Madhwavijaya-6-Eng
ShaShThaH sargaH
aitarEyamatha kiMcana sUktaM sUcayan sadasi tatra gariShThaH |
shrOtumicCati sabhA bhagavadbhyaH sUkta-bhAvamiti tAvaduvAca ||6.1||
varNa-sauShThava-gariShThamatUrNaM tulya-mAtramati-mAtra-su-lakShma |
vyUDa hRujjalada ghOShamamuShyO ccAraNaM vi-dadhadabhyadhitArtham ||6.2||
lakShaNAnvita-tayA vacanE&smin dEvatA-gurumasAvati-shEtE |
mAnamityapi vidhAya dhiyA tE tatt tu sUktamaparArthamavOcan ||6.3||
syAt tathEtthamapi saM-bhavitA&rthaH tryarthatAM shrutiShu vitta dashArtham |
bhArataM nanu shatArthamapi syAd vaiShNavaM pada-sahasra-tayaM hi ||6.4||
ityudIrayati vistRuta-cittE bhU-surA iha jigIShava Enam |
Ucurartha-shatakaM hari-nAmnAM varNyatAmiti sa-hAsa-mukhAstE ||6.5 ||
varNayAmi tadahaM sakalaM vaH sauShThavAdanu vadaMtu bhavaMtaH |
taM vadaMtamiti tE&tha vadaMtO bADhamityati-dRuDhOdyamamApuH||6.6||
pratyaya-prakRuti-saMgama-bhaMgIM shabda-shAstra-vihatAM-pratidarSya |
shuddha-dhIH shruti-shiraH shata-siddhAn abhyadhAt sapadi vishva-padArthan ||6.7||
yAvadartha-shatakaM na vishaMkaH saMtatOkti-kRudapUpuradEShaH |
varNitAvadhRuti durbala cittAH tAvadAkula-hRudO hyabhavaMstE ||6.8||
sAMga-vEda-caturA itihAsE shikShitAH su-bahavO&pyati-dhRuShTAH |
naitadIritamahO jagRuhustE vishva-saMkShaya-payO&Mdhu-gaNA vA ||6.9||
dEvatAsvasulabha pratibhA tE mAnuShEShu capalEShu kathA kA |
kShAmya saumya sakala-j~ja namastE tE bruvaMta iti taM kila nEmuH ||6.10||
vEda-shAstra-caturairiha vidyA-vitta-lipsubhiravAptamashEShaiH |
prApa kEraLa-su-maMDala-jAtaiH anyadAyatanamAyata-cEtAH ||6.11||
tarka-taMtra-kushalAnapi puMsaH carkarIti bata sO&yamamAnAn |
mAnamAnamayatIha kathaM nO naiSha maMDala-bhuvAM samitAnAm ||6.12||
maMtrayaMta iti tE dvija-varyAH anya-dEshaja-mukhastamapRucchan |
sad-dadAdada-su-shaMsana-niMdA-kAri-sUkta-gatamarthamupEtya ||6.13||
taM sphuTaM pra-kathayan sa pRuNIyA-cchabda-mUlamavadat pRuNa dhatum |
taM jigIShumatha vipra-madaH prI-dhaatumESha ni-gadaMtamuvAca ||6.14||
prAdibhEdamavidan guNaya tvaM mUDha pAMsuShu likhan lipi-saMgham |
bhatsayanniti jahaasa su-hAsO matsarAkula-dhiyO jaDayan saH ||6.15||
tat prasaMga-balatO&khila-vidyA-pATavaM pRuthaH hRudaH pratibuddhya |
Anaman sa-bahu-mAnamamI taM yaM namaMti kila nAki-nikAyAH ||6.16||
kanyakAdRuta-surEMdra-vapuH shrI-dAna-vAci-vara-sUkta-hRuduktau |
kutracit sadasi tAvadapAlA kIrtitA&ti-taruNItyayamUcE ||6.17||
shvitriNI bhavati tat-pada-vAcyE-tyAgrahENa vadatO&viduShO&tra |
kashcidEShyati vipashcidihainaM pRucChatEtyayamagacChadathOktvA ||6.18||
dEshamEnamacirAdupa-yAtaH tAdRushAkRutirahO kRuta-buddhiH |
tAMstathA&bhyadhita tatpada-bhAvaM sUri-mauli-maNinA&tra yathOcE ||6.19||
kEvalaM na sakalAH shruti-vidyAH mAna-pUrvaka-samasta-girO&sya |
apyanAgata-gata-pratipattiM shrad dadhuH pRuthala-cEtasa EtE ||6.20||
yad-yadEva sapadi prakRutaM syAt tat-tadESha yadavEdakhalaM ca |
sarvadA sadasi sarva-budhAnAM sarvavid-yatiriti prathitO&bhUt ||6.21||
aprayAtamapi dEshamashEShaM vyAnashE su-jana-kairava-baMdhuH |
pUrNa-dRuk pra-tatayA nija-kIrtyA pUrNa-caMdra iva caMdrikayA&lam ||6.22||
suMdarEShu sura-maMdira-vRuMdE-ShviMdirA-ramaNa-vaMdana-kRutyam |
A-carannasucirAt su-vicArO rUpya-pITha-patimApa mukuMdam ||6.23||
bhU-sura-pravara-buddhi-samRuddhi-vyakta-yukta-vapuShaM rucirAMgIm |
sUtra-dIpta-maNi-mAlikayA&laM bhUShitAM bhavana-bhUShaNa-bhatAm ||6.24||
pAda-suMdara-padakrama-bhAvaiH bhAsitAM-prakaTa-varNa-guNADhyAm |
bhAratOttama-bhRutAmanurUpA-cChAdanAM samadhika-svara SObham ||6.25||
rAjasUya-mukha-sanmakha-vRuttAM vAsudEva-guNa-niShThita-bhAvAm |
sarva-dharma-pari-shikShaNa-dakShAM vaMditAM janatayA jananIvat ||6.26||
mauli-saMgraha-vi-karShaNa-dUnAM mAyinA sadasi duShTa-janEna |
nyAya-mArgamapa-hAya mahAMtaM svEshvaratvamapi sAdhayatA&lam ||6.27||
sajjanaiH katipayairati-dInaiH cAlitaiH kali-balAcChabha-mArgAt |
apyupEkShita-vikarShaNa-duHkhAM sAti-shOkamapi kaishcana dRuShTAm ||6.28||
vAsudEva dharaNIdhara nAthE-tyuccakairapi muhuH pra-vadaMtIm |
pUrNa-sad-guNamajaM gata-dOShaM bibhratIM hRudi viviktamashEShAt ||6.29||
vAryatAM budha-janairnanu hAhA naiSha dharma iti cAbhi-dadhanAm |
kRuShNa-lALita-tamAmanavadyAM apyananya-SaraNAM sharaNOtkAm ||6.30||
vEdijAmiva purA bharatAgryaH sa svayaM shruti-tatiM khalu dRuShTvA |
puShTa-buddhirakarOt karuNAbdhiH duShTa-pakSha-damana-sthira-saMdhAm ||6.31||
avyayaM satatamapyupa-bhaktyA vittamagryamiva dUra-yiyAsuH |
jyAyasE sa-guravE hari-gItA-bhAShyamESha vi-racayya tadA&dAt ||6.32||
hEtu-vAdini vishaMkaTa-buddhau tIrthamarthayati gaMtumanuj~jAm |
tAM didEsha puruShOttama-tIrthaH ciMtayan sa puruShOttama rakShAm ||6.33||
nIrajA malaya-maMDala-vRuttyA shlAghitO bhuvi sadALyanu-yAtaH |
sAdhu-pAMtha-pari-tApamapAsyan-uttarAM dishamayAnmarudaMshaH ||6.34||
buddhi-shuddhi-kara-gO-nikarADhyaM tIrtha-jAtamubhayaM ca dharaNyAm |
Atma-majjanata Eva nikAmaM paryashOdhayadamaMda-manIShaH ||6.35||
vAsudEva-pada-saMtata-saMgI tEjasA&pyalamadhaH kRuta-sharvaH |
atyavartata nitAMtamathAsau gAMgamOghamagha-nAshana-kIrtiH ||6.36||
tatra tatra sa jagat-traya-citraM karma sharma-damanu-smRuti-mAtrAt |
saM-caran vi-dadhadApa narANAM gOcaraM badarikAshrama-pArshvam ||6.37||
maMDayan bharata-khaMDamakhaMDaM nAdirAyaNa-padO&tra parO yaH |
taM naman pracura-dhIrhari-gItA-bhAShyamArpayadupAyanamasmai ||6.38||
prItayE&sya puratO vara-bhAShyaM vAcayan sa janatAmapa-sArya |
vacmi shaktita uru-krama-gItA-bhaShyaamityakathayat puru-saMkhyaH ||6.39||
Etadarthamati-sUkShmamapi tvaM shakta Eva na yadAttha samastam |
tEna lEshata itIha padaM syAd ityagadyata jagajjanakEna ||6.40||
tEna tat-pravacanE vihatE&laM shushruvuH prA-shayitA api shiShyAH |
ucyatAmiti muhuH sa-pRuthivyA-sphAlanaM padamahO hariNOktam ||6.41||
shabda-bhEdamavadharya tamarcA-sanniShaNNa-vapuShaH paramasya |
tasya bhAva-vidamaMda-manIShaH prOtthitaH pravacanaM vyadhitaibhyaH ||6.42||
majjanaM vyadhita shItaLa-gaMgA-vAri nityamaruNOdaya-kAlE |
yat spRushaMti na narA hima-bhItA aMsha ESha pRuShatAmadhipasya ||6.43||
kAShTha-maunamadadhAdupavAsaM shuddha-mapyakRuta shuddha hRudi cChan |
nityatuShTa-haritOSha-vishEShaM ciMtayan prabhumanaMta-maThAMtaH ||||6.44||
prairayat sva-caraNE rata-cittaM madhwamatra dina-maMDalamEnam |
svAshramOpa-gamanAya mukuMdO dIpti-dRuShTi-viditAgatiranyaiH ||6.45||
naktamEva bhagavatyupa-yAtE prOditE sati sahasra-marIcau |
maunavAnalikhaduttama-cittaH shiShya-shikShaNa-paraH karuNAvAn ||6.46||
nEdRushaM sthaLamalaM shamala-ghnaM nAsya tIrtha-salilasya samaM vAH |
nAsmadukti-sadRushaM hita-rUpaM nAsti viShNu-sadRushaM nanu daivam ||6.47||
yAti tAvadadhunaiva janO&yaM vyAsa-rUpamajitaM pra-didRukShuH |
A-vrajEdiha na vA sa hi vEda svasti vO&stviti yayAvatha madhwaH ||6.48||
nAtha nAtha bata nO&tra vinAthAn mA tyajOru-karuNO bhagavaMstvam |
nOditaM smRutamapIti hi shiShyaiH svAminO&bhi-mata-bhaMga-bhayEna ||6.49||
sad-gurOrna virahaM sahamAnaH satya-tIrtha-yatiranvagamat tam |
yastrivAramitarA-suta-shAkhA-svarthamagryamAshRuNOt puru-saMkhyAt ||6.50||
durga-mArga-gatamapyanu-dhavan nA&pa sO&yamaruNIbhavatInE |
lIlayA sa-javamA-kramamANaM vyAshrayAMtara-su-dUra-shilAsu ||6.51||
A-nivRutta-vapuShA guruNA&&rAt pANinA hyabhi-nayEna su-nunnaH |
trasta-dhIrati-yayau sa muhUrtAt tad-dinOpa-gata-mArgamashESham ||6.52||
AshramE nija-janAniha dRuShTvA taM prasAda-mahimAnamamuShya |
prOcya tat-plavanamapyati-citraM tasya taiH saha sadA&smaradEShaH ||6.53||
vAnarEMdra iva vAyu-javO&sau bhImasEna iva dAnava-bhImaH |
ullalAsa giri-puMgava-shRuMgE sa vrajan vRajina-nAshana-nAmA ||6.54||
bahu-sattva-gaNaM sa-vikaM sa-mahAviSha-mOkSha-mahAhimavaMtamayam |
viShamOkSha-mahA-himavaMtamayan nagamaikShata phulla-dRugasta-bhayaH ||6.55||
su-hasita-kamalA-karOpa-gUDhaM su-jana-sukhArthamanaMta-bhOga-shayyam |
vikasita-sumanO-ghaTAgamuccaM marataka-ratna-maya-sthalAgrya-shObham ||6.56||
pAdOpAMta-namanmahA-muni-gaNaM hEma-pra-dIptAMbaraM shrImad-ratna-kalApamagrya-kaTakairvi-bhrAjitaM hATakaiH |
dRuShTvAtaM dharaNI-dharaM su-vana-mAlOllAsinaM suMdaraM svAnaMdAkRutimasmaranmura-ripuM svAnaMda-tIrthastadA ||6.57||
iti shrImatkavi-kula-tilaka-trivikrama-paMDitAcArya-suta shrI-nArAyaNa-paMDitAcArya-viracitE shrI-madhwa-vijayE mahA-kAvyE AnaMdAMkitE ShaShThaH sargaH |