hee3oo3itootou’u nuhu’ bee3ei . hiinwo’wuuhu3i’ nuhu’ hineniteeno’. niitoh- heetbohootiinoo3i, ‘oh niiseiht he’ih’iice’oxootii. beexehciisiniihiihi’ he’ne’nih’iitootiit. he’ihniisneniin.
hinee hoo3oo’o’ beneniiniini hootii3i’.
wohei nehe’ he’ih’iiniisce’oxootii ce’esiihi’. wohei nuhu’ biihi’iiyou’u ‘oh bee3ei he’ih’iicoocoo’u3ei’i. howoo nuhu’ he3ebii he’ih’ii- he’ih’iicihcoo’uhee nuhu’ he3ebii. hiit nih’iibeebee3i’, yiiyih’oowoo3i’. hoowoe’inoneeno’ nuhu’ tohneenini3 bee3ei. wohei ceese’ koox he’ne’ce’wo’wuuhu3i’;
he’iitnei’i ne’ce’ootii3i’. niiniihi3i’ heenei’isiihi’, hiinoo’ei3i’, kooko’uyei3i’ heenei’isiihi’. ‘oh nuhu’ niiseiht he’ih’iice’oxootii.
kooxbiih’iyou’u he’ih’ii- ... ‘oeii he3ebii nih’iiyih’o’owoo3i’: [he’ih]non3enouuhu. wohei hoowoe’inoneeno’ nehe’ niiniisootiit.
woo’wuuhuutooni’i ‘oh he’ih’iinii3wo’wuuh.
kooxci’ he’ne’ce’wo’wuuhu3i’. nooxowuuni woo3eeni’i hito’uwooninoo,
hini’iit biibiinootno noh heeneixoo’osi’i3i’i, noh heenei’isiihi’. hiineenoutowuu hinee; nii’ceciiniini’ heetni’bii3ihi3i’. nii’ceciiniini’ehk, ciino’o3ini’iinoo’ei3i’ ,
wo’ei3 biibiinootno... tohuuceeneibi’i... heenei’isiihi’.
noh hootii3i’; kooxne’ wo’wuuhu3i’. he’ihce’ootii[no’], ‘oh nuhu’ niiseiht, he’ihce’es- ‘oeii, ‘oh hiiwoonhehe’ he’ih’iinoh’uusiiyoo... biikousiis he’ihnoh’oe3ee hiit wootii wootii he’ih’iisiin. koox nuhu’ he3ebii ne’yih’o’oowoo3i’.
“wohei 3iwoo, he’iisiini...” heehehk ceese’ hinen. “niibeexo’yih’oowoo3i’ nuhu’ he3ebii.
heetneyeihe’inowoo.” ne’noehit.
kokiy ne’iiteno’, no’oehit. ‘oh hini’iit hohootin he’ihnoohobee bee3ein. he’ih3i’okun ho3es biikousiis. “yeh, hiiwo’ neneehek, hiiwo’ neneehek!” wo’o’oto’ he’ihcesisih’o.
he’ihcih’oowuh’ohuukoo. nuhu’ he3ebii koox ne’yih’oowoo3i’. “hiiwo’ neneehek teeco’oncoo’uheino’ bee3ei!” koox nee’ehco’ouu3ih’ohut “wohei hiiwoonhehe’ heetnii- niicobo’.” heetnicoboot.
sebyihoot; nihi’kuutiit. cenisi’ hini’ bee3ei. “wohei hi3nohkuseic heetnehwoniini notio’no’.” he’ih’iinoh’ookenen, ne’kohei’it. “huut nihceno’oho’ hini’iit bee3ei. nooxeihi’ neneenit niicoo’uhoot nuhu’ he3ebii. heetwonnehyoniho’.
sehno’use nenitee he’ih’einok. he’ihneen, hi’in nootiit ce’e3i’.
he’ihneenin bee3ei. noh hootii-... nooxeihi’ nih’ookoo3inoo’oot he’iitnei’i, nihii hinenteenit.
wohei nuhu’ biih’iyou’u, ‘oh nih’iibei3einit. nih’iineenit bee3ei. neneenit nih’iicoo’uhoot. m hi’in hei’neh’eit, ‘oh neneenit nihse’isi’. neneenit nih’iitse’isi’ hini’iit nih’iice’oxootiit. noh nehe’ nih’iisiini nuhu’ ; ne’nih’ii3oo3itee3i’ .
‘oh hoowuuhu’... tohneneebeeniini nehe’ bee3ei. niibehiini nihii
neenih’oowuuni... nuhu’ biih’iyou’u...
nehe’ bee3ei neneenit nii- neenih’owuuni, wootii ni’iinokotiit heeneisiihi’. neneenit... nohokoo3oo’ nuhu’ biih’iyou’u nenee’. ‘oh no3ne’nih’ii3oo3itee3i’. he’ihneen nehe’ nih’iice’oxootiit; he’ihneen hi’in bee3ei. hi’in hei’ceno’ohuuht, ‘oh nooxeihi’ nihco ‘okooxunoo’oot, noh hinen he’ihse’is. ne’nih’ii3oo3itee3i’, nih’oo3itoone3en. |