Search this site

bit.ly/jBxzp: Amor de Jesus—Poeta Lauredu Ning Capampangan

Recent site activity

Pangadi Bayu Tuglung King Internet
O kipnuan king upaya at alan-anggang Dios, king anyu Mu lelang Mu kami at sinabi Mu kekami ing dulapan mi ya ing cayapan, ing catutuan, at ing caniwan, lalu't lalu na ing tagle cabanalan na ning Bugtung Mung Anak, Y Jesucristong Guinu mi, itulut Mu, pagamu-amu mi Keka, king kapamilatan nang San Isidro, Obispo at Doctor, a sana king penandit ning pamaglayag mi king Internet iyungyung mi la ding mata at gamat mi bucud mung king bague munie ligaya Keka at pakibagayan mi la sana king mitmung lugud at kapakumbaban ding maldang caladwang kekaming akatalamitanan. Kapamilatan na ning Cristong Guinu mi. Amen.
[by Fr. John T. Zuhlsdorf; translated by Renato B. Alzadon, Academia Ning Amanung Sisuan (ANASI)]

Pangadi
O Ibpa ming caluguran, ipangadi mi sanang parati na ing grasiang pinacamaulaga na pigcalub mu quecami queti qng yatu, yapin ing pamicalugud emu sana caring caluguran mi qng bie mi nune sana caring sablang taung lelangan yu. Buclat yo pu ring pusu mi na sana ecami cararagling mamatul careng calupa ming lelangan mu, macasadya caming mamatawad, dinan mu caming dacal a capibabatan, pamaglunus at lugud. Ing pamanyamba o casuyuan para quecayu, e maragul a dapat queti yatu pero ing cayablasan na ing alang anggang tula banua.
[by Melencia Catacutan]

Copyright © 2009-2012 Ing Agila Ning Apalit.

Ing Bie Cu

Ing Bie Cu
Neng Mely G. Catacutan


Anyang mibayit cu panaun ding Hapon
 Ding tawu e balu nukarin magsantung
 Aisip da naman deting pengari cu
 King salikut na la at magbakwit pamu.

Ala lang adala nanumang gamit da
 Ban yaku muman kanu asalikut da
 Pero y tatang ku e mipalage'y lub na
 Magbalik king bale yanang aisip na
 Ban iligtas muman nanu mang akit na.

King cawalang kalma ikit de ring Hapon
 Beril de'y tatang cung alang casalanan
 Mapilan pang aldo mabilis milabas
 Kanita re icua acutcut payapa.

King panaun aita magdili-dili ya'y inang
 Alang balung daptan king pangabalu na.
 Anti ta nang ikit nanung kawalan na
 Manese't magpakan canacung anac na.

Ding apu cung adua ilang mecasaup
 Meningat, migbante't migparagul cacu
 Kaya'y ugali cu sasabiyan da cacu
 Sese canung apu caya maisip cu.

Niyang mate ya'y tatang anam cu mung bulan
 Alang camalayan king bye cung delanan
 Anya yko ngeni na atin pang tatang
 Luguran yong lubus at paka ingatan

Mabilis milabas migit limang banwa
 Ecupa balu man na ala cung tata
 Balu cu'y tata cu menintunan ya mu
 Datang ing panaun akit ke't abalu!

Pero ing milyari caibat ning pabanwa
 Mekiasawa ya ing mebalung matua
 Ene man migmali king ayasawa na
 Uling liguran na cu 'timong anac na.

Kayari cu rugu king elementarya
 Mesakit ing bie mitucnang ing obra
 Kanyan ya linakad at memaglapitan
 Yapu kung lalaki caring kamag-anak.

Ecu picarine sablang casakitan
 Balang aldo-aldo na cacung delanan
 Uling matibe cu casalpantayan
 Datang ing panaun mibawi ku naman.

Kanyan ya mebilug ing cacung paninap
 Kayaring secondaryu macu na't megdulap
 Ing tutuki cung bie karin akit yu ne
 Ing primerung poesya Metung a Paninap.

King poesya cung Metung a Paninap
 Metupad, mebuo ing sablang pangarap
 Anya asabi cu king cacung sarili
 Salamat pu Guinu metupad ngan iti.