L-offerta tal-ġurnata

verżjoni poetika tat-talba uffiċjali l-ġdida

- ara s-sit tal-Appostolat tat-Talb.

Ngħolli lejk dal-jum, u noffrilek,

Lilek, Missier, Alla u Sid,

Ħsibijieti, talbi u kliemi,

Il-ħidmiet, il-ferħ, it-taħbit.  

Noffrulek ħajjietna

Magħqudin m’Ibnek Ġesù            

Li qalbu ħelwa w umli.

Biex nitqarrbu lejk ġie jeħlisna

Ibnek il-Waħdieni, Ġesù,

Hu li joffri fl-Ewkaristija

Lilu nnifsu kollu kemm hu.

Noffrulek ħajjietna

Magħqudin m’Ibnek Ġesù

Li qalbu ħelwa w umli.

Ħa’ jmexxini l-Ispirtu s-Santu,

Dak li mexxa ‘l Kristu fit-talb.

Ħa’ jimlini b’qawwa biex nuri

Kemm, lill-ħuti, tħobbhom mill-qalb.

Noffrulek ħajjietna

Magħqudin m’Ibnek Ġesù

Li qalbu ħelwa w umli.

Dik li qaltlek ‘iva’, Marija,

Titlob miegħi. L-omm tal-Mulej

Tgħinni nagħraf x’teħtieġ id-dinja,

Tqiegħedni ma’ġenb binha, l-Qaddej.

Fuq kollox noffrulek

Talb imħeġġeġ għall-fehmiet

Tal-papa u tal-isqfijiet.