Jarðarberjasulta prentvæn útgáfa

Engin búðasulta er kemst með tærnar þar sem þessi er með hælana. Ef þú ert svo heppin að vera með fullan garð af jarðarberjaplöntum og ert í vandræðum með að nýta berin, er þetta frábær leið. En ef þú ert eins og ég, og þarft að kaupa þín ber, er það allt í þessu fína, sultan er samt best af öllum ... :-)

Það sem til þarf í ca. 5 litlar krukkur er:

400 gr. sultunarsykur með pektíni

1 sítróna, safi og börkurinn, fínrifinn

650 gr. jarðarber

En svona er hún gerð:

Berin eru hreinsuð, stilkurinn tekinn af og þau þvegin og skorin í tvennt, eða í stóra bita (fer eftir stærð). Sykur, sítrónusafi og fínrifinn börkurinn er sett í pott og látið malla við mjög lágan hita í 10 mín., eða þar til sykurinn er bráðinn. Þá eru berin sett útí og látið malla saman í 20 mín. við lágan hita, þar til berin eru meyr og farin að gefa frá sér vökva. Það er gott að athuga hvort sultan er mátulega þykk með því að setja 1 tsk. af vökvanum á kaldan disk og láta hann renna um diskinn, ef hann hleypur strax er sultan tilbúin. Úr þessari uppskrift færðu 5 litlar krukkur. Krukkurnar eru fylltar alveg í topp og er hringur úr smjörpappír sniðinn í hverja krukku og lagður ofaná maukið, svo er krukkunni lokað vel og hún geymd á hvolfi þar til hún er alveg köld. Geymist í kæli.

Svona sótthreinsa ég krukkur:

Ég hita ofninn í 150°C. Nýþvegnum krukkum og lokum er raðað í ofnskúffu og þær bakaðar í ofninum í 20 mín. Sultunni er ausið sjóðheitri í krúkkurnar.

ATH. Passa puttana sultan og krukkurnar eru heitar!