Það sem til þarf er:

F. 4-5

Rauðvínssósan:

2 skarlottulaukar, afhýddir og skornir fínt

2 dl gott rauðvín

1 stór grein ferskt timían

4 dl lambasoð, (vatn og ca. 1 Knorr teningur)

1 msk. rifberjahlaup

Skvetta af púrtvíni

Sósujafnari

2 msk. ískalt smjör

Sjávarsalt og nýmalaður svartur pipar

Rösti kartöflurnar:

3 stórar bökunarkartöflur, skrældar og rifnar á grófu rifjárni

Ólívu olía, til að steikja þær upp úr

Sjávarsalt og nýmalaður svartur pipar

Rótar grænmetið:

4-5 gulrætur, skrældar og skornar í lengjur 

3-4 steinseljurætur, skrældar og skornar í lengjur

Ólívu olía

Sjávarsalt og nýmalaður svartur pipar

Lambalundirnar:

4-6 lambalundir, sinahreinsaðar

1 msk. smjör 

1 msk. olía

1 stór grein fersk timían

Sjávarsalt og nýmalaður svartur pipar

Hér er á ferðinni uppskrift af dásamlegum helgarmat.  Uppskriftin er úr gömlum bækling frá Markaðsráði kindakjöts frá 2004, en var alveg búin að gleyma honum.   Ég notaði uppskriftina mikið á sínum tíma, gerði hana mjög oft, við góðan orðstýr.  En eins og allar uppskriftir, sem maður gerir oft, er ég búin að setja minn svip á hana og breytt henni, til betri vegar, að mínu mati.  Þegar ég fann bæklinginn aftur (var að taka til í blaða- og úrklippusafninu mínu) tók ég hann til hliðar og hét því að elda lundirnar aftur, til að athuga hvort þær stæðust væntingar, það eldast nefnilega ekki allar uppskriftir jafn vel.  Þær stóðust fyllilega væntingar og eru aftur komnar í uppáhald.  Endilega prófaðu og sjáðu hvort þú kemst á mína skoðun.  Þær eru einfaldar og mikið hægt að gera fyrir fram ef þú ætlar að bjóða gestum upp á lundirnar ;-)

Svona geri ég:

Rauðvínssósan:  Skarlottulaukurinn er saxaður smátt.  1 msk. smjöri er brætt á pönnu og laukurinn steiktur, á lágum hita, án þess að hann brúnist í 3-4 mín., þá er timian greinin sett á pönnuna, ásamt rauðvíninu og og soðinu og það látið sjóða niður um tæpan helming.  Þá er rifberjahlaupið sett út í sósuna og smakkað til, með slettu af púrtvíni, sjávarsalti og nýmöluðum svörtum pipar.  Nú getur þú valið hvort þú sigtar laukinn frá sósunni, það þykir fínna, ég læt hann vera áfram í henni, en timian greinin er tekin úr og henni hent.  Ef þú sigtar hann frá, er sósan sett aftur í pottinn á hita og hún þykkt með sósujafna. Þegar hún er orðin eins þykk og þú vilt, er potturinn tekinn af hitanum og kalda smjörið sett út í og hrært stöðugt í sósunni á meðan smjörið bráðnar.  Geymd þar til á að nota hana.

Rösti kartöflurnar:  Kartöflurnar eru skrældar og rifnar á grófu rifjárni.  Til að ná sterkjunni úr kartöflunum, þarf að "vinda" þær, annars verður rösti-ið allt of blautt.  Ég tek lúkufylli af rifnum kartöflum og kreisti þær eins og ég get og set "undnu" kartöflurnar á disk.  Svo eru mótaðar ca. 6 stk. af rösti klöttum.  Olía er sett á góða pönnu og þær brúnaðar þar til þær eru gylltar og vel steiktar.  Á þessu stigi getur þú geymt þær í ísskáp yfir nótt, eða fryst þær.  Þegar á að nota þær eru þær afþýddar og ofninn hitaður í 200°C.  Rösti-ið er sett á pappírsklædda ofnplötu og bakaðar í 15-20 mín., eða þar til þær eru heitar og gegn steiktar.

Rótargrænmetið:  Steinselju- og gulræturnar eru skrældar og skornar í lengjur.  Settar í rúmgott eldfast fat, eða í ofnskúffuna, velt upp úr ólívu olíu, sjávarsalti og nýmöluðum svörtum pipar.  Steikt á 200°C, í 40-50 mín. þar til ræturnar eru fullsteiktar og farnar að ristast á köntunum.

Lambalundirnar:  Lundirnar eru hreinsaðar og allar sinar skornar af þeim.  Þeim er rúllað upp og prjóni eða trépinna stungið í gegnum þær.  Saltaðar og pipraðar.  Smjör er brætt á pönnu og olíu hellt á hana líka, svo smjörið brenni síður, timian greinunum er bætt á pönnuna líka.  Lundirnar eru steiktar í 3-5 mín. á hvorri hlið og smjörinu ausið yfir þær á meðan.  Þegar þær eru steiktar, eru þær látnar hvíla í um 5 mín. á disk með álpappír yfir.  Mestu af smörinu á pönnunni, er hellt af henni og sósan hituð á pönnunni og steikarskófirnar skafnar upp í sósuna.  Hellt í skál og borin á borð.

Borið á borð:   Ef þú setur á disk fyrir hvern og einn, er rösti kartaflan sett neðst, síðan er lundin sett ofan á hana og grænmetinu svo raðað fallega  á diskinn, ásamt smávegis af sósunni.

Verði þér að góðu :-)