Bóndadags kótelettur

Ég veit ekki hvað gleður þinn bónda á Bóndadaginn kæra vinkona, en minn, eru það gamaldags barðar kótelettur í raspi (ekki þetta fína heimagerða), með Ora baunum, kartöflum, rabarbarasultu og MIKLU bræddu smjöri, vel brúnuðu... ;-) Hann er nefnilega "Bolur inn við bein, og er stoltur af því...." Það þýðir ekki að bjóða þessari elsku Sushi eða eitthvað nútímalegt og fancý á deginum HANS, nei takk. Og þar sem dagurinn snýst um að gleðja hann, er ekki nema sjálfsagt að verða við því. Hefðin hjá okkur hjónunum byrjaði í matarboði sem góð vinkona hélt fyrir hestahópinn okkar fyrir nokkrum árum. Hún er mikill matgæðingur og eldar allavega mat, en þessi gamli góði er hennar specilaity. Hún bauð upp á gamaldags kótelettur og ég hef aldrei setið við matarborð þar sem önnur eins unaðshljóð komu frá gestunum, sérstaklega körlunum svo mikil var gleðin og ánægjan (reyndar hjá okkur konunum líka). Svo fóru þeir að spyrja okkur elskurnar sínar " .... af hverju þeir fengu aldrei svona mat heima??? Svo mitt svar við því var, á Bóndadaginn elskan :-) Verði þér að góðu!!! :-)

Eins mikið og HANN langar í ;-)

Eins margar lambakótelettur og Bóndann þinn langar í

1-2 egg

Paxo rasp

Salt og pipar

Smjör til að steikja uppúr og hafa með, mikið af því, ekki spara það ;-)

Meðlæti:

Ora grænar baunir

Rababarasulta

Kartöflur

Svona gerði ég:

Ofninn er hitaður í 180°C. Gamli buffhamarinn hennar Önnu Kidda ömmu, kemur sterkur inn þegar þarf að berja kóteletturnar þunnar. Síðan er þeim vel uppúr léttþeyttum eggjum og að lokum Paxo raspi (engu öðru), saltað og piprað. Góð klípa af smjöri er brædd á pönnu og kóteletturnar steiktar í smjörinu það til þær taka lit og eru stökkar að utan, svo bætir þú smjöri á pönnuna eftir þörfum á meðan restin er steikt. Steiktu kótelettunum er svo stungið í ofninn og haldið heitum á meðan þú steikir restina. Kartöflurnar eru soðnar, og mér finnst gott að stinga hálfopinni baunadósinni (taka miðann af) í ofninn á meðan ég steiki kjötið, þá hitna þær á meðan og enginn pottur að vaska upp :-) Þegar allar kóteletturnar eru steiktar, er stórri sneið af smjöri skutlað á pönnuna í lokin og það brætt og látið brúnast svolítið og borið fram með, ásamt einum ísköldum að hans vali ;-)

Verði honum að góðu :-)