Það sem til þarf er:

F. 6

75 gr. mjúkt ósalt smjör

75 gr. ´Nduja 

1/2 skarlottulaukur, fínsaxaður

2 msk. sherrý edik

Lítil lúka ferskt kóríander, gróft saxað

Sjávarsalt og nýmalaður svartur pipar

6 stk. risa hörpuskeljar

Ég verð alltaf svo forvitin þegar ég sé nýtt og spennandi hráefni í búðarhillunum, eitthvað sem ég þekki ekki.  Ég kaupi oft eitt stykki til að sjá hvað málið snýst um.  ´Nduja (nei ekki prentvilla) er mjúkt kryddað svínakjöts mauk, með chili, frá Calabriu á Ítalíu.  Það rífur svolítið í, með reyktum undirtón og er frábært krydd.  Ég sá þessa uppskrift í blaði og ákvað að prófa hana.  Hún er einföld og svakalega góð.  Endilega splæstu í krukku af ´Nduja og prófaðu :-)

Svona gerði ég:

´Nduja maukið er sett á kalda litla pönnu, hitað að meðalhita og maukið er brotið í sundur með bakhliðinni á skeið, þar til fitan er farin að leka út og mýkjast.  Látið kólna að stofuhita, en síðan er því blandað mjög vel út í mjúka smjörið.  Blöndunni er stungið í ísskáp í smástund svo það harðni aðeins.  Síðan er smjörið sett á bökunarpappír og því rúllað í mjóa rúllu, sem er álíka stór og hörpuskelin,  snúið upp á endana og rúllunni stungið í ísskápinn þar til smjörið er hart.  Í lítilli skál er skarlottulauknum, kóríander laufunum og sherrý edikinu, sjávarsaltinu og nýmöluðum svörtum pipar blandað saman og sett til hliðar (best að setja kóríanderinn út í sem allra síðast, svo hann tapi ekki lit).  Hörpuskelin er afþýdd og smjörið er tekið úr kælinum.  Ein hörpuskel er sett í skel eða í lítið eldfast form/disk, og þykk sneið af smjöri er sett ofan á hverja hörpuskel.  Grillið í ofninum er hitað á hæsta hita og skeljunum stungið undir grillið í 5 mín., þar til smjörið er freyðandi og fiskurinn farinn að brúnast aðeins.  Borið á borð sjóðandi heitt með edikblöndunni og brauði til að moppa smjörinu upp úr skeljunum.  Ískalt Prosecco er fullkomi með.

Verði þér að góðu :-)