Logging er den mest tidkrevjande delen av arbeidsprosessen i minnesamling med video. Mange vil også seie at det er den viktigaste. Gjennom prosjektet "Munnleg historie for alle" forsøker Memoar nå å bygga opp eit "loggarlag" - eit nettverk av frivillige som kan tenkja seg å vera med å dokumentera munnleg historie gjennom logging. for å bli "autorisert" som loggar, må du helst gå gjennom eit kurs, i det minste dette kortkurset på nett. I tillegg må du signera ei
taushetserklæring.
Loggen skal gi brukarar (i framtida og i dag) eit oversyn over kva intervjuet handlar om, og kor dei kan finna det dei har lyst til å sjå. Her har Bjørn Enes forsøkt å forklara:
Datakunnskap:
Du treng
nesten ingen datakunnskap for å kunne hjelpa til med logging.
Du må kunne dobbeltklikka på adressa, slik at nettsida med videoen opnar seg.
Så må du kunne skriva inn passord.
Du startar og stoppar videoen med den breie orddelingstasten nederst på tastaturet ditt.
Eit trykk = start. Og når videoen går, stoppar du han med ett nytt trykk på mellomromstasten.
Meir datakunnskap treng du ikkje!
"Perler på ei snor":
Eit munnleg historie-intervju er som ei lang snor, tettpakka med perler. Kvar perle er ei delforteljing.
Det viktigaste du må kunne er å lytta.
Det viktigaste du må trena opp, er å evnene til å bestemma kor kvar perle startar.
Tidskoder:
Slike "koder" er ikkje meir komplisert enn
informasjon om kor mange timar, minutt og sekund som har gått sidan start.
01:23:12:00 betyr ein time, 23 minutt, 12 sekund og 0 hundredels sekund.
(Hundredelane treng me ikkje bry oss om når me loggar. Det er greit å vite at nokre dataprogram har dei med (WeVideo, Excel), andre ikkje (Vimeo, Google rekneark)).
Du finn tidskodane nede til venstre i videobildet når videoen går. Du må kanskje føra musepeikaren over der for å få dei fram.
Stikkord:
Formålet med stikkorda er å gjera videoen søkbar. Brukarar - no og i framtida - som søker etter noko som finst i dette opptaket, skal fyrst finna nettsida der loggen står. Når dei ser loggen, skal dei raskt kunne få eit overblikk over kva det inneheld. Vil dei så sjå nærare på det, skal dei like raskt kunne finna tidskodane for det dei vil sjå på. Aller helst skal desse tidskodane også vera klikkbare.
Ein kunst er å bruka sannsynlege søkeord: Finst det ei emneordliste for fagfeltet, så er det fint å bruka ord frå den.
Ein annan kunst er å bruka forteljaren sine formuleringar. Mange er interesserte i språk og språklege særtrekk.
Eit tredje kunst er å markera "gullkorn" - særleg gode formuleringar - gjerne med direkte sitat.
Dette er ein samansett kunst. Me blir sikkert aldri perfekte - men truleg blir me betre for kvar gong me lagar ein logg!
Etikk:
Ein viktig del av loggejobben er å vurdera om det finst etiske eller juridiske problemfelt i intervjuet.
Viss du finn slike, er det viktig å markera dei tydeleg, slik at prosjektleiar ser dei når ho/han får loggen. Marker - gjerne med raudfarge - kor dei startar (tidskode), og kor dei er gått over.
Blir det sagt noko om ein namngitt person, som ho/han må ha rett til å forsvara seg mot?
Seier intervjuobjekt eller intervjuar noko som dei truleg ikkje forstår kan skade dei?
Blir det sagt noko om born som dei kan oppfatta som sårande - no eller om tjue år?
Blir det sagt noko konkret om helse eller eller annan sensitiv informasjon som bør klippast ut i ein publiseringsversjon?
Papir og blyant:
Det gode og gamle verktøyet er ofte også det mest effektive! Også for folk som er vande med datamaskinar
Fyrst: Kok kaffi! Logging er spennande og hyggeleg - og då høyrer det saman med kaffi (eller te)
Lag to kolonner - ei smal og ei brei. Den smale er for tidskodar - den breie for stikkord:
Leit etter perle nr. 1 - skriv ca tidskode, noter ord som du merkar deg i den breie kolonna. Stopp videoen av og til.
Ikkje bry deg om rettskriving eller setningsform - det tar du i runde to
Finn du etiske problemfelt, så marker dei gjerne med farge
Når du er ferdig, reinskriv du stikkorda. Køyr eventuelt gjennom ein gon til for å sjå at tidskodar og stikkord fungerar.
Viss du er vand med PC så er det veldig fint om du skriv den ferdige loggen inn i eit rekneark (Google rekneark eller Excel)
(Det går også fint å skriva inn i eit tekst-program. Bruk då tabulator (tab) mellom tidskode og stikkord.
PC eller Mac eller Chromebook:
Viss du er så vand med datamaskin at det er lettare enn papir og blyant, gjer du det på same måten. Hugs kaffien!
Eit godt tips er å dela skjermen, eller å redusera vindauga slik at du kan skriva logg og sjå video på same tid.
Ferdig!
Send ferdig logg til prosjektleiar. Hugs å ta med markeringar av eventuelle etiske problemfelt. Har du ikkje fått adresse til prosjektleiar, så send loggen til post@memoar.no. Send han gjerne også til ho eller han som skal redigera, viss du veit kven det er.
Takk for innsatsen!
Bli med på dugnad!
Hjelp til å utarbeida innhaldslogg og tekstsamandrag av opptaket over!
Viss opptaket er sperra med passord må du fyrst vurdera og signera eit taushetsløfte som du så må senda til post@memoar.no. Sjå meir om logging under Ny samlar?
