mAyAvAdaKaMDanam-moola
mAyAvAdaKaMDanam
narasiMhO&KilAj~jAnamatadhwAMtadivAkaraH |
jayatyamitasaj~jAnasuKashaktipayOnidhiH ||
vimataM anAraMbhaNIyam | anyathApratipAdakatwAt |
yaditthaM tattathA | yathA saMpratipannam ||
na hi brahmatmaikyasya yathArthyaM tatpakShE | adwaitahAnEH swarUpAtirEkE |
anatirEkE swaprakAshatwAdAtmanaH siddhasAdhanatA |
nirvishEShatwAdAtmanaH nAnadhigatO vishEShaH |
siddhatwAt swarUpasya vishEShAbhAvAccanAj~jAnaM kasyacidAvarakam |
anadhigatArthagaMtRu pramANaM iti ca tanmatam |
aj~jAnAsaMbhavAdEva tanmatamaKilamapAkRutam |
mithyAtwE caikyasya atattwAvEdakattwamAgamasya syAt |
satyatA ca bhEdasya |
EvamEva prayOjanamapi nirastam | swarUpatwAnmOkShasya pUrvamEva siddhatwAt |
aj~jAnasaMbhavEna caturtha-prakArAbhAvAt paMcamaprakAratApi nirastA | viShaya-prayOjanAbhAvadEvAdhikAri ca | tadabhAvAdEva saMbaMdhO&pi ||
dwAvimau puruShau lOkE kSharashcAkShara Eva ca |
kSharaH sarvANi bhUtAni kUTasthO&kShara ucyatE ||
uttamaH puruShastwanyaH paramAtmEtyudAhRutaH |
yO lOkatrayamAvishya bibhartyavyaya IshwaraH ||
yasmAt kSharamatItO&hamakSharAdapi cOttamaH |
atO&smi lOkE vEdE ca prathitaH puruShOttamam ||
yO mAmEvamasaMmUDhO jAnAti puruShOttamam |
sa sarvavidbhajati mAM sarvabhAvEna bhArata ||
iti guhyatamaM shAstramidamuktaM mayAnaGa |
EtadbhuddhvA buddhimAn syAt kRutakRutyashca bhArata ||
iMdriyEbhyaH parA hyarthA arthEbhyashca paraM manaH |
manasastu parA buddhirbuddhErAtmA mahAn paraH ||
mahataH paramavyaktaM avyaktAt puruShaH paraH |
puruShAnna paraM kiMcit sA kAShThA sA parA gatiH ||
OM bhUmnaH kratuvaj~jyAyastwaM tathA hi darshayati OM
iti viShNOH sarvOttamatwamEva shAstrArthatwEna bhagavatA shrutyA ca abhihitam ||
iti sarvaj~jamuninA mAyAvAdatamO&Kilam |
nirastaM tattwavAdEna satAM saMshayanuttayE ||
nAsti nArAyaNasamaM na bhUtaM na bhaviShyati |
EtEna satyavAkyEna sarvArthAn sAdhayAmyaham ||
|| iti shrImadAnaMdatIrthabhagavatpAdAcAryaviracitaM mAyAvAdaKaMDanaM samAptam ||