Embedded Files
Directorate of Media
Post date: Feb 28, 2017 7:5:15 AM
راگەیاندنى وەزارەتى خوێندنى باڵا و توێژینەوەى زانستى
د. یوسف گۆران وەزیرى خوێندنى باڵا و توێژینەوەى زانستى لەمیانى بەسەرکردنەوەو سەرپەرشتى کردنى کۆبونەوەى ئەنجومەنى زانکۆى هەڵەبجە، بڕیاریدا بەشێک لە کێشە کارگێڕی و دارایيە پێویستییەکانى زانکۆى هەڵەبجە چارەسەربکات، هەروەک راشیگەیاند لەڕێگەى رێکخراوێکى نێودەوڵەتیەوە کار دەکەین بۆ تاوتوێکردنى جێبەجێکردنى پرۆژەی بەرهەم هێنانى کارەبا لەڕێگەى وزەى خۆرەوە بۆ زانکۆى هەڵەبجە.
لەدرێژەى بەسەرکردنەوە مەیدانییەکانى وەزیرى خوێندنى باڵا و توێژینەوەى زانستى بەمەبەستى لە نزیکەوە ئاگادرابوون لە کێشەو گرفتى زانکۆکانى هەرێمى کوردستان، ئەمڕۆ یەکشەممە ٢٦-٢-٢-٢٠١٧ د. یوسف گۆران وەزیرى خوێندنى باڵا و توێژینەوەى زانستى، زانکۆى هەڵەبجەى بەسەرکردەوەو سەرپەرشتى کۆبونەوەى ئەنجومەنى زانکۆى هەڵەبجەى کردو لە کۆبونەوەکەدا بڕیارى چارەسەرى کێشە پێویست و هەنووکەییەکانى زانکۆكە درا.
لەکۆبونەوەى ئەنجومەنى زانکۆى هەڵەبجە کە هەریەک لە د. ئاراس مستەفا سەرۆکى زانکۆى هەڵەبجەو د. ئامانج عەبدوڵا سەعید راوێژکارى وەزیر و د. خەتاب ئەحمەد شێخانى بەڕێوەبەرى گشتى کارگێڕى و دارایى وەزارەت و راگێرى کۆلێژەکانى زانکۆى هەڵەبجە ئامادەی بوون، د. يوسف گۆران وەزیرى خوێندنى باڵا و توێژینەوەى زانستى سەرپەرشتى کۆبونەوەى ئەنجومەنى زانکۆى هەڵەبجەى کرد.
لەسەرەتاى کۆبونەوەکەدا د. یوسف گۆران لەوتەیەدا رایگەیاند مەبەستى سەرەکیمان بۆ سەردانى پارێزگاى هەڵەبجەو سەرپەرشتى کۆبونەوەى ئەنجومەنى زانکۆکە بریتیە لە گوێگرتن لە کێشەو گرفتەکانى زانکۆکەو هەوڵدان بۆ دانانى میکانزمێکى گونجاو بۆ چارەسەرى کێشەکانى زانکۆى هەڵەبجە بەتایبەت ئەو کێشانەى لە دەسەڵاتماندایە، بۆ ئەمەش لە وەزارەتەوە درێغى ناکەین بۆ خزمەتکردن بە خەڵکى هەڵەبجەو خوێندکارانى سنورەکە بۆ ئەوەى لەئاست ئەو زوڵم و ستەمانەى لەسەردەمى رژێمى بەعس لەو شارە کراوە، بتوانین بەخزمەتکردن بە هەڵەبجە کەمێک لەو ئازارە کەم بکەینەوە، بەتایبەتیش چارەسەکردنى کێشەکانى زانکۆى هەڵەبجە وەک گرفتى بەشە ناوخۆییەکان و نەبوونى سووتەمەنى و دابینکردنى کەلوپەل و پێداویستى و میلاک. وتیشى ئەو کێشانەشى پەیوەندى بە وەزارەتەکانى دیکەى حکومەتەوە هەیە لەڕێگەى خۆمانەوە هەوڵ بۆ چارەسەرکردنیان دەدەین.
وەزیرى خوێندنى باڵا و توێژینەوەى زانستى وتیشى درک بە ماندووبن و هەوڵى مامۆستاو فەرمانبەرانى زانکۆکەتان دەکەین و لەوە تێدەگەین کە هەوڵ بۆ پێشخستنى زانکۆکەتان دەدەن. بەڵام لەگەڵ ئەوەشدا دەبێت باشتر لە رابردوو بەردەوام بین لە پێشخستنى زانکۆى هەڵەبجە، بۆیە ئەرکى هەموومانە بایەخى زیاتر بە زانکۆکە بدەین هەوڵ بدەین بۆ پێشخستنى توانا زانستى و ئەکادیمییەکان.
لەبەشێکى دیکەى وتەکەیدا د. یوسف گۆران وەزیرى خوێندنى باڵا و توێژینەوەى زانستى رایگەیاند کێشەى زانکۆ بچووکەکان بەبەراورد بە زانکۆ گەورەکان زیاترە ، چونکە بەهۆى ئەوەى تازە دروست بوون و ستاف و تواناى زانستى و ئیدارییان کەمترە، بەڵام لەماوەى دوو ساڵى رابردوو و لە ئێستاشدا بەبەردەوام هاوکارى و پاڵپشتى زانکۆکانمان کردووە بۆ ئەوەى بتوانین ئاستى زانستییان پێش بخەین و ئەو کێشە ئیدارى و داراییانەى هەیانە چارەسەریان بۆ بکەین، بۆیەش لەم روەوەو وەزارەتەکەمان درێغى ناکات بۆ بەرزکردنەوەى ئاستى زانکۆکەو هاوکارى کردنى لەبوارە جیاجیاکاندا.
وەزیرى خوێندنى باڵا و توێژینەوەى زانستى ئاماژەى بە پرۆژەى سەربەخۆى دارایى زانکۆکان کردو رایگەیاند، ئامانج لەم پرۆژەیە بۆ ئەوە بوو زانکۆکان بتوانن پشت بەخۆیان ببەستن و گەشە بەخۆیان بدەن لەڕووى زانستى و کارگێڕیدا و هەنگاو بە هەنگاو کێشەکانمان لە زانکۆکان چارەسەربکەین. بۆیەش زانکۆى هەڵەبجە وەک هەریەک لە زانکۆکانى دیکەى هەرێمى کوردستان، دەتوانێت سوود لە داهاتەکانى وەربگرێت بۆ بەرەو پێش بردنى ئاستى زانستى و ئەکادیمى زانکۆکەو پڕکردنەوەى پێداویستییە گرنگەکانى کە پێویستن بۆ شێوازى بەڕێوەبردنى زانکۆ.
لە کۆتایى وتەکەیدا د. يوسف گۆران وەزیرى خوێندنى باڵا و توێژینەوەى زانستى ئاماژەى بە پرۆژەى یەکێک لە ڕێکخراوە نێودەوڵەتییەکان کرد بەمەبەستى جێبەجێ کردنى بۆ زانکۆى هەڵەبجە. کە ئەویش بریتیە لە تاوتوێکردنى جێبەجێکردنى پرۆژەیەک لەلایەن رێکخراوێکى نێودەوڵەتى بۆ بەرهەم هێنانى کارەبا لەڕێگەى وزەى خۆر بۆ زانکۆى هەڵەبجە. لەئێستاشدا ئەم پرۆژەیە لە قۆناغى دیراسەدایەو وابڕیارە دواى ئەنجامدانى مەسحێکى مەیدانى بۆ پرۆژەکە بڕیار لەبارەى جێبەجێ کردنى بدرێت.
هەر لەو کۆبونەوەیەدا د. ئاراس مستەفا سەرۆکى زانکۆى هەڵەجە بەوەکالەت، لە وتەیەکدا ئاماژەى بە گرنگى پێدانە بەردەوامەکانى وەزیرى خوێدنى باڵا وتوێژنەوەى زانستى بۆ زانکۆى هەڵەبجە دوپاتکردەوەو رایگەیاند، ئەم سەردانەى وەزیرى خوێندنى باڵا و خەمخۆرى بۆ زانکۆکە نیشانى ئەوە دەدات کە خەمخۆرى خەڵکى هەڵەبجەو زانکۆکەیە، چونکە زانکۆى هەڵەبجە زانکۆى هەمووانە و بەخوینى شەهیدان دروستکراوە. بۆیە پێویستمان بەهەماهەنگى و هاوکارى وەزارەتە بۆ چاسەرەکردنى ئەو کێشانەى کە پێوستە و گرنک بۆ بەرەو پێش بردنى زانکۆکە.
لەبەشێکى دیکەى سەردانەکەیدا بۆ زانکۆى هەڵەبجە وەزیرى خوێندنى باڵا و توێژینەوەى زانستى دادگاى نمونەیى لەبەشى یاساى زانکۆى هەڵەبجە کردەوە، کە سوودى ئەم دادگا نمونەییە برییتیە لە پەیرەوکردنى شێوازى پراکتیکى لە چۆنیەتى بەرزکردنەوەى سکاڵا لە دادگا بۆ خوێندکارانى کۆلێژى یاسا و دەرەوەى زانکۆ.
لە کۆتا سەردانەکەیدا بۆ زانکۆى هەڵەبجە د. یوسف گۆران وەزیرى خوێندنى باڵا و توێژینەوەى زانستى ، بەشێک لە کۆلێژ و بەشەکانى زانکۆکەى بەسەر کردەوەو لەنزیکەوە لەگەڵ مامۆستایان و خوێندکارانى بەشەکان گفتوگۆى کرد لەبارەى پرۆسەى خوێندن و بەرزکردنەوەى ئاستى زانستى و پەرەپێدانى تواناى خوێندکاران لە وانەکانیاندا.
جێگەى ئاماژەیە هەر ئەمڕۆ یەکشەممە رێکەوتى ٢٦-٢-٢٠١٧ د. یوسف گۆران وەزیرى خوێندنى باڵا و توێژینەوەى زانستى بەیاوەرى ستافى وەزارەت و زانکۆى هەڵەبجە، سەردانى پارێزگاى هەڵەبجەى کردو لەلایەن عەلى عوسمان پارێزگارى هەڵەبجە بەوەکالەت و نوخشە ناصیح قائیمقامى هەڵەبجە پێشوازی لێکرا. لەمیانى سەردانەکەدا هەردوولا جەختیان لەسەر بەرەوپێش بردن و گەشەپێدانى زانکۆى هەڵەبجە کردەوە، لەلایەن خۆشیەوە وەزیرى خوێندنى باڵا توێژینەوەى زانستى سەرجەم پشتیوانییەکانى وەزارەتى خوێندنى باڵاى بۆ چارەسەرکردنى کێشەکان و بەرەوپێش بردنى زانکۆکە دوپاتکردەوە.
Report abuse