Kvennakórinn Heklurnar var stofnaður árið 2003 af nokkrum söngelskum konum í Mosfellsbæ.

Björk Jónsdóttir söngkona og söngkennari í „Complete Vocal Technique“ stjórnaði kórnum frá upphafi fram til vors 2011 en þá tók Vilborg Þórhallsdóttir við stjórninni.

Undirtitill kórsins er „kórinn sem bakar ekki“ og kveða lög kórsins á um að ekki sé stunduð fjáröflun í formi kökubasara eða farandsölu af nokkru tagi á vegum hans.  Kórinn skipa konur úr Mosfellsbæ og nágrannasveitarfélögum, sem hafa yndi af því að syngja í góðum hóp og æfir kórinn vikulega yfir vetrarmánuðina.

Heklurnar hafa komið víða við og sungið við ýmis tækifæri fyrir utan hefðbunda jóladagskrá og vortónleika.  Kórinn hélt meðal annars Laxness tónleika á degi íslenskrar tungu árið 2008 og samsöng með öðrum kórum bæjarins og lúðrasveit í tilefni 40 ára afmælis Lúðrasveitar Mosfellsbæjar 2009. Auk þess hefur kórinn tekið virkan þátt í kvennakóramótum Gígjunnar sem haldin eru þriðja hvert ár.

Heklurnar æfa á þriðjudögum í Varmárskóla, sal yngri deildar.  Æfingar hefjast kl. 19:30 og standa þær að jafnaði til kl. 22:00.

 

Heklurnar fara í æfingabúðir eina helgi á ári, gjarna undir lok febrúar, þar sem tekin er hæfileg blanda af fettum og grettum, teygjum, hláturjóga og svo að sjálfsögðu söng.  Í æfingabúðum kynnast konur enn betur, þar er mikið hlegið og sungið því laugardagskvöld í æfingabúðum er einnig árshátíð kórsins.

 

Fjöldi kórkvenna hefur verið á bilinu 20-25 undanfarin ár en alltaf er rúm hjá okkur fyrir áhugasamar konur á öllum aldri.