བསླབ་བྱ་ལེའུ་བཞི་པ།
འཇིག་རྟེན་འདི་རུ་སྒང་གཤོངས་མང་ཞིག་འདུག
སྐྱིད་སྡུག་རིང་ཐུང་སྦོམ་ཕྲ་གྲངས་མེད་རེད།
འདྲ་འདྲ་གཅིག་ཀྱང་མེད་པ་མཐོང་གསལ་རེད།
འདི་ལ་ཆོག་ཤེས་རང་གིས་བྱས་པ་དགའ།
ཐོད་པའི་རི་མོ་བསུབས་ཀྱང་ཟུབ་རྒྱུ་མེད།
དེ་ལས་རི་མོའི་འགྲོ་ལུགས་བསྟུན་པ་དགའ།
ལྕོག་རོང་བོང་བུ་སྡུག་ཀྱང་རང་སྡུག་རེད།
སྒལ་པའི་རྒྱབ་ཁུར་མ་འཁྱེར་ཀ་མེད་རེད།
སེམས་གོས་ཆོད་ན་ནོར་ལ་མང་ཉུང་མེད།
ཆོག་ཤེས་མེ་པའི་རྒྱལ་པོ་སྤྲང་པོ་དང་།
སེམས་གོས་ཆོད་ན་སྤྲང་པོ་དེ་ལས་ལྷག
རྒྱལ་པོ་རྒྱལ་གཞིས་ཟོས་ནས་ལྟོགས་ལྷང་ལྷང་།
སྤྲང་ཕྲུག་ཐང་རྐྱལ་ཁེངས་ནས་སྤོ་དགྱེ་དགྱེད།
བཀོད་པའི་ལས་ལ་ཆོག་ཤེས་མ་བྱས་ན།
རང་སྡུག་རང་གིས་ཉོ་བ་དོན་མེད་རེད།
ཆོག་ཤེས་ལྡན་ན་ཕྱུག་དང་མ་ཕྱུག་མེད།
ལས་ལ་བཀོད་ན་དགྲ་ནོར་རང་གི་ནོར།
མ་བཀོད་ཕ་ནོར་བུ་ལ་བདག་པ་དཀའ།
ལྗང་པ་རྡོ་ཡི་སྟེང་དུ་སྐྱེ་མདོག་མེད།
སྦག་སྦག་སིག་སིག་བྱས་པ་ཅི་ལ་ཕན།
སེམས་པ་ཤོར་ན་ཕ་བཟང་བུ་ལ་ཤོར།
ཆོག་ཤེས་བྱས་ན་ལུས་སེམས་བདེ་ལ་འཇོག
ལག་ལེན་དངན་པའི་རིགས་ལ་སྤང་བྱ་གྱིས།
ཕ་བདེ་བུ་སྐྱིད་ཡོང་བའི་བསམ་བློ་ཐོངས།
འདི་ཕྱི་གཉིས་ཀྱི་གཏམ་དོན་ལག་པའི་མཐིལ།
ཁ་ཆེ་ཕ་ལུའི་སྙིང་གཏམ་ཁ་ནས་ལུས།
སྙིང་གི་བུ་ཚོ་སྙིང་ནས་རྣ་བ་ཉོན།
གོ་བ་ཡོད་ན་གོ་རྒྱུ་བཤད་ཡོད་དོ།
མང་པོ་མེད་ཀྱང་བྲོ་བ་བཅུད་དང་ལྡན། །