Iddiada

Isteddas mudas
in su lugores fritu 
postu a palas 
de una note pessosa
e sa luna pispisiende 
in su selenu      
cantu de prata b’at
in pizu ’e lughe.

Est falada sa ’iddia
a manzanile
e s’annapat sa vista
a sa ventana mia
Tando iscrio
cun su pòddighe infustu
peràulas de amore
pro chi restene imprentadas  
in su idru  
e  trasparèntzias  de lughe
tot’in ziru
si m’aberzant
che incantos a sa vista.   

Poi a s’ingrinada
finit su fritu  
e tèbiu si faghet
su sole ‘e su manzanu. 
Lagrimende  m’irvanessit 
cantu iscritu
in d’una note ’izada
a cor’in manu.

Istevene Flore