FORMANNSPÓSTUR

                                                - BERLÍNARSLAGUR -

          Frostaskjóli, 18. janúar 2010

Ágætu skákbræður

Í verkahring stjórnar er að hvetja ykkur til dugnaðar og hetjudáða á nýju ári.

Eins og ykkur er  kunnugt hefur Skákdeildin á undanförnum árum staðið fyrir fræknum utanlands- og keppnisferðum og er nú í bígerð ein slík ferð til Berlínar að vori, nánar tiltekið þann 7.-10. maí nk.

Flogið verður utan með Express. Viðræður hafa staðið yfir að hálfu formanns ferðanefndar til að tryggja sem hagkvæmast verð og kjör.  Flugferð er um  21.500 kr

hvora leið og hótel mun láta nærri að kosta um 9.000 kr.á ferðalang pr. nótt.

Samist hefur um að mjög hagstætt heildarverð eða alls kr. 83.700 fyrir allan pakkann, þ.e. flug m.sk; gistingu m.mv, akstur til og frá flugvelli, kynnisferðir og ísl. fararstjórn.  

Áform okkar eru að fara fyrir fríðum og harðsnúnum flokki og tefla á allt að 25 borðum við einn elsta og virtasta skákklúbb Berlínar,  Kreuzberg Schack Club.  Við treystum því og vitum að mikill áhugi er fyrir ferðinni og því eru menn hér með  hvattir til þess að kynna sér vel meðf. ferðaáætlun og skrá sig sem fyrst hjá ESE til þátttöku.  Góðvinir okkar og skákfélagar úr öðrum klúbbum eru einnig velkomnir.

Til að létta okkur róðurinn og hjálpa okkur að rata um refilstigu Berlínar hefur orðið að ráði að semja við (eitt sinn) unga snót, Lilju Hilmarsdóttur, sem aðalfararstjóra, en hún veit allt um borgina og söguna, sem þörf er á að vita og mikið meira til.  Utan þess að lemja á þarlendum á hvítum reitum og svörtum mun ferðin í bland verða hin besta skemmti- og menningarreisa ef að líkum lætur, með hliðsjón af fyrri ferðum til Danamerkur og Skotlands og fleiri landa, þar sem við höfum jafnan haft sigur.   

Þá vill stjórnin greina frá að áhugi er fyrir því hjá Taflfélagi Garðabæjar að tefla við liðsveit okkur á allt að 25 borðum í æfingarskyni og til yndisauka fyrir herförina miklu á hendur Þjóðverjum.   Fyrirkomulag þeirrar skákkeppni á eftir að útfæra.  Menn eru beðnir um hugmyndir og hvattir til þess vera með þegar þar að kemur og skrá sig sem fyrst til þátttöku í herferðina miklu til Þýðverjalands.

f.h. Stjórnar SD-KR

KSt – formaður   (Forri der Fürer)

27.12.09

Ágætu vinir og skákfélagar.

Formaður vor "Forri" (dregið af Der Fürer) hefur skorið upp herör eins og fram kom í orðsendingu Sigurðar Herlufsen, ritara, fyrr í dag. Það verður ekkert gefið eftir né slakað á þótt Jól standi enn, í raun alveg fram að 13ánda að fornum sið.

JólaMenta  (dregið Tournament) 13 umferðir/7mín. verður háð annað kvöld þann  4. i Jólum  eins og ekkert hafi í skorist og svo NýársMenta mánudagskvöldið 4. janúar og svo reglulega allt næsta skákár að sjálfsögðu.  Félagar eru eindregið hvattir til að mæta og til að draga ekki af sér við taflmennskuna.


Gleðilega "rest" og sigursælt komandi ár.

"Sjáumst og Kljáumst"

ese.

20.12.09

JÓLAKAPPTEFLI KR 2009

Jólamót Skákdeildar KR fór fram með pomp og prakt á mánudagskvöldið var (21.12.09).  Afar góð  og mikil jólastemmning var á mótstað og á þriðja  tug þátttakenda.  Kappteflinu lauk með glæsilegum sigri Siginga Sigurjónssonar, sem hlaut 12 vinninga af 13 mögulegum. Fast á hæla honum fylgdu gamalkunnar skákkempur, þeir Bragi Halldórsson með 11.5 v. og Gunnar Kr. Gunnarsson með 9.5.

Skákdeild KR:

JÓLAKAPPTEFLI á vetrarsólstöðum

Skákkvöldin í KR hafa verið lífleg að venju í haust. Um 20 skákkempur eða fleiri etja þar vikulega kappi að jafnaði og hart tekist á, snertur maður hreyfður og ekkert gefið eftir.   Mótin fara fram á mánudagskvöldum kl. 19.30 allan ársins hring, nema helgidagar hindri, þá frestast þau til þriðjudags. Telfdar eru 13 hraðskákir / 7 mín.

Á mánudagskvöldið kemur, 21. desember, á vetrarsólstöðum,  verður haldið sérstakt hraðkapptefli með jólaívafi. Efstu menn kvöldsins verða leystir út með jólakonfekti og vinningahapprætti í gangi.  Allir velkomnir.  

Sigurvegarar undanfarið hafa verið þessir:

Dr. Ingimar Jónsson; Vilhjálmur Guðjónsson (2);  Jón G. Friðjónsson (2); Gunnar Kr. Gunnarsson(2); Gunnar Skarphéðinsson; Jón Torfason.    Sigurður A. Herluvsen; Siguringi Sigurjónsson;  Ingimar Halldórsson, Guðfinnur R.  Kjartansson; Stefán Þormar Guðmundsson; Ingólfur Hjaltalín hafa fylgt þessum þekktu skákmönnum fast eftir  og Ólafur Gísli Jónsson; Kristinn Bjarnason; Jón Steinn Elíasson, Páll G. Jónsson, sem og  hirðskáldið Kristján Hreinsson að ógleymdum formanninum Kristjáni Stefánssyni, hafa átt þar afar athyglisverða og góða spretti.  

Okkar maður

Siguringi Sigurjónsson sigraði glæsilega

á Skákþingi Garðabæjar og Hafnarfjarðar.

Tvísmella á myndir og töflur til að stækka!

Skákdeild KR 10 ára.

Blásið til sóknar með flugeldasýningu.

26.10.1999-2009 markar söguleg tímamót í starfi Skákklúbbs KR, sem nú starfar sem sjálfstæð deild innan KR, undir hinni stóru regnhlíf og fána Knattspyrnufélags Reykjavíkur, sem jafnan setur markið hátt. Hann hefur fjölmarga valinkunna og öfluga skákmenn innan sinna raða. Af þessu tilefni hefur forysta skákdeildarinnar mótað henni nýja framtíðarstefnu. Þar er rík áhersla er lögð á einbeittan sigurvilja og glæstan árangur á hvítum reitum og svörtum í anda hins gamalgróna og  metnaðarfulla móðurfélags. 

Auk vikulegra skákkvölda/æfinga verður nú aukin áhersla lögð á að efla keppnissveitir klúbbsins og gróskumikið unglingastarf undir merkjum hans.  Á Íslandsmóti skákfélaga í september sl. mátti sjá þess merki en þar mætti KR  tvíelt til leiks með 5 sveitir, eina í 2. deild og fjórar í 4. deild, þar af eina unglingasveit. Góðar horfur er á því að í vetur muni tvær sveitir fara upp um deild, ein upp í 1. deild og önnur upp í 3. deild.

Í framtíðinni er ein sveit í hverri deild markmiðið enda á skákdeildin ýmis leynivopn upp í erminni í samstarfi við vinaklúbba sína erlendis. Áður hafði verið efnt til samvinnu við Örebro skákklúbbinn í Kaupmannahöfn og liðsmenn þaðan teflt með KR. Nú hefur einnig verið efnt til samstarfs við Marshall Chess Club í New York og vera má að 2 ungir bandarískir stórmeistarar tefli undir merkjum  KR áður en langt um líður.  Áformað er að heimsækja NY vorið 2012 þegar Skák(her)deildin, (KR Chess Artillery) mun etja þar kappi á 20 borðum eða svo. 

Í maí næsta vor er hins vegar á dagskrá að herja á Sambandslýðveldið Þýskaland og tefla við lið Kreuzenberg Schachklub í Berlin í framhaldi af góðum sigrum gegn Dönum 2008,  Skotum 2006 og Færeyingum, en keppnislið klúbbsins hefur farið utan í víking annað hvert ár.  Í skákæfingu í gærkvöldi var afmæli klúbbsins fagnað með viðeigandi hætti, veisluhöldum og flugeldasýningu á hvítum reitum og svörtum.  Innan tíðar  er fyrirhugað að halda skákhátíð þar sem Unglingamót Vesturbæjar og Opið á Hvatskákmót með góðum gestum verður á dagskrá. Þar verður m.a.keppt um "Knattspyrnuhrókinn", gamlan farandgrip sem gefin var til KR, endur fyrir löngu af merkismanninum Bergi Bergssyni, markmanni.

Dagskráin verður nánar kynnt síðar.

Forystumaður að stofnun klúbbsins og formaður hans frá upphafi er Kristján Stefánsson, hrl.

Úrslitin á afmælisæfingu KR:

1. Gunnar Skarphéðinsson 10.5. v. af 13
2. Sigurður A. Herlufsen     10.5 
3. Dr. Ingimar Jónsson       10
4. Guðfinnur R. Kjartansson 9
5. Ingólfur Hjaltalín              8
6. Pétur Viðarsson               8
7. Jón Steinn Elíasson         7.5
8. Viðhjálmur Guðjónsson    7.5
9. Árni Þór Árnason             7.0
10. Atli Jóhann Leósson        7.0

11 -20 með minna.

Myndaalbúm frá Einari S. Einarssyni