam, nagtrabaho si Jimmy sa pribadong sektor, kung saan patuloy s’yang umangat hangga’t sa nahirang siyang Presidente ng Philippine Airlines, ang opisyal na “Flag carrier airline” ng ating bansa.  Sa kanyang pamamahala, ginawaran ang Philippine Airlines bilang “Most Improved Airline” para sa taong 2019. 

Ang galing at talino ni Jimmy ay pinansin din ng kanyang mga kasamahan sa industriya, kung kaya’t nakamit ni Jimmy ang mga prestihiyosong mga parangal sa industriya, tulad ng “Aviation’s Person of the Year Award”, “People of the Year Award”, “Tourism Personality of the Year”, at mga iba pa.  Ngunit higit sa lahat, dala ni Jimmy ang kanyang hindi matitinag na integridad at malasakit sa kapwa tao.  Sa bawat kumpanya na kung saan nagtrabaho ni Jimmy, agad n’yang nakukuha ang mga puso at loobin ng kanyang mga empleyado at nakatrabaho.  

Ito ding malasakit ang inaasahan kong dala n’ya sa DOTr, lalo ngayon na hindi na lamang mga customers ang kanyang pagsisilbihan, kundi pati na ang buong bansa.  Malaki ang tiwala ko kay Secretary Bautista, kung kaya’t walang takot at taos puso kong sinisegundahan ang kumpirmasyon ng kanyang ad interim appointment bilang Secretary ng DOTr.”

“Mga minamahal kong Miyembro ng  Commission on Appointments, naririto po ako ngayon para taos-pusong segundahan ang motion para sa pagkumpirma ng ad interim appointment ni Sec. Arsenio Molina Balisacan  bilang   Secretary   ng   National Economic and Development Authority.  

Siya ay isa pang maipagmamalaking produkto ng Ilocos Note.  Nagtapos si Arsi, kung siya’y tawagin, sa Mariano Marcos State University sa karangalang Magna Cum Laude.  Nagpatuloy si Arsi sa pag-aaral sa larangan ng ekonomiya sa UP Los Baños hanggang sa matapos n’ya ang pagkadoktor sa ekonomiya sa University of Hawaii sa America.  Ang mga kontribusyon ni Arsi sa akademiya, siya ay nagkamit ng maraming parangal, dito at sa mga ibang bansa.

Kahit n’ung siya’y nag-aaral pa, dineboto na ni Arsi ang kanyang buhay upang maglingkod sa bansa.  Sa loob ng apatnapu’t tatlong (43) taon ni Arsi sa gobyerno, kung saan kinikilala natin si Arsi bilang ang unang Chairperson ng Philippine Competition Commission.  Ngayon, na kahit batang-bata pa si Arsi sa edad na 65, inatasan s’ya ni Pangulong Bongbong Marcos na pangunahan n’ya ang NEDA.  Ito’y nagsisilbing testamento sa galing, talino, at integridad ni Arsi.

Dahil sa mga kadahilanang ito, buong kumpiyansa at tiwala ako sa kanyang pamumuno.  Samakatuwid, sinisegundahan ko po ang motion para sa kumpirmasyon ng ad interim appointment ni Sec. Arsenio Molina Balisacan bilang Secretary ng National Economic and Development Authority.”

“Ginoong Chair,  mga minamahal kong mga Kasamahan sa Komisyong ito,

Ikinagagalak ko pong ipahayag ang aking kagustuhan na   pangalawahan ang pag-endorso para sa kumpirmasyon ng paghirang kay Ginang Cheloy Velicaria-Garafil bilang kalihim ng Presidential Communications Office.

Isa rin pong karangalan para sa akin ang ibigay ang aking suporta sa taong aking kinikilala na karapatdapat  na mamuno ng nasabing opisina  dahil sa kanyang angking katangian at kwalipikasyon.

Sinimulan ni Cheloy ang kanyang karera bilang isang mamamahayag ng Philippine Daily Globe.  Pagkatapos ay nagtrabaho bilang contributor ng Associated Press at Central News Agency  ng tatlong (3) taon, kung saan kanyang hinawakan ang mga balita na may kaugnayan sa pangkalusugan.  Siya rin ay nagsilbi sa People’s Independent Media Inc. ng sampung (10) taon kung saan lubos na napanday ang kanyang kasanayan bilang isang mamamahayag.    

Nagtapos ng abogasya si Cheloy sa Unibersidad ng Sto. Tomas at naging miyembro ng Integrated Bar of the Philippines matapos niyang ipasa ang 2002 Philippine bar exam.  Sinimulan niya ang kanyang karera bilang isang abogado ng  siya ay mahirang na Associate Provincial Prosecutor sa probinsya ng Rizal at pagkatapos ay naging State Solicitor II sa Opisina ng Solicitor General. 

Simula 2012 hanggang 2018, siya ay naging isang Public Relations Practitioner at kinuha bilang Consultant ng Center for Strategy, Enterprise, and Intelligence, at ganoon din ni dating Pangulo Gloria Macapagal-Arroyo at ng ating Pangulo, Ferdinand “Bongbong” Marcos noong 2016 Vice Presidential campaign.

Nagsilbi din si Cheloy sa kamara.  Naging Director II sa Opisina ng Speaker of the House  at itinalaga bilang Legal Staff Chief at Media Director.  Hinawakan din niya ang permanenteng posisyon na Service Director sa ilalim ng Committee on Rules at naging responsibilidad niya ang mga bagay na may kaugnayan sa Rules of the House, Rules of Procedure Governing Inquiries in Aid of Legislation, Rules of Procedure in Impeachment Proceedings, Order of Business, Calendar of Business at marami pang kahalintulad na iba. 

Noong Julyo 2022, siya ay itinalaga bilang Chairperson ng Land Transportation Franchising and Regulatory Board,  at sa maikling panahon, sinimulan niya ang  mga kinakailangang reporma upang paigtingin ang maayos na serbisyo sa LTFRB, kasama dito ang pagsusulong ng interes ng sektor ng transportasyon.   Matapos ang tatlong (3) buwan na pamamalagi sa nasabing opisina, siya ay hinirang bilang Undersecretary at pansamantalang tagapamuno ng Office of the Press Secretary, at pagkatapos, bilang Kalihim ng Presidential Communications Office.

Sa kabila po ng mga napagtagumpayan at naging antas o narating niya sa buhay, si Cheloy ay nanatili pa ring isang simple at mapagkumbabang tao.  Wala po tayong narinig o napag-alaman na bagay na taliwas sa malinis niyang pagkatao.  Sa katunayan, marami ang humahanga sa kanang profesionalismo, dedikasyon at sipag sa trabaho, pagkawang-gawa, malalim na pang-unawa, at abilidad at kakayahan sa maayos na pagganap  ng mga responsibilidad o mandato ng kanyang tanggapan. 

Ginoong Chair, sa taglay na katangian at kwalipikasyon ni Secretary Garafil, ako po ay nakakasiguro na ang Opisina ng Presidential Communications ay mapupunta sa maayos na kalalagayan.  At dahil po diyan ay nais kong  ulitin na  segundahan ang pag-endorso para sa kumpirmasyon ng paghirang kay Ginang Cheloy Velicaria-Garafil bilang Kalihim ng Presidential Communications Office.

Maraming salamat po.”

Maraming salamat.  Magandang hapon po.

Mga minamahal kong Miyembro ng Commission on Appointments.  

Ikinagagalak kong segundahan ang pag-kumpirma sa ad interim appointment ni G. Gilberto Cojuangco Teodoro Jr. bilang Kalihim ng Department of National Defense.

Hindi p’wedeng mamaliitin ang talino, galing at karanasan ni Gibo.  Siya’y nangolekta ng iba't ibang parangal noong siya'y nag-aaral ng pagka-abogasya sa Unibersidad ng Pilipinas, at matapos nito ay nakamit niya ang pinakamataas na grado noong 1989 Bar Examinations.  Hindi nakuntento, si Gibo din ay nagtapos ng kanyang Masters of Law sa Harvard Law School, at siya din ay nakapasa sa bar exam sa Amerika.

Ang kanyang angking galing din ay dinala ni Gibo sa serbisyo publiko, kung saan siya'y nanungkulan bilang Kinatawan ng Unang Distrito ng Tarlac noong 11th, 12th, at 13th Congress kung saan personal kong nakita at naranasan ang kanyang kakayahan.  Nang hindi maaksaya ang kanyang angking galing, nanilbihan na din dati si Gibo bilang ika-33rd Secretary of National Defense, ang pinakabatang mahirang sa posisyong ito, at ika-pangalawa lamang na sibilyan. Hindi na ito nakapagtataka, sapagkat malapit sa puso at diwa ni Gibo ang ating Sandatahang Lakas ng Pilipinas, nakita sa kanyang paghirang din bilang isang Honorary Member ng PMA Class of 76, at Philippine Air Force Cadet Alumni Association.  Sa mga panahong ito na kinakaharap natin, kung saan ang ating soberanya ay sinusubukan ng mga ibang bansang mapang-api, kailangan natin ng isang katulad ni Gibo na buong puso at galing manilbihan ng tapat sa ating gobyerno, at nagtitiwala ako na dala din n’ya palagi ang interes at kaligtasan ng bawat mamamayan at sundalong Pilipino.

At dahil sa lahat ng ito, sa mga minamahal kong kasapi ng Komisyong ito, isang malaking karangalan at lubos po ang aking galak na pangalawahan ang pag-endorso sa kumpirmasyon ng ad interim appointment ni G. Gilberto Cojuangco Teodoro Jr. bilang kalihim ng Department of National Defense. 

“MR. CHAIR, MGA KAGALANG-GALANG NA KASAMAHAN KO SA KOMISYONG ITO.

AKO PO AY NARIRITO NGAYON UPANG IPAHAYAG ANG AKING BUONG PUSONG PAGSUPORTA AT PANGALAWAHAN ANG PAG-ENDORSO PARA SA KONPIRMASYON NG PAGHIRANG KAY GINOONG FRANCISCO TIU LAUREL, JR. BILANG KALIHIM NG KAGAWARAN NG AGRIKULTURA.

AKO PO AY NANINIWALA NA SA ILALIM NG KANYANG MAHUSAY NA LIDERATO AT MALASAKIT SA SEKTOR NG AGRIKULTURA, TIWALA PO AKO NA ITO AY MAGBUBUNGA NG MAKABULUHANG PAG-UNLAD SA ISANG SEKTONG NANGANGAILANGAN NG LUBOS NA PAGKALINGA.

ANG PAGHIRANG KAY SECRETARY TIU LAUREL AY NAGBIGAY NG PAG-ASA AT INSPIRASYON SA MARAMI NATING KABABAYAN, DAHIL SA MALALIM NIYANG PANG-UNAWA SA MGA PANGANGAILANGAN NG ATING MGA MAGSASAKA, MANGINGISDA AT NG BUONG INDUSTRIYA NG AGRIKULTURA.  ANG KANYANG TAGLAY NA TALINO, KAALAMAN, KARANASAN AT KAHUSAYAN AY TIYAK NA MAGBIBIGAY DAAN SA PAGSULONG NG MODERNISASYON, PRODUKTIBILIDAD AT KITA SA SEKTOR NG AGRIKULTURA.

KAYA NAMAN AY AKING INAASAHAN NA SA ILALIM NG KANYANG PAMUMUNO AY MAGKAKAROON TAYO NG MASIGLANG KAGAWARAN NA MAGTATAGUYOD NG MGA INAASAM NA PAGBABAGO NA MAGHAHATID SA BANSA TUNGO SA ISANG MAUNLAD AT MATATAG NA SEKTOR NG AGRIKULTURA.

SUBALIT ALAM KO RIN NA SA LIKOD NG SAMU’T SARING PROBLEMA AT KONTROBERSIYA NA BUMABALOT SA KAGAWARAN NG AGRIKULTURA NGAYON, HINDI MAGIGING MADALI PARA KAY SECRETARY TIU LAUREL ANG PAGPUNO NG MGA PAGKUKULANG NG KAGAWARAN, KAILANGAN NIYA ANG TULONG NG LAHAT, KASAMA ANG BAWAT MIYEMBRO NG KOMISYONG ITO.  KAYA NAMAN PO, AKO AY NANAWAGAN SA AKING MGA KASAMAHAN NA ATING TULUNGAN AT SAMAHAN SI SECRETARY TIU LAUREL, AT ITO AY KAYA NATING SIMULAN SA PAMAMAGITAN NG PAGKONPIRMA NG KANYANG PAGKAHIRANG BILANG KALIHIM NG KAGAWARAN NG AGRIKULTURA.

MARAMING SALAMAT PO.”